1 «Sielu, aganbabá, lugundun nadimureha,

múa, ruba arigei lun nererun.

2 Lábürühaba narufudahan kei huya,

ítara luba napurichihan kei serenu,

kei láhibihan huya luagun híduru

kei lédedehan duna luagun sagadi.

3 Nadimurehabei liri Bungiu:

Subudi huméi luéirigun Aburemei le Wabungiute!

4 Ligía óunigirubaliwa,

lídanñein dan sun le ladügübei,

richaguati sun le ladügübei

ligía Búngiubei lánina inarüni,

úati marichaü lidan,

richaguati ani inarüniti.

5 Gürigia wuribatiña ani salufuritiña,

anabagua hamaali Bungiu

madünatiña lun lirahüñübaña lan.

6 Ítara liña san hafayeiruni Aburemei?

Gürigia deré taganbun, ibidiougua tau,

ma funagia ligía búguchibei, le adügübalibu?

Ligía adügübalibu ru ligía ibagari bun!

7 Digiguabá bárigoun,

saminabá luagu dan le sügühalibei,

bamuriaha hama bagübürigu lun hariñaguni bun,

luma houn wéiyaaña mutu

lun habahüdaguni le asuseredubei bun:

8 Aba líchuguni Suntigabafu hamúan néchanigu houn,

ru lumuti burí láfadaragun múa ligía.

Aba lariñaguni halíaba lan buga haganawa,

ani ru lumuti múa le yuubei lun kada néchani,

según hibe lani Wabungiute ánheligu

gama lumoun abahüda lumutiña Ísüraelina hadan,

9 gama lumoun areida lumutiña ladügawagun Hakobu,

lun lánigubaña lan,

10 lidan fulasu mageirawati ladariraña,

lidan múa mábeiti le bei laali garabali;

aba lanügüniña larünarugu,

aba larufudahan houn,

aba lóunigiruniña kei lila lagu.

11 Kei ágila to áhamahatu lóugiñe tumasa

arufudaha houn tirahüñü lun háhamahan,

aba tátuleruni tarüna lun takatouruniña ánhaña éiguada,

ítara liña látuleruni Wabungiute larüna habá Ísüraelina,

aba lanügüniña lanagawagu.

12 Búngiurügüñein adundehaña, úati amu luéi;

míderagun lumuti ni aban bungiu terencha!

13 Barǘ lumutiña lidoun agañeiruni luéigiñe burí wübü,

hóugüda lumutiña lin nadü áraabuna,

daritiña hádibu maba laganagua dübü,

darí hagía burí lídibu oliwu

lidan fulasu le buin liña lau dübü.

14 Ibihatiña míligi luma furumasu hádangiñe halügüniña bágasu,

hóutiña hádangiñe habuidun-agei harahüñü mudún,

mudún ha Basangiñetiña hama gábara wügüriña;

hou hamuti lubuidun-agei lila türigu,

gurá haméi diwéin le lira beibei.

15 Gama lumoun aba ladibunedun Hesurún,

aba líchaagun kiki,

(dibuneti saragu darí lun lámiridun lau dibunei)

aba ladireirun luéi Bungiu le adügübalin,

aba líchugun mebereseni luagu le ágüdahabalin, le esefurubalin.

16 Gáñigüda hamuti Bungiu

lau háhuduragun houn hagübüri búngiugu;

17 dagagüdatiña houn máfianu,

houn búngiugu ha iyeenitiña ha bugaha ibidiñetiña houn,

iseri búngiugu ha sun liña hachülürün,

ha bugaha únbaña máhuduragun hamá hagübürigu.

18 Ísüraeli, bulíei bumuti búguchi,

le ágüdahabalibu;

bulíei bumuti Bungiu le íchugubei ibagari bun.

19 Aba lagañidun Bungiu dan larihini katei le,

aba lamaharun houn lirahüñü;

20 aba lariñagun: "Níchigaali nanagan hawagun,

nariha kaba lan hadüga!

Lidan linarün katei,

gürigia wuribatiña hagía,

isaanigu ha siñati lemenigidúniwa hawagu.

21 Emeidigüda hamutina luagu aban bungiu le mama Bungiu,

gáñigüda hamutina hau hagübüri habungiutegu,

nemeidigüdübaña giñeti hawagu gürigia ha mama numutuniña,

nagañidagüdübaña hama gürigia deré taganbun!

22 Durunguaali nigañi kei aban watu gemeti,

ani lachülürüba chülǘ lumoun lilulin-agei fulasu;

lagumuchaguagüdübei múa lau sun lin,

lágudubei lugudina burí wübü.

23 Nóunahabei sun wuribani hawagun,

nachüühaboun sun nigimaran hawagun;

24 láfaragubaña ilamaü luma abiruaü;

lagünrinchagubaña aban igei gífiti;

nóunahaba animaalugu gáñitiña hawagun hama hewe péisinitiña.

25 Hábürühaba harahüñü ǘmada táfaragun eféin,

hanufudenóugabei burí múnada;

hóunweguba wügüriña hama würiña ñǘbürigiña,

wéiyaaña mutu hama irahüñü ha guragiña.

26 Haritaguaadina yebe nachagaraguniña

luma lun naguluduni hiri ligibuagugiñe ubóu;

27 gama lumoun máhatina,

luéi nawanduni habulan áganiñu;

luéi hanaagun náganiñu houngua,

hariñagame: Mama Bungiu adügübalin katei le,

wagía adügübalin lau wabafu.

Úati gunfuranda hamá!"

28 Féridi hamaali lílana Ísüraeli hachügü;

29 Lun hamuga chu lan hau,

gunfuranda hamuti hamuga;

gunfuranda hamuti hamuga halíaba lan hébeda.

30 Ida liñagia léibaaguagüdünbei ábanrügü gürigia milu?

Ida liñagia héibaagunbei bián milu hawéi biánrügü?

Ladügarügü laranserun Bungiu

le ágüdahabaliña lederegeruniña houn háganiñu!

31 Gabafutimati Wabungiute

sügǘ hau habungiutegu wáganiñu,

hagía guánarügü ariñaga hamuti.

32 Hagía ítara haña kei beibei-agei wuribati,

ladügawagun Sodoma luma Gomora hagía,

ani beibei gífiti le péisiniti hinboun.

33 Hapeisinin hewe haniñeboun diwéin,

hapeisinin hewe le gáfarahati.

34 Nareidahañein sun katei le,

nareiduñein kei aban irisini,

35 lubá luéyuri naguburahan

danme níchuguni le hadünabei houn,

lubá danme lachülürün lóurate hábürühan.

Yarafaali luéyuri hagünrinchawagun,

yarafaali hóurate!

36 Láfuriduba Bungiu ageindagua hámagiñe lumutuniña

danme larihin luagu megei hamá erei;

gudemehabubei Bungiu houn lubúeingu

danme larihin luagu úaaña lan débilitiña ni héretiña.

37 Ábameti lariñagun houn:

"Hagaña san Hubungiute ha meha uágubaña hemenigida,

38 háñaha éigibalin lagüle hadagaragüdün

gurá hamóun burí diwéin to híchuguboun houn?

Sará hamá íderaguaün!

Ñübuin hamá ageindagua huéigiñe!

39 Áurügüñein Bungiu,

úati amu bungiu nuéi.

Au íchugubalin ibagari, au agidarei,

au íbugubei, au areidaguagüdei biti

úati kaba lan esefura luéi nubafu!

40 Iñura numuti núhabu sielun,

aba náfiñurun luagu nibagari le magumuchadibei

41 luagu danme lan nayaradunu nefeinte to miriboun

lun nagumeserun arufudaha irichaü,

nafayeiragüdübaña lan náganiñu luagu hadüga.

Níchugubei le hadünabei ha iyereehabúbaña nun houn.

42 Nadüdüragüdüboun burí nigimaran lau hitaü,

tagumuchuba nefeinte hau;

hata íbaawagutiña hama adaürǘtiña!

Hata ábutigu ha áganiñu, ha miginagu tídiburi!"

43 Gunda humá néchanigu úara hama lumutuniña Bungiu!

Laguburahóuba luagu hóunwegun lubúeingu hámagiñe háganiñu,

feruduna lubéi lageira hama lumutuniña».

44,45 Arufudaguati Moisesi lungua hagibugiñe sun lílana Ísüraeli, ligía luma Hosué le liráü Nun aba lariñaguni uremu le lúmagiñe lagumeseha darí lumoun lagumuchun. 46 Lárigiñe aba lariñagun houn Ísüraelina:

—Samina humá buidu luagu sun le ariñaga náalibei hun uguñe, ariñaga humá houn hisaanigu lun hadügüni sun le bürüwañubei lidan lúrudu le. 47 Ladüga mama katei le lunti hanügüni kei ni kata lira; ibagari lúrudu le hun, ladügaba habagarida saragu dan lidan fulasu le loubafurugubei duna Hordán, fulasu le lunbei hánibei lan.

48 Weyuméme ligía, aba ladimurehan Bungiu lun Moisesi, lariñaga lun:

49 —Beiba dabíararugun Abarímü, ábame bamudeirun luagun wübü Nebu, le lumúanrugubei Moabü, ligibugiñe Herikó, bariheime lumúan Kanán ñéingiñe, le lunbei níchuguni houn Ísüraelina hánime. 50 Ñeinba luagu wübü ligía bounwe, ábame bidin óundaragua hamoun bánigu, ítara kei bíbugaña Aarón le óunwebei luagu wübü Oru, aba lidin óundaragua hamoun lánigu. 51 Biángubei huguya magunfuliruntün meha numa kei lubudubu hagibugiñe Ísüraelina, dan le meha lídanñadün lubéi lidunari Meribá-kadesi lidan fulasu mageirawati le lani Sin, lugundun míchutün inebesei nun hagibugiñe. 52 Baríaguaali lubeiti fulasu le lunbei níchuguni houn Ísüraelina dísegiñe, gama lumoun mebelubadibu ñeinhin.