1 Lariñaga Wabureme lun Honasi le liráü Amitái:

2 —Beiba lidan óunwenbu uburugu le Níniwe, bariñagame houn sun lílana fulasu luagu nagünrinchaguaali lan, ladüga aganbaadina luagu hariban.

3 Gama lumoun lubaragiñe hamuga ladügüni Honasi le lubeibei Wabureme lun, álugarügü ligía lanurahan luéi Bungiu, aba lidin lidoun aban fulasu gíriti Hope, le ñein lubéi ladarira aban ugunei madiseeli lun táfayarun lun tidin Tárüsisin; aba lafayeiruni lupasein lun lidin Tárüsisin. 4 Aba láfuragüdün Wabureme aban garabali héreti, aba ladagarun aban lanarime dan baranaha darí lun kamá lan hamuga tabouchagua ugunei. 5 Aba hanufudedagun mádulungu, aba lagúahani kada aban hádangiñe lubungiute. Lagumuhóun dan, aba hachagaruni sun ilaü baranahoun lun tawalidagun ugunei. Honasi bugati, rariha buga turageirugun ugunei aba larumugun.

6 Ábati lidin arünei le ñein lubéi Honasi, lariñaga lun:

—Ka san badügübei ñein dabu tagu buguya le? Saraba, wabei Bubungiute! Ubuguadügü gudeme wamá lun ábame lesefuruniwa.

7 Añahati mádulungu ariñaga hámagua:

—Wachüüra ubunuruni subudi wamaamugei ka lan gadurunbei ya lasuseredunbei katei le woun.

Ábati hachüürün ubunuruni, aba lábürühan luagun Honasi. 8 Ábati hariñagun lun:

—Ariñagabéi woun ka lan uagu lasuseredunbei katei le woun. Ka san bísinisi anügübalibu ñahoun? Halíagiñe san biabin? Halíana san buguya? Ka san birasanbei?

9 Lariñaga Honasi houn:

—Ebüréu au, ani seriwitina lun Aburemei le Lubungiute sielu, le adügübalin barana luma múa.

10,11 Aba labahüdagun Honasi houn mádulungu luagu lanurahaña lan luéi Aburemei, danti le haganbuni le lariñagubei, luma dan harihinbei luagu héreugatimaha lan, aba hasandirun saragu anufudei aba hariñagun lun:

—Kame san badügei katei le? Kaba san wadüga bau lun lagalumadun barana?

12 Lariñaga houn:

—Fui humana baranahoun, ábame lagalumadun barana. Subudi numuti buidu luagu nídangiñeti lan ladagarunbei óunwenbu luriban dan le.

13 Aba yebe hénheunhan mádulungu lau sun here lun hachülürün larun beya gama lumoun siñati, ladüga héretimarüga lérouga. 14 Ábati hagúaruni Wabureme, aba hariñagun:

—Aburemei, mígiraba lun wóunwegun ladüga lidurun gürigia le. Ani anhein madurun lubéi mafayeiragüdabawa luagu lounwen, ladüga buguya Wabureme adüga bumuti katei kei babusenrun.

15 Lárigiñe hariñaguni le, aba hachüürüni Honasi baranahoun, aba lagalumadun barana. 16 Dan harihinbalin mádulungu katei le, aba hasandirun aban óunwenbu inebesei lun Wabureme, aba hadagaragüdün lun, aba hadügün burí füramasei lun.

17 Aranse bugati Aburemei aban óunwenbu udu lun ligíaba lan áhuluchei Honasi. Aba lásügürün Honasi ǘrüwa weyu luma ǘrüwa áriebu lurageirugu udu ligía.