1 «Gama lumoun guentó Herusalén,

aransebéi bubarieirun,

ladüga geyewaguaadibu

ani labeichúba lábuti Ísüraeli here.

2 Buguyati, Belén Éfürata,

buguya uburugu le ñǘraütimabei Hudá,

bídangiñeba láfurida lurúeite Ísüraeli

hadügawagunbei binadu iduheñu».

3 Guentó ígira lumutiña Wabureme lánigu,

gama lumoun darí tágurahan würi to agurabahabóun aban irahü.

Lárigiñeme ábame hóundaragun hama Ísüraelina ha hapaisanun

ha asagarúbaña hageiragiñe keisi adaürǘtiña.

4 Lásaaruba urúei lun lóunigiruniña lumutuniña

lau lubafu luma lau luéirigun Wabureme le Lubungiute,

ábame habagaridun darangilu

ladüga lichugúba uéiriguni lun Wabureme

darí lumoun lagumuhóun larigei ubóu.

5 Ligíaba darangilaü.

Danme hebelurun Asiriana wageiroun lau here,

belú hagíame tidoun wani palasiu,

wóunahaba sedü ábutigu

hama widü wügüriña wéirigutiña hawagun.

6 Hagumadihaba tau eféin Asiria, le lageira Nimüródu,

ábame hesefuruniwa hawéi Asiriana ha ánhiñuragunbalin fadaguaü,

belú hagía wageiroun.

7 Ítara habati Ísüraelina hame erederutiña wínwanñu

haganagua saragu gürigia

kei serenu le lóunahan Bungiu,

kei huya le ábürühabei luagun híduru.

Hámabei lídehan Bungiu mama hídehan gürigia.

8 Ítara habati Ísüraelina hame erederutiña wínwanñu

haganagua saragu néchanigu

kei aban liñún haganagua animaalugu áraabuna,

kei aban liñún haganagua mudún,

le áfaragubaliña dan le lásügürün,

mígirunga ni aban wínwanñu.

9 Ítara luba lagünrinchaguniña

Wabureme sun láganiñu.

10 Lariñahare Wabureme:

«Lídanme weyu ligía,

náfaragubaña bilügüniña gabayu,

nagünrinchaguboun burí bikarün to lánina wuribu;

11 nagünrinchagubei sun buburugute,

nágurubei sun biderebugu;

12 nagumuchuba lau burí babiñarahan

luma hau garíaahatiña;

13 nagünrinchagubaña biguariuangu luma burí dübü sagüráuti

lun máhuduragundigia ban houn búngiugu ha badüga lau búhabu.

14 Náhulaagubei tídibu burí buewen le sagüráubei,

nagünrinchagubei burí buburugute sunsuinagubei.

15 Lidan nigañi nageindaguba hama néchanigu

ha máhabaña hadügüni le nubeibei».