1 Lariñahare Bungiu:

«Gasu nabeichuniña Moábüna ladüga adügaaña saragu wuribani;

gudá hamuti labu lurúeite Edomu darí ladügün baligime.

2 Ligía nágudubei lubéi Moabü,

ábame lágudunu watu ligía

lani burí Keriotu palasiu;

ábame hóunwegun Moábüna laganagua

tíñaahan fidu luma agúarahani

le lánina wuribu.

3 Nagidarubei urúei hamidanguagiñe lumutuniña;

náfarubei hilagubei hau sun luwügüriñanigu ha wéirigubaña». Aburemei ariñagubalin.

4 Lariñahare Bungiu:

«Gasu nabeichuniña Hudaana

ladüga adügaaña saragu wuribani;

lugundun máhatiña lun heresibiruni narufudahan,

magunfulirun haméi nilurudun,

huduguarügü hagía hounmeme búngiugu

ha meha únbaña háhuduragua hagübürigu.

5 Ligía nágudubei lubéi Hudá,

ábame lágudunu watu lani burí Herusalén palasiu».

6 Lariñahare Bungiu:

«Gasu nabeichuniña Ísüraelina

ladüga adügaaña saragu wuribani;

alugura hamuti le madurunbei luagu seinsu,

alugura haméi le gudemebei tuagu aban feru geidi.

7 Rútiña lidere dan houn gudemetiña,

máhatiña híchuguni haricha ha ǘnabugububaña houn.

Úguchili luma liráü aganawatiña tuma ábanmeme würi,

awiyedei niri le Sándubei.

8 Róuntiña tigibuagu daüguaü to ichugútu houn

lun heigin lidan hiri guáriua;

agañeihatiña diwéin lau seinsu

le haguburahan lau marichaü,

aba hátunu litenpulunrugu habungiute.

9 Gama lumoun lau sun lira,

günringua numutiña Amoruna lun gayaraabei lan hásügürün,

günringua numutiña le gumuti lau sun gágubu burí hamá kei hibúari,

here hagía kei róbüle.

10 Ánheinti huguya, sagá numutün Ehiptugiñe

aba nadundehanün luagu bián-wein irumu lidan fulasu mageirawati

lun níchuguni hamúan Amoruna hun.

11 Ani siñati hasigeneruni huguya Ísüraelina,

luagu ñéinñanu lan hídangiñe nadügün profetagume,

híbiri keisi nasaréugu».

Aburemei ariñagubalin.

12 «Gama lumoun huguya,

fosu humutiña nasaréugu lun hatun diwéin,

wéridi humaña profetagu luéi hadimurehan lidan niri.

13 Nakünringüdübei múa lábugiñe hugudi,

kei takünrinhan aban kareta buin lau türigu.

14 Íbinime héibaagun, mesefubadün;

lalouguaduba lere le héretimabei,

mesefubei ni le ganigitimabei.

15 Mawandunbei le achüühabei gimara,

mesefubei ni le óufubei,

ni le gabayuaguti.

16 Lídanme weyu ligía,

íbini le ganigitimabei hádangiñe wuriburuguna,

láguruboun lárumate luáriua lun gayara lan lanurahan».

Aburemei ariñagubalin.