1 —Danme lachülürün hati le Abibü, lunti hefeduhani luéyuri esefuruni lidan liri Wabureme le Hubungiute, lugundun lidan aban áriebu kei ligía lasagaraün Wabureme le Hubungiute Ehiptugiñe.

2 —Lidan luéyuri esefuruni hanügüba bágasu hama mudún keisi adagaragüdüni lun Wabureme le Hubungiute, lidan fulasu le lanúadirun lúbanme liri.

3 —Animaalu le adagaragüdüwabei, héigibei tau fein to maganatu lébini. Héigiba fein maganatu lébini luagu sedü weyu, fein to lánina asufuriruni, lugundun lau furesei háfurida Ehiptugiñe, súnmeti dan le lunbei habagariduni, haritaguba luagu weyu le háfuridunbei Ehiptugiñe. 4 Lidan sedü weyu ligía, lunti ua lan lébini lidan sun hageira, úi giñe le ichugúbei keisi adagaragüdüni rábounweyu lidan furumiñeti weyu, moun lumuti ligirún lídangiñe lubá le aban weyu. 5 Moun lumuti hadagaragüdün le lánina Luéyuri Esefuruni lidan furumiñeguarügü uburugu lídangiñe le líchugun Wabureme le Hubungiute hun, 6 luéidigia lidan fulasu le lanúadirun lúbanme liri, ani gasu rábounweyu lan hadagaragüda, dan le lálüdün weyu, ladüga ligía oura háfuridun Ehiptugiñe. 7 Héigibei úi le adagarubei lárigiñe hábouguni lidan fulasu le lanúadirubei Bungiu, larugan binaafin ábame hagiribudun húbiñoun.

8 —Héigiba fein maganatu lébini luagu sisi weyu, luágume lisedün weyu ábame hadügün aban óundaraguni inebewati lidan liri Wabureme le Hubungiute; madügünbadün ni aban luwuyeri wadagimanu weyu ligía.

9 —Danme sügühali sedü dimaasu, lúmagiñe weyu le lagumeserunbei lalubahóun türigu, 10 ábame hefeduhani lufeduna alubahani lidan liri Wabureme le Hubungiute, ábame híchuguni hidewese según abiniruni le heresibirubei lúmagiñe Wabureme le Hubungiute. 11 Ábame hefeduhan ligibugiñe Wabureme le Hubungiute lidan fulasu le lanúadirubei keisi luban liri, hau sun hisaanigu, hidamun, Lewitagu, terencha, méteñuhaña hama würiña hilaguaaña úmari ha aganóutiña huburuguterugu. 12 Haritagua humá luagu idamuni lan meha giñe huguya Ehiptu, gúnfuli huméi lubeiti sun lúrudu le.

13 —Danme súnhali halubahani hinadüri türigu luma haribichagunu beibei, ábame hefeduhani tufedun dibasein luagu sedü weyu. 14 Gunda humá lidan fedu ligía hama hisaanigu, hidamun, Lewitagu, terencha, méteñuhaña, hama würiña hilaguaaña úmari ha aganóutiña huburuguterugu. 15 Sédübei weyu hau efeduhei fedu le, lidan liri Wabureme le Hubungiute, lidan fulasu le lanúadirubei, ladüga labinirubadün Wabureme le Hubungiute lidan sun halubahan luma lidan sun huádigimari, buídubei dan hun sunsuinagubei.

16 —Lidan ǘrüwa fedu le sun wügüriña Ísüraelina gasu harufudagun houngua ligibugiñe Bungiu lidan fulasu le lanúadirubei lun lichugúniwa uéiriguni lun: Lufedun Luéyuri Esefuruni, Lufedun Alubahani luma Tufedun Dibasein. Moun lumuti larufudagun ni aban lungua ligibugiñe Bungiu málouga lúhabu, 17 gasu líchuguni kada aban lidewese según abiniruni le leresibirubei lúmagiñe Bungiu le Lubungiute.

18 —Lidan burí uburugu le lunbei líchuguni Wabureme le Hubungiute hun lunti hanúadahan aguseragüdütiña hámaya amu gumadimatiña lun kada türibu, lun haguseragüdüniña lílana fulasu lau irichaü. 19 Madüga humá marichaü lidan hasiadihan, abanlá labu hóuseruniña sun gürigia ani meresibira humá afayeiruni lun madügün humani le richabei. Ladüga darú lumuti lira hagu wügüriña ha chúbaña aau, ábati hasiadihan lau marichaü. 20 Irichaü, irichaürügülátia hafalara, lun habagaridun buidu lidan ageiraü le lunbei líchuguni Wabureme le Hubungiute hun.

21 —Mábuna humá tídibu wewe lun híchugun uéiriguni lun aban guáriua, míchugun humeime lurugabu lani Wabureme latarü. 22 Míchugun huguyame dübü ñein lun háhuduragun lun, ladüga magundanti Wabureme le Hubungiute lau katei ítara buriti.