1 Aba lasigirun Moisesi ariñaga houn:

—Lárigiñe aba wasigiruni waweiyasun lidan fulasu mageirawati luagun Barana Funati, kei buga lariñaguni Bungiu nun, éibugatiwa saragu dan ibidiñounga woun haliñounñadiwa lan eme funa buga wegeyehaña lau burí lidabiaran Seirü. 2 Ábati lariñagun Bungiu nun: 3 "Moisesi, lǘhadüntia egeyehei dabíara burí le; heiba luagun nórute guentó." 4 Ábati lariñagun Bungiu nun: "Ariñagabá houn Ísüraelina: Hásügürüba hamúanrugugiñe ladügawagun Esaú, ha aganóubaña Seirü ani hiduheñu; hagía hanufudetiña huéi, gama lumoun góunigi humá, 5 mageindagua humá hama, lugundun míchubadina ni murusun lídangiñe fulasu ligía hun, lugundun hani ladügawagun Esaú sun luwübüri Seirü. Níchugun houn. 6 Hamuriahaba hama lun haluguruni éigini le hemegeirubei hun, hafayeihaba luagu, íbini luagu duna le hatun." 7 Biní laadün Wabureme le Wabungiute lidan sun le hadügübei, húmañein lidan sun bián-wein irumu le ani góunigi láadiwa lidan wéibugun lidan óunwenbu fulasu mageirawati le, úouga ni kata wemegeirun.

8 —Lárigiñe aba woudin luéigiñe lémeri Arawá, Elatü luma Esión-géberü, aba wásügürün hamúanrugugiñe waduheñu ha ladügawagun Esaú ha aganóubaña Seirü, ñein wadüga aban egeyeduni lun wárügüdüni lémeri fulasu mageirawati le lani Moabü. 9 Ábati lariñagun Aburemei nun: "Mañawarihabátia houn Moábüna mageindagun buguyame hama, lugundun ladügawagun Lotu, ani míchubadina ni murusun lídangiñe hageira bun. Ru naali, lóubawagu Arü houn hánime." 10 (Ladügawagun meha Emín aganóubaña lidan fulasu le lidan bugaha binadu dan, gürigia hagía, wéinamutiña meha, gibe hagía, gágubutiña kei ladügawagun Anakü le hígandei. 11 Lidan linarün katei, haritaguatiña meha gürigia luagu Refaímüna hamá, lau sun ladügawagun lan meha Emín haña lan Moábüna houn. 12 Louba Seirü le, Óruna meha aganóubaña ñein furumiñe, gama lumoun aba hagumuchaguagüdüniña ladügawagun Esaú lílana fulasu, aba herederun aganawa ñein ítara kei hadüga Ísüraelina lidan ageiraü le líchugubei Bungiu houn.) 13 "Guentoti —liña lariñagun Bungiu—, heiba, hiñugua huméi liraüraü duna le gíribei Séredü. Ábati wánhiñuraguni Séredü."

14 —Lúmagiñe wígiragüdün Kadesi-barünéagiñe darí lumoun weyu le wánhiñuragunbalin liraüraü duna Séredü, sügüti darandi-widü irumu. Lúmounbei dan ligía, hilaguaaña sun hadügawagun wügüriña ha garumudirihaaña lun hawuribuhan, ítara kei láfiñuruni Bungiu. 15 Ábürühati lubafu Aburemei hawagun, darí hóunwegun sun hagía.

16 —Dan le meredeeli ni aban hádangiñe wügüriña wuriburuguna hagía wínwanñu, 17 aba ladimurehan Bungiu numa, lariñaga nun: 18 "Hásügürübei láfadaragun Moabü uguñeméme, ábame hidin luagun Arü, 19 gama lumoun danme hadunragun hama Amonna, ha giñe ladügawagun Lotu, mañawariha humaña, mageindagun huguyame hama, lugundun míchubadina ni murusun lídangiñe hamúan hun, ladüga ru naali houn hánime." 20 (Subudiwati meha giñe ageiraü le, keisi hamúan Refaímüna, lugundun aganawaaña meha Refaímüna ñein ha meha únbaña hagúaha Amonna Samüsumitagu 21 gíbetiña meha gürigia hagía, gágubutiña kei ladügawagun hígandei Anakü, gama lumoun günringuagüda lumutiña Bungiu houn Amonna, aba herederun aganawa lidan ageiraü ligía lun sun dan. 22 Ligiaméme katei le ladügübei Bungiu luagu hafulesein Edomuna ha ladügawagun Esaú: Aba lagumuchaguagüdüniña Óruna lun hakuparuni Edomuna hamúan. 23 Ligiaméme giñe asuseredubei houn Eweuna ha meha aganóubaña lidan burí lirahüñü fulasu yarafa lun Gasa, aba hagumuchaguagüdüniña Filistéana ha ñǘbuinbaña Küretagiñe aba herederun aganawa ñein.) 24 "Lárigiñebei wánhiñuraguni ageiraü le gíribei Moabü, aba lariñagun Aburemei woun:

—Hubaruaguóun humá, hiñugua huméi duna Arünón! Nadügüba lun hagañeiruni wuribu luma Sihón le harúeite Amoruna le erederubei uburugu Esübón hageindagua kóntüra Sihón ragǘ huméi lageira hánime. 25 Lúmagiñe uguñe, nadügüba lun hanufudedun lílana sun fulasu huéi. Danme haganbun ladimurehoun huagu, hadadagaruba, buin hagíame lau idiheri."

26 Aba lasigirun Moisesi ariñaga:

—Aba nóunahan óunagüleigu lídangiñe fulasu mageirawati le gíribei Kademótu lumoun Sihón le lurúeite Esübón lun namuriahani burí katei le luma lau umadaguaü: 27 "Wáluguña üma lun wásügürün bageiragiñe, füramasetiwa luéigiñebadiwa lan meni üma megeyedunga lidoun amu fulasu bumúanrugu. 28 Ani luagu wafayeirubei lan éigini le wemegeirun lau seinsu, fayei wameime duna le lunbei wátuni. Busenrügütina bíchugun üma woun lun wásügürün, 29 ítara kei hígiruniwa ladügawagun Esaú ha aganóubaña Seirü lun wásügürün hageiragiñe ítara giñe kei hígiruniwa Moábüna ha aganóubaña Arü, darime wánhiñuraguni duna Hordán lun wachülürün lidoun ageiraü le lunbei líchuguni Aburemei le Wabungiute woun».

30 —Gama lumoun máhati urúei Sihón lun wásügürün lumúanrugugiñe ladüga ládaruni Aburemei le Wabungiute lidoun lun máhabei lan, lébuname líchuguni húhaburugun keisi lubéi dagá lumoun dan le labürühóunbei.

31 —Ábati lariñagun Wabureme woun: "Lúmagiñe oura le, derege numuti Sihón hun lau sun lageira; belú humá lumúanrugun, ragǘ huméi."

32 —Aba láfuridun Sihón wabaroun hau sun lisudaranigu lun hageindagun wama lidan fulasu le gíribei Haasü; 33 gama lumoun aba lábürügüdüni Aburemei le Wabungiute wáhaburugun, aba wagañeiruni wuribu luma hau sun lirahüñü hama lisudaranigu. 34 Ábürühati sun luburugute labun wabafu aba wagünrinchaguni, áfaragua wamutiña wügüriña, würiña hama irahüñü, mígiruntiwa ni aban wínwanñu. 35 Ibiñanigurügüñanu luma burí katei le gebegiti le wadarirubei uburugu wanüga woungua. 36 Lúmagiñe uburugugiñe Aroerü, le lubadubei duna Arünón, luma uburugu le luágubei fulasu wayati, darí Galaadü, úati uburugu awandutiwa, ábürügüda lumutiña Aburemei le Wabungiute súngubei labun wabafu. 37 Anihánrügüñein burí fulasu uágunti mábürühan wamá: Hamúan Amonna, ni burí uburugu le erederubei laru duna Haboku, ni burí uburugu le erederubei dabíararugu, ni burí fulasu le uágubei lariñaga Aburemei le Wabungiute woun lun mageindagun wamá hama.