1 Aba lasigirun Moisesi ayanuha:

—Lárigiñe aba wárügüdün amu üma aba woudin luagun Basán. Gama lumoun aba láfuridun Ogu, le lurúeite fulasu ligía hau sun lisudaranigu lun hageindagun wama uburugu Edüréi.

2 —Ábati lariñagun Bungiu nun: "Manufudeda humá luéi, ladüga ru naali húhaburugun hau lisudaranigu luma lageira lun hadügün lun kei hadüga lun Sihón le harúeite Amoruna le meha aganóubei Esübón."

3 —Ítara liña lederegeruni Aburemei le Wabungiute urúei Ogu hau sun lisudaranigu labun wabafu, aba wáfaraguniña súngubei mígirunga ni aban. 4 Ragǘ wamuti giñe sun luburugute. Lidan súngubei ǘrüwa-weinñein uburugu le wárügüdübei, sun le lóubawagubei Arügóbu, le larúeihan Ogu, lóubawagu Basán. 5 Sun burí uburugu ligía derebuguti, lau ayarawaguni lauti dübü íñuburiti, bena luma idaündaü chóuruburiti, bóugudin luéi burí uburugu le mabarieirunbei. 6 Aba wagünrinchaguni kei wadüga lun Sihón le lurúeite Esübón, gumuguagüda wamutiña wügüriña, würiña hama irahüñü, 7 habiñanigurügüñanu wáganiñu luma burí hemegen le gebegiti wanüga.

8 —Ítara liña lubeiti, lidan dan ligía, ábürühati hamúan burí biángubei urúeigu Amoruna labun wabafu, urúeigu ha meha aganóubaña luéigiñe oubaü le ñéingiñe lubéi laboucha weyu libiti Hordán, lúmagiñe luéigiñe duna Arünón darí lumoun wübü Erümón. 9 (Wübü ligía, Sirión haña meha Sidonna lun, hariñaga Amoruna lun, Senirü.) 10 Sun burí uburugu le luágubei fulasu mawübüriti, sun Galaadü luma Basán, darí Salüká luma Edüréi, uburugu burí le lábugiñebei larúeihan Ogu, lóubawagu Basán, ábürühati wáhaburugun. 11 (Urúei Ogu, ligíarügaali bugaha eredera hádangiñe Refaímüna; lautu gürabu ligabanan, gádürü méturu timigifen, yarafa lun bián méturu tidabuberen, arihúagiru meha gabana tugía uburugu Rabá le lani Amón, lídanbei tabürüdǘniwa garudia to.)

12 Aba lasigirun Moisesi ariñaga:

—Lídangiñe múa le wárügüdübei lidan dan ligía, derege numuti múa le lúmagiñebei Aroerü, laru duna Arünón, darí lamidan luwübüri Galaadü labu burí luburugute houn lani Gadü hama lani Rubén türibu. 13 Le líbiri Galaadü, sun louba Basán le meha lábugiñebei larúeihan Ogu, luma sun louba Arügóbu le asubudirúabei keisi hamúan Refaímüna, aba níchuguni houn hamidan lani Manasési türibu. 14 (Aba lárügüdüni Hairü le ladügawagun Manasési louba Arügóbu darí lumoun láfadaragun Gesuru luma Maaká, aba líchuguni liri luagu Basán, aba líchugun Awotu-hairü luagu, ani ligiamémegili liri.) 15 Lun Makirü aba níchuguni louba Galaadü, 16 houn lani Rubén hama lani Gadü türibu aba níchuguni múa le labadinaguabei Galaadü luma duna Arünón, láfadaragua luma lamidangua fulasu wayati, darí lumoun duna Haboku, le láfadaragun hamúan Amonna. 17 Luagun oubaü le ñeinhin lubéi lálüda weyu chülüti hamúan dagá lumoun duna Hordán, lúmagiñe barana Galiléa luagun nórute, darí lumoun barana hilaali luagun suru, ani darí lugudina wübü Pisügá luagun oubaü le ñéingiñe lubéi laboucha weyu.

18 —Lidan dan ligía níchiga dimurei houn lani Rubén türibu, lani Gadü türibu luma dimí türibu lani Manasési: "Derege lumuti Aburemei le Wabungiute múa le erederubei le ñéingiñe lubéi laboucha weyu libiti Hordán hun, ragǘ humaali hageirame. Guentoti sun ha gageindaguadibaña, barǘ hamóun hárumate, heiba habá habá Ísüraelina ha hupaisanun lun híderaguniña lun hárügüdüni hamúan. 19 Würiñarügübaña hama irahüñü hama saragu ibiñanigu ha húmabaña eredera uburugu. 20 Íderagua humaña hupaisanun darime lásurun hárügüdüni múa le líchugubei Aburemei le Wabungiute houn le ñéingiñe lubéi lálüda weyu libiti Hordán, ani darime wínwanhaña ñein lidan darangilaü kei huguya lidan humúan. Ligíaalime hagararaagun lidoun humúan le líchugubei Wabungiute hun luéigiñe oubaü le ñéingiñe lubéi laboucha weyu libiti Hordán."

21 —Ariñagatina giñe lun Hosué: "Ariha baali le ladügübei Aburemei le Wabungiute houn bián urúeigu ha, Sihón luma Ogu; ani ítarameme luba ladüga lidan sun fulasu le ñéingiñeba lubéi básügüra. 22 Manufudedabá hawéi, lugundun lageindaguba Aburemei le Wabungiute luéigiñe hufulesein."

23 —Lídanmeme dan ligía, ayumuraguatina ariñaga lun Bungiu. 24 "Bungiu, gumeseedibu arufudei buéirigun luma bubafu nun. Úati amu Bungiu sielu ni ubouagu le gayaraati ladügüni lubuidun burí katei le badügübei. 25 Ayumuraguatina bun lun bígirun lun nánhiñuragun loubafurugun duna Hordán, lugundun busentina narihini lubuidun múa ligía luma burí lidabiaran luma wübü Líwanu." 26 Gama lumoun gáñiti Bungiu nun hadüga, aba michuláni le namuriahabei luma nun, lariñagarüga nun: "Hebé! Hebé badimurehan nun luagu katei le. 27 Wariba lábulugun wübü Pisügá, barihame ñéingiñe luagun nórute luma luagun suru, luagun oubaü le ñéingiñe lubéi laboucha weyu luma luagun oubaü le ñéingiñe lubéi lálüda weyu, ánheinti Hordán, mánhiñuragun bubéi. 28 Arufudahabá lun Hosué, ruba gurasu luma anigi lun, lugundun ligíaba adundehaña Ísüraelina lun habihini ani deregeléime fulasu le barihubei houn."

29 —Aba werederun lidan fulasu wayati, ligibugiñe Betü-peoru.