1 Anihán múa le atokarubei houn lani Manasési türibu le liráü Hosé le íbugañaü. Lun Makirü, wügüri lánina wuribu le furumiñeti liráü Manasési ani lúguchi Galaadü lichugúa Galaadü luma Basán, luéigiñe oubaü le ñéingiñe lubéi laboucha weyu libiti Hordán. 2 Deregewati burí múa houn híbiri lirahüñü Manasési según hibe haduheñu: Lun Abieserü, Élekü Asüriéli, Sikemü, Éferü luma Semidá, sun ha lirahüñü Manasési, libañan Hosé.

3 Ánheinti Selofádü (le liráü Éferü libari Galaadü, le liráü Makirü libari Manasési), marahüñüti wügüriña haweidigia seingü würiña: Malá, Noá, Ogulá, Milüká tuma Tirüsá. 4 Aba houdin würiña ha lumoun fádiri Eleasárü, Hosué hama ábutigu, aba hariñagun houn:

—Ariñagati meha Wabureme lun Moisesi lun lichugúniwa múa woun kei houn waduheñu. Ábati líchugun Hosué múa houn kei houn haduheñu, ítara kei buga lariñaguni Wabureme.

5 Díisiñein lubeiti fánreinti habihin lani Manasési türibu, bóugudin luéi Galaadü luma Basán le luéigiñebei oubaü le ñéingiñe lubéi laboucha weyu libiti Hordán, 6 lugundun rúati múa houn lirahüñü Manasési dandu houn würiña kei houn wügüriña. Houn híbiri ladügawagun Manasési leredera Galaadü. 7 Lagumesera hamúan lani Manasési türibu lúmagiñe Aserü lumoun Mikümetátü, le ligibugiñebei Sikemü, lasigira luagun suru, darí lumoun lísensen Tapúa. 8 Lau sun hani lan lani Manasési türibu Tapúa, uburugumeme Tapúa, le lubadubei láfadaragun Manasési, yuuti houn lani Éfürain türibu. 9 Ñéingiñe laragacha fadaguaü luagun suru, darí luagun liraüraü lidunari Kaná, labadinaguañein lubeiti burí luburugute Manasési luburugute burí Éfürain le, lau sun lani lan Manasési fadaguaü nórute libiti liraüraü duna, úara luma üma luagun barana. 10 Leredera Éfürain luéigiñe suru libiti liraüraü duna, Manasési luéigiñe nórute, leredera barana Mediteraniu kei lébeha fulasu, háfadaragua luma Aserü luéigiñe nórute, luma Isakárü luéigiñe oubaü le ñéingiñe lubéi laboucha weyu. 11 Lun giñe Manasési lichugúa uburugu burí le lidan lumúan Isakárü luma Aserü, kada aban lau lirahüñü aüdü yarafa lun: Betü-seán, Ibüleámü, Doru, Endoru, Taanakü luma Megidu, luma ǘrüwa lirahüñü wübü. 12 Gama lumoun siñá hamutiña lani Manasési türibu Kananna ha ñéinbaña asagara, aba herederun ñein. 13 Lárigiñe, dan le héredunbei Ísüraelina, aba hafayeiragüdüniña seinsu lun urúei, gama lumoun masaga hamutiña ñéingiñe.

14 Hariñaga ladügawagun Hosé lun Hosué:

—Ka uagu ábanrügü lubéi murusun múa bíchiga woun lau ubunuruni, ani gíbetiwa, biní laadiwa giñe Wabureme?

15 Aba lóunabuniña Hosué:

—Kei le gibe hubéi, ani mabaraadün luagu luwübüri Éfürain, heiba áchuga hufulasun áraabu hamúanrugu Féresüna hama Refaímüna.

16 Hariñaga lun:

—Anha inarüni, lóuguati wübü burí le woun. Gama lumoun Kananna ha aganóubaña lidan fulasu mawübüriti gakarüntiña to lautu gürabu, dandu ha aganóubaña Betü-seán kei ha aganóubaña lidan fulasu wayati le gíribei Hesüreeli.

17 Ábati lóunabuniña Hosué ladügawagun Hosé, ha lani Éfürain luma Manasési türibu:

—Huguya gíbetün ani gabafutün; mámarügübei aban murusun fulasu atokara hun; 18 hánibei giñe wübü le, le darugubei dabíara lau, háchugubei lun hánime. Habugagubaña Kananna ha ñéinbaña íbini here hamá gakarün hagía to lautu gürabu.