Arca de noé
A arca de Noé é história de salvação e fidelidade. Deus instruiu Noé a construir a arca para salvar sua família e os animais do dilúvio — exemplo supremo de obediência e fé.
Nipele Akunnungu ŵaasalile che Nuhu, "Amwiwe kwaulaga ŵandu wose pachilambo, pakuŵa ŵandu wo augumbesye utindiganyo pa chilambo pose. Ngusala isyene, chinaajonanje ŵandu wose pamo ni chilambo chose. Kwayele nlikolochesye ngalaŵa jekulungwa kwa chitela chakulimba, njiŵilanje safina. Nkatanye yuumba ni kupaka lami nkati ni pasa. Nkolosye yelei, uleu mita mia moja selasini na tano, ni wipi wakwe mita ishilini na mbili ni lisusa lyakwe mita kumi na nne. Safina jo jiŵe ni golofa sitatu ni mmiche nnango chamumbalati. Nwimbe chipagala, nipele nneche lipesa lya nusu mita sikati ja chipagala ni mwalikomele likumba lya golofa jaatatu.
Ambuje ŵasalile che Nuhu, "Njinjile mu safina mmwe pamo ni ŵandu ŵa pannango penu, pakuŵa nammweni kuti mmwe jikape ni junkuunonyelesya une, pasikati ja ŵandu wose ŵa uŵelesi wu.
Che Nuhu ni ŵankwawo ni achiŵanagwe ni achiŵankwawo ŵajinjile mu safina kuchiŵambala chikumba meesi chachikulungwa. Inyama yaili yambone paujo pa Akunnungu ni inyama yangaŵa yambone paujo pa Akunnungu ni ijuni ni yepanganyikwe yaikukwaŵa, iŵili iŵili nkambaku ni nkolo, ŵajinjile mu safina pamo ni che Nuhu mpela ila che Nuhu iŵatite pakulajiswa ni Akunnungu. Pakumala moŵa saba, meesi ga chikumba meesi chekulungwa gatandite kuchiunichila chilambo.
Inyama yose yajinjile nkambaku ni likolo mpela Akunnungu iŵatite pakwalajisya che Nuhu. Nipele Ambuje ŵammugalile che Nuhu.
Chikumba meesi chekulungwa chalonjele moŵa alobaini. Meesi gagumbele ni kujijajaŵasya safina, nombejo jaliji pachanya meesi. Meesi gapundile koonjecheka mchilambo ni safina jajajaŵele pachanya meesi.
Akunnungu ŵaijonasile yepanganyikwe yaili ni umi yose ya pachilambo, kutandilila ŵandu ni inyama ni yaikukwaŵa ni ijuni ya mwinani. Yose pachilambo yajonasikwe tipitipi. Che Nuhu pe ni juŵasigele pamo uŵaliji nawo mu safina wala.
ni meesi gajendelechele kuumilila mbolembole pachilambo. Nipele pagapite moŵa mia moja na hansini, meesi gapungwiche nnope. Pa lyuwa lya kumi na saba lya mwesi wa saba Safina jatusile mmatumbi ga Alalati.
Pagamasile moŵa alobaini, che Nuhu ŵaugwile lidilisha liŵakolosisye mu safina, ni ŵalikopwesye likunguulu paasa, nombelyo nganiliuja nambo lyagulwichegulwiche ako ni ako mpaka pagajumwile meesi pachilambo. Nipele che Nuhu ŵajikopwesye nguunda kuti alole iŵaga meesi galiji gajumilile pachilambo. Nambo pakuŵa meesi galiji gagumbele pa chilambo pose, nguunda jila jalepele kutula, jausile ku che Nuhu mu safina. Che Nuhu ŵagolwesye nkono, ŵajijigele ni kujijinjisya mu safina. Che Nuhu ŵalindilile moŵa gane saba ni kujituma ngunda kaaŵili. Jele ngunda jo jausile ku che Nuhu katema ka ligulo jili jijigele lisamba lyeŵisi lya mseituni mu lugomo. Kwayele che Nuhu ŵaimanyilile kuti meesi gapuungwiche pa chilambo. Nipele che Nuhu ŵalindilile moŵa gane saba, ŵajitumile sooni ngunda jila nambo ngunda jila nganijiuja sooni.
Che Nuhu paŵaliji ni yaka mia sita ni umo, pa lyuŵa lyaandanda lya mwesi waandanda, meesi gajumwile pachilambo. Che Nuhu ŵachityosisye chipagala cha safina ni paŵalolite, ŵaiweni kuti chilambo chejumule.
Nipele, Akunnungu ŵansalile che Nuhu, "Nkopoche mu safina, mwe ni ŵankweni, ni ŵanagwenu pamo ni achiŵankwawo. Nnyikoposye yepanganyikwe yose ya uŵeleuŵele yaili pamo ni mmwe: Ijuni yose ni inyama yose ni yepanganyikwe yose yaikukwaŵa, kuti iŵelekane nnope, ijonjesyeche ni kuchigumbasya chilambo."
Nipele Akunnungu ŵansalile che Nuhu ni achiŵanagwe, "Sambano nguŵika lilangano lyangu ni ŵanyamwe pampepe ni uŵelesi ŵenu, ni chepanganyikwe chachilichose chachili pamo ni wanyamwe: Ijuni ya mwinani ni inyama yakulangwa ni ya mmatinji, ni wose ŵaŵakopweche pamo ni ŵanyamwe mu safina. Ngulisalichisya lilangano lyangu ni ŵanyamwe kuti, ngunaaulaga yepanganyikwe yose ni chikumba meesi chekulungwa atamuno ngachityochela chikumba meesi ng’oo kuchijonanga chilambo."
Nguŵika ukunje wa ula kumaunde, ni wele chiuŵe chimanyisyo cha lilangano lyangu ni chilambo.
Kwa chikulupi, che Nuhu ŵajamwikwe ni Akunnungu nkati indu ichikopochele, yakanaiwoneche chiŵela, ŵanjitichisye Akunnungu ni kukolosya ngalaŵa jajikulungwa jajikuŵilanjikwa safina. Mwelemo nsyene pamo ni ŵandu ŵa pannango wakwe chakulupuswe. Kwa chikulupi chakwe ŵandu ŵa pa chilambo wose ŵalamulikwe kuti akwete sambi nombejo ŵaŵalanjikwe jwambone paujo pa Akunnungu.
Syelesyo sili mbumu sya ŵandu ŵakanile kwajitichisya Akunnungu kalakala, paŵalindililaga nkupililila katema che Nuhu paŵakolosyaga ngalaŵa jajikulungwa jajikuŵilanjikwa safina. Nkati mwa chelecho ŵandu kanandi pe, yaani ŵandu nane, ŵakulupwiche mmeesi. Ni meesi go gali chimanyisyo cha ubatiso waukunkulupusya sambano ji. Wele ubatiso uli ngaŵa kwa ligongo lya kutyochesya likaku lya pa chiilu, nambo nti lilangano lyaliŵichikwe kwa Akunnungu lyalikutendekwa mu ntima waukulosya kuti nganitukola sambi. Nombe ubatiso wo ukunkulupusya ŵanyamwe kwa litala lya kusyuka ku Che Yesu Kilisito, ŵajawile kwinani ni sambano atemi peuto pakuchimbichikwa kundyo kwa Akunnungu, akwalongosya achikatumetume ŵa kwinani ni achakulu ni ŵaali ni ukombole wekulungwa wa kwinani.
Pakuŵa yaitite mmoŵa ga che Nuhu, ni iyoyo ichichiŵa kwika kwa Mwana jwa Mundu. Pakuŵa gele moŵa go, chikumba meesi chachikulungwa chikanaŵe, ŵandu ŵalyaga ni kung’wa, ni ŵalombelaga ni kulombwa, mpaka lye lyuŵa lyo che Nuhu paŵajinjile mu safina. Nganamanyilila mpaka chikumba meesi pachaiche ni kwakumba wose. Ni iyoyo ichichiŵa kwika kwa Mwana jwa Mundu. Kele katema ko ŵandu ŵaŵili chachiŵa ku ngunda, jumo chachijigalikwa ni jwine kulekwa. Achakongwe ŵaŵili chachiŵa aninkusyaga, jumo chachijigalikwa ni jwine kulekwa.