1 Wéiriti magundan lan Honasi lau katei le ladügübei Wabungiute, aba lagañidun saragu. 2 Ábati lafurieidun lun Wabureme, lariñaga lun:

—Nabureme, susere buga le uágubei nariñaga dan le anahagua lubéi nageira luagu ligíaba lan asusereda. Ligía nálugunbei nanurahan furese uburugun Tárüsisi, ladüga subudi numuti luagu aban lan Bungiu gudemehabuti buguya, luagu weiri lan bínsiñehabu, aba bariñagun luagu basufuriragüda lan gürigia lárigiñe aba basakürihan, aba madügün baali lan. 3 Ligíati namuriahanbei buma Nabureme lun bagidaruni nibagari. Himei nágili nounwen sügǘ lau nasigirun abagarida.

4 Gama lumoun aba lóunabuni Wabureme, lariñaga lun:

—Haritaguatibu san luagu buidu lan bun lun bagañidun ítara?

5 Aba láfuridun Honasi uburugugiñe, aba lemeraagun luéigiñe oubaü le ñéingiñe lubéi laboucha weyu libiti uburugu Níniwe; aba ladügün aba dibasein ñein, aba lañuurun tábugiñe, agurabaha lun larihin kaba lan asusereda lun uburugu Níniwe. 6 Aba ladügün Wabureme lun taweiridun aban híduru lóugiñe Honasi, lun ladouragun lamuñan lau, lun lasandiraguntima lungua buidu. Mati lugundan Honasi lau híduru ligía. 7 Gama lumoun larugan binaafin, aba ladügün Wabungiute lun tágürüni aban héweraü híduru ligía, aba lásaürün. 8 Dan le láfuridunbei weyu, aba láfuragüdün Wabungiute aban garabali süti luéigiñe oubaü le ñéingiñe lubéi laboucha weyu, keiti ladagarun lisü weyu reiti lábulugun Honasi, aba lasandirun kamá ladagara falalaü luagu, aba layumahan lounwen. Lariñaga:

—Himei numuti nounwen sügǘ lau nasigirun abagarida.

9 Lariñaga Wabungiute lun:

—Haritaguatibu san luagu buidu lan bagañidun luéigiñe lásaürün híduru?

Lariñaga Honasi lun:

—Anha! Ani buin niña lau igañi darí lun láfaraadina lan!

10 Ábati lariñagun Wabureme lun:

—Mama bábunu híduru, mama giñe baweiridagüdün; lidan aban áriebu láhücha, lidan le aban áriebu lásaüra. Lau sun lira, gudemehabutibu lun. 11 Lúntimati gudemehabu nan lun Níniwe, óunwenbu uburugu le ñein habéi sügǘ hau san-wein-milu irahüñü ha machuugili hau, hama saragu animaalugu.