1 Anihán uganu le líchugubei Wabureme lun Abüdíasi luagu ageiraü le gíribei Edomu.

Aganbaadiwa aban uganu lúmagiñe Aburemei,

Ñǘdünhali aban anügüti uganu hamoun néchanigu ariñaga houn:

«Keimoun wawuribuha luma Edomu!»

Lariñahare Wabungiute lun Edomu:

2 «Nañüraüdagüdübadibu hadan néchanigu

ǘnabuguagüda nábume saragu.

3 Yeeda láadibu banaagun bungua.

Lidan burí lawarahan dübü beredera,

lidan fulasu íñuti baganawa,

ligíati baritagunbei luagu ua lan gayaraati lágurunibu.

4 Gama lumoun íbini iñu lan báhamarun kei ágila

ani adügabéime bumasa hawagu waruguma,

nábürügüdübadibu ñéingiñe».

Lariñahare Aburemei:

5 «Ánhañadügü hamuga ñübuin híwerutiña íweruhabu áriebu,

manügün hamuti hamuga súngubei;

ánhañadügü hamuga ñübuin abudahatiña beibei,

hígiruba fiu resimu.

Ánhañati báganiñu, günringua hamaadibu sunsuinagubei.

6 Asagarahóuaadibu Esaú!

Íweruhoua darí lumoun lagumuhóun bumegen le aramudañubei!

7 Yéedagua hamutibu sun bánigu;

bugá hamutibu bumúanrugu guánarügügiñe.

Íbini ha guánarügü bumadagu garabaguaaña buagun,

bumadagu ha uágubaña bemenigida,

sétihaña sádara bubá. Hariñaga:

"Ibidiouguati lau Edomu!" »

8 Lariñahare Wabureme:

«Danme le nabeichuni Edomu,

nagünrinchagubaña sun chu taugu ha ñéinbaña,

meredebei ni aban gürigia huali tichügü Edomu.

9 Hadadagaruba wuriburuguna ha lílana Temán lau anufudei,

háfarawaguba sun wuriburuguna ha Edomubaña.

10 «Banügüba busiganu, bagünrinchawaguba lun súnwandan,

ladüga báfaruni Hakobu le bamulen.

11 Díreirügütibu dan le hasagarahanbalin áganiñu uburugu,

dan le habouchagunbalin súdara terencha lubenari Herusalén.

Dan le harifahanbalin burí katei le hasagarubei Herusaléngiñe,

ítara biña buga giñe kei hagía.

12 Moun lumuti buga bagundaarun lau

barihini bíbiri lidan lilamiserun,

moun lumuti buga bagundaarun

lau barihini Hudá lidan günringuaü,

moun lumuti buga badügün bula hau lidan hadiheri.

13 Moun lumuti buga bebelurun nuburuguterugun

lidan lidaani lasufurirun,

magundaarun buguya hamuga lau lilamiserun,

míweruhan bumuti hamuga giñe lirisin

lidan lidaani lilamiserun.

14 Moun lumuti buga bararamun luagu legeyedun üma

lun báfaraguniña ha anurahabaña,

mederegerun bumutiña hamuga giñe ha anurahabaña

lidan lidaani idiheri.

15 Kei badüga houn amu,

ítara luba giñe ladügǘn bun,

Beresibirubei le badünabei!

«Yarafaali luéyuri Wabureme houn sun néchanigu.

16 Ítara kei ligifi uniñein le hátubei luagu nuwübüri le sándubei,

ítara luba giñe ligifi uniñein le lunbei hátuni híbiri néchanigu murusun murusun;

ábame hagumuchagun sunsuinagubei».

17 «Ánheinti wübü Sión,

ábanbei fulasu sánduti

le ñéinhinba lubéi hanuraha fiu gürigia.

Hibihayabei ladügawagun Hakobu hamúan lárigoun;

18 ítara haba ladügawagun Hosé

hama ladügawagun Hakobu kei watu gemeti.

Hagíaba agünrinchaguaña ladügawagun Esaú,

ítara kei láguduni watu gemeti sagadi sáühali.

Mesefubei ni aban hádangiñe lánigu Esaú!

Au le, Aburemei ariñagubalin».

19,20 Hárügüdübei Ísüraelina ha Negebübaña fulasu le durubei le lani Esaú, ha luágubaña fulasu mawübüriti, hárügüdübei hamúan Filistéana. Hárügüdübei giñe lumúan burí Éfürain luma lumúan Samaria, hárügüdeime lánigu Benhamín Galaadü. Hárügüdübei Ísüraelina ha asagarúbaña hageiragiñe keisi adaürǘtiña hamúan Kananna darí Sarepüta, adaürǘtiña Herusalénna ha Sefarádübaña hárügüdübei luburugute burí Négebü. 21 Hamudeiruba lumutuniña Bungiu luagun luwübüri Sión, ani ñéingiñeba hagumadiraña Edomuna. Aburemei le Bungiu ligíaba Urúei.