1 Ariha numuti Wabureme, lurugabuñein latarü, lariñaga nun:

«Áfarahabei kapitéli le tani ténpulu darime ladadagarun tuágaburi;

Ábürühala hawagun gürigia!

Ha erederutiña wínwanñu,

náfaragubaña tau eféin;

íbini hálugun hanurahan,

úabei ni aban esefuruti;

2 Íbini haramudagun lábugiñe múa,

nasagarubaña ñéingiñe,

íbini hamudeirun luagun liñun sielu,

narariragüdübaña ñéingiñe.

3 Ánhaña aramudagua lábulugu wübü le Karümélu,

íbini ñeinhin nídiba áluahaña;

ánhaña aramudagua baranaha,

nóunahabei mónsturu le

baranahabei lun láfaraguniña;

4 ánhaña hanüga háganiñu keisi adaürütiña,

nóunahaboun eféin áfaraguaña.

Ligibugiñebaña nagu súnwandan,

lun wuribati, mama lun buiti!»

5 Wabureme le Suntigabafu,

ligía aguurubalin ubóu aba larürüdagun,

aba hayahun sun lílana.

Lamudeiruba ubóu rarí ligíame

kei lamudeirun ani rarí ligía lidunari Nilu.

6 Adügaali Wabureme luban sielu,

rulei sielu lóugiñe múa;

wati lun barana, aba láwiyuruni ligibuagun múa.

Aburemei, ligía líribei.

7 Lariñahare Wabureme:

«Ísüraelina, aban labu nanügünün

kei nanügüniña Etiopíana.

Ítara kei nanügünün Ehiptugiñe,

ítara liña giñe nanügüniña

Filistéana Küretagiñe hama Aramüna Kírügiñe».

8 Ariha lumuti Wabureme arúeihani, gafigounti le, lariñaga:

«Naguludubei ligibuagugiñe ubóu,

gama lumoun magünrinchagun nubóun luban Hakobu sunsuinagubei».

Aburemei ariñagubalin.

9 «Níchugubei nererun lun tánhingichun luban Ísüraeli,

kei tewenihóun türigu lidan táseiha,

mábürühanga ni aban lagu múarugun.

10 Sun ha gafigounbaña hadan numutuniña,

háfarawaguba tau eféin;

sun ha ariñagubaña:

"Masuseredunbei ni kata lídangiñe le woun,

márügüdün lubadiwa wuribani".

11 «Anitebei weyu danme nararamagüdünuya luban Dawidi to héiguaaruboun. Nadouragubei huyu burí le tuágubei, nadügayaboun ítara kei tubei meha lidan dan le sügühalibei, 12 lun sun lan le erederubei lídangiñe Edomu luma lídangiñe sun néchani le meha numegenbei, lun liábinya lun lánibei lan Ísüraeli». Ru laali Wabureme lererun, ani lagunfulirubei.

13 «Anitebei dan lun danme lan anihagua lan lalubahóun türigu, dánhalime lun lawouhóun múa, másugilime taribichawagún beibei, chülühame dan lun lábunawagun türigu. Táwiyuhaba diwéin kei duna luéigiñe burí wübü. 14 Ábameti nanügüni Ísüraeli lídangiñe ladaürǘn. Ábame hábunaguniya uburugu burí le günringuaalibei, ábame haganóun lidan; hábunaguba beibei ábame hátunu diwéin, hábunaguba nadü ábame héigini lin. 15 Lugundun níchugubaña lidan hamúan guánarügü, masagarunhañame lídangiñe múa le níchugubei houn». Aburemei ariñagubalin.