1 Lídanme lagumuhóun dan,

lederebugüdüwaba wübü le ñein tubéi

litenpulun Wabureme.

Ligíaba wübü íñutima;

íñubei sügǘ lau furumiñeguarügü wübü.

Hayabiba sun néchanigu luagun;

2 hayabiba saragu gürigia ariñageina:

«Higougu, wawarira luagun luwübüri Wabureme,

litenpulunrugun Lubungiute Hakobu,

lun larufuduni lémeri woun,

gayara láamuga wéibugun luéigiñe lǘmate».

Ladüga Sióngiñeba liabin larufudahan Wabureme,

Herusaléngiñeba liabin lererun.

3 Laguseragüdübaña Wabureme néchanigu,

larihuba lau hawuribun gürigia gíbetiña,

íbini ha dísetimabaña.

Hadaaguba awouhagülei tau hefeinte,

adüga hagíame líbaaha sagadi lau arufun.

Mageindagunhañame gürigia hámagua,

marufudahóun ligíame houn lun wuribu.

4 Haganóuba súngubei manufudeuga,

gayaraabei hemeraagun lábugiñe

tamuñadiri hanadürigu.

Lererun Wabureme Suntigabafu le!

5 Ha híbiri gürigia,

falá hamutiña ani gaganbaditiña houn habungiutegu,

ánheinti wagía Wabureme le Wabungiute wafalarubei

ani gaganbaditiwa lun súnwandan.

6,7 Lariñahare Wabureme:

«Lídanme weyu ligía,

nóundarubaña nilügüniña mudún,

ha meha nabeichubaña:

Ha adamahabaña, ha bucharuaña ani chagagu hagía.

Nadügüba aban néchani héreti hau ha erederubaña.

Au, le Aburemei, nadundehabaña numutuniña

luéigiñe wübü Sión, guentó luma súnwandan.

8 Buguya, Herusalén, liderebugu Sión,

buguyaba lichügüdina fulasu,

uburugu le wéirigutimabei Ísüraeli».

9 Kati uagu bagúaraha ítara guentó,

kei würi agaridutu?

Ladüga funagia marúeite ban?

Odi ladüga hilagua lan eweridihatibu?

10 Bagúaraha kei würi agaridutu, uburugu Sión,

ladüga háfuriduba bumutuniña bídangiñe,

ábame haganóun áraabu,

hachülürüba darí Babilónia.

Gama lumoun lesefurubaña Wabureme lumutuniña ñein;

lesefurubaña hawéi háganiñu.

11 Guentó, saragu haña néchanigu

óundaraguatiña buagun,

hariñaga: «Wagundaaruba lau

warihin lawiyedun Herusalén!»

12 Gama lumoun ibidiñeti lisaminan Wabungiute

houn néchanigu hagía;

ibidiñeti houn luagu lóundarubaña lan

kei lóundaraguagüdüniwa aban fuñein türigu

lun tasagarún türigu tídangiñe.

13 Uburugu Sión, saraba, ábürühaba luagun bágani!

Ladüga lariñahare Wabureme:

«Néredagüdübadibu kei aban wügüri bágasu

le gürabu liganchun, buronse lúbara

lun bagünrinchagun saragu gürigia.

Bagidarubei harisin le hibihubei lau marumani hawéi,

ábame bederegeruni nun,

au le Labureme sun ubóu».