1 Aba ladimurehan Wabureme lun Hosué, lariñaga lun:

2 —Badimureha hama Ísüraelina, bariñagame houn lun hanúadahan uburugu aramudaguagülei, kei meha nariñaguni lídangiñe Moisesi. 3 Anhein áfara aban gürigia gürigia líledi, mabusenrunga, gayaraabei lanurahan lidoun aban lídangiñe uburugu ligía aramudagua luéi liduhe le láfarubei. 4 Le achülürüti lidoun aban lídangiñe uburugu ligía lun laramudagun ñein, gasu lariñaguni houn ábutigu ka lan lébubei lanurahan. Ábameti hígiruni lun lebelurun, ábame híchugun aban fulasu lun, lun laganóun ñein. 5 Anhein léibaaha liduhe le afarúbei, mederegerun habéi lábutigu uburugu lun, ladüga láfarunbalin mabusenrunga yebe, mama ladüga liyereegun lun. 6 Gama lumoun le anurahabei, lerederuba ñein uburugu, darí larufudagun lungua hagibugiñe sun gürigia lun laguserun, darí lounwen fádiri le íñutimabei lidan dan ligía. Lárigiñeme, gayaraahalime lagiribudun anurahati lidoun fulasu le ñéingiñe lubéi lanuraha, lúbiñoun guánarügü luma lidoun luburugute.

7 Ábati hanúadiruni Ísüraelina Kedesi lidan lumúan Galiléa, lidan láraabute Nefütalí, Sikemü lidan luwübüri Éfürain, luma Kiriatü-arüwá lememe Ebürón lidan luwübüri Hudá. 8 Loubafurugugiñe Hordán, lidan fulasu mageirawati luéigiñe oubaü le ñéingiñe lubéi laboucha weyu libiti Herikó, anúadira hamuti Béserü lídangiñe hamúan lani Rubén türibu, lídangiñe fulasu le Galaadü anúadira hamuti Ramotu le hamúan lani Gadü türibu luma Golán lídangiñe fulasu le Basán lídangiñe hamúan lani Manasési türibu. 9 Ligía burí uburugu aramudaguagülei houn áfarahatiña le hanúadirubei houn sun Ísüraelina luma houn terencha ha aganóutiña hadan. Ñein, gayaraati laramudagun furumiñeguarügü le áfaruti gürigia líledi mabusenrunga, lun siñá lan liabin liduhe le afarúbei áfarei le áfarahabei lubaragiñe laguseragüdüniwa.