1 Anihán uganu le líchugubei Bungiu lun Mikeasi le Moresétina libügürü Samaria luma Herusalén dan meha lidaani larúeihan Hotamü, Akasi luma Esekíasi Hudá.

2 Sun gürigia, aganba huméi katei le;

lílana sun fulasu, ru humá arigei:

Wabureme, ligíaba gefén kóntüra sun huguya,

lúmagiñe tídangiñe litenpulun to sánduboun.

3 Láfuriduba Wabureme le ñéingiñe lubéi laganóua,

ábame liabin éibugeina ligibuagu burí wübü.

4 Larürüdaguba burí wübü lábugiñe lugudi

kei lubuña sanudelu wáturugu,

ladaaraguba fulasu wayati lidan bián murusun

kamá hamuga ladüraagun duna héreti.

5 Lasusereduba sun le,

ladüga hamaganbadin lumutuniña Hakobu,

ladüga hafigoun Ísüraelina.

Ka gadurunbei luagu lumaganbadin Hakobu?

Mama funagia Samariana?

Ka adüga anuhein tubéi hasanduariun gibe tubungiutegu Hudá?

Mama funagia lílana Herusalén?

6 Ligía lariñagunbei Wabureme:

«Nagünrinchagubei Samaria, lárigirugurügüba eredera,

lun tábunawagun beibei ñein.

Nachagaragubei lidübüri uburugu lidoun burí fulasu wayati

ábame nafuranguagüdüni tiderebugu.

7 Hagünrinchawaguba sun liguariuan,

gudawa ligíame sun ugudinaü sagüráuti.

Kei lau lubéi haseinsun horu hadügǘwa,

nadügayabaña haseinsunme horu».

8 Ligía nayahuba lubéi lau saragu íruni;

ligía néibuguba lubéi surusu ani masabadunga,

áwouheina kei ounli áraabuna

agúaraheina kei awesüturusu.

9 Ladüga máraninati biti le luágubei Samaria;

ani chülühali darí Hudá,

darí Herusalén uburugu le ñein lubéi haganawa numutuniña.

10 Mariñaga huméi katei le houn lílana Gatü;

mayahuaha humá.

Habalabaha lau igarigu múarugu Betü-le-afürá.

11 Lílana Safirü, heiba lidoun adaürǘni bóugudin luéi hageira

surusu, buin lau busiganu!

Máfuridunbaña ha aganóubaña Saanán!

Anihein ayahuni Betü-éseli,

huguya herederuba bóugudi luéi lídehan!

12 Ha aganóubaña Marotu, agarabahatiña lau gáriti,

busentiña yebeha hasandiragun houngua buidu,

ladüga chülügüda laali Wabureme wuribani

dagá lubenari Herusalén.

13 Huguya Lákisina,

ha maganbadibaña kei Ísüraelina,

huguya le lébunabei lifigoun Sión,

gürá humá gabayu tuagu hikarün.

14 Ayouragua humá lun Moresetü-gatü lun sun dan.

Leseriwiduba uburugu Aküsíbü

keisi sádara houn lurúeitegu Ísüraeli.

15 Lariñahare Wabureme:

«Nóunahaba aban gagañeirati fulasu huagun

huguya le aganóubei Maresá,

ha íñugutimabaña Ísüraeli,

hóudiba ebelura lidoun burí lagadábugiñe dübü Adulámü.

16 Buguyati, uburugu Sión,

sabei bídiburi arufudei bigarigu

hadüga isaanigu ha wéiribei hínsiñe bun.

Hiyabei bídiburi darí berederun kei aban wadubi,

lugundun hanügǘba birahüñü

keisi adaürǘtiña diseun luéi hageira».