1 Jwapali mundu jumo juŵaŵilanjikwe che Elikana, jwa lukosyo lwa Efulaimu, ŵatamaga musi wa ku Lama chilambo cha ikwesya cha ku Efulaimu. Mundu jo atatigwe ŵaliji che Yelohamu ambujegwe waliji che Elihu ambuje ŵa mmauja waliji che Tohu ŵantundu ŵa che Sufu. 2 Che Elikana ŵalombele achakongwe ŵaŵili, jumo ŵaŵilanjikwe che Hana ni jwaaŵili ŵaŵilanjikwe che Penina. Che Penina ŵaŵeleche ŵanache nambo che Hana nganaŵeleka. 3 Kila chaka che Elikana ŵajesile ulendo kutyochela ku Lama kwaula ku Shilo kukwapopelela Ambuje Akunnungu ni kwapelechela mbopesi. Achachanda ŵaŵili ŵa che Eli, che Hofini ni che Finehasi, ŵaliji ŵambopesi ŵa Akunnungu kweleko. 4 Katema kose che Elikana piŵapelekaga mbopesi syakwe sya kutinisya, ŵangaŵilaga che Penina ŵankwakwe liunjili limo lya nyama jo, ni achiŵanagwe achalume ni achakongwe kila mundu liunjili limo. 5 Nambo che Elikana ŵampaga che Hana maunjili gaŵili gambone nnope ligongo ŵannonyele kwannope nachiŵamuno Ambuje Akunnungu ŵantesile aŵe jwangaŵeleka. 6 Ligongo lyakuti Ambuje Akunnungu nganiŵapa che Hana kuŵeleka mwanache, che Penina ŵannyosyaga kwannope che Hana, mwakwichila kwatumbilisya. 7 Yeleyo yatendekaga chaka ni chaka. Ndaŵi syosepe paŵajaulaga ku nyuumba ja Akunnungu che Penina ŵantumbilisyaga che Hana mpaka kutanda kulila ni kukana kulya chilichose. 8 Che Elikana ŵankwakwe ŵammusyaga, "Che Hana ligongo chichi nkulila? Ligongo chichi nkukana kulya? kwachichi nkulilasika mu ntima? Ana une nganima jwambone nnope kukwenu kupunda ŵanache likumi ŵachilume?"

9 Pa lyuŵa limo ali amasile kulya ni kung'wa pa nyuumba ja Ambuje Akunnungu kwele ku Shilo ko, che Hana ŵajimi. Kele katema ko jwambopesi che Eli ŵatemi pa chitengu pambali ni nnango wa nyuumba ja Ambuje Akunnungu. 10 Nombe che Hana ŵalilasiche kwannope. Ni katema kaŵaliji nkwapopelela Ambuje Akunnungu ŵaliji nkulila kwaligogo. 11 Ni ŵataŵile nasili achitiji, "Alakwe Ambuje Akunnungu jwa machili, iŵaga tingalolechesye masauko gangu une jwakutumichila jwenu ni kuungumbuchila une, pangaandiŵalila, une jwakutumichila jwenu, mwambaga une jwakutumichila jwenu mwanache jwannume, tinjimpa alakwe Ambuje Akunnungu mwanache jo aŵe jwenu mu umi wakwe wose. Ngaamyolekwa mu ntwe mwakwe ng'o."

12 Che Hana ŵajendelechele kwapopelela Ambuje Akunnungu, ni jwambopesi che Eli ŵaliji nkulolechesya kukang'wa kwakwe. 13 Che Hana ŵapopelaga chikatikati, kang'wa jakwe jatenganyikaga mwangakoposya maloŵe. Kwayele che Eli ŵaganisisye kuti akolelwe. 14 Nipele che Eli ŵatite, "Ana tinjendelechele kukolelwa mpaka chakachi? Nneche kung'wa Divai." 15 Che Hana ŵajanjile, "Ngaŵa yeleyo ambuje ŵangu, une ndili jwankongwe jungulilasika kwannope. Uneji nganing'wa divai pane nkologo uliwose, nambo naliji mkwasalila Ambuje Akunnungu yaili mu ntima mwangu. 16 Nkaang'anichisya une kuti ndili jwankongwe jwawamba. Ndaŵi josepe ji ndili nkupolela apano kwa kulilasika ni ligogo." 17 Nipele che Eli ŵansalile, "Mmuje kumusi pangali lipamba. Nombe Akunnungu ŵa ku Isilaeli ampe achila chimmendile." 18 Che Hana ŵatite, "Ngummenda une jwakutumichila jwenu mung'anichisyeje yambone." Che Hana ŵatyosile, ŵajawile kulya chakulya, ni nganawoneka sooni kuŵa jwakulilasika.

19 Nipele kundaŵi kwakwe che Elikana ni ŵamu nyuumba jakwe ŵajimwiche kundaŵindaŵipe, pakumala kwapopelela Ambuje Akunnungu ŵausile kumangwawo, kwele ku Lama ko. Che Elikana waonegene ni che Hana ŵankwakwe, nombe Ambuje Akunnungu ŵajanjile mapopelo gakwe. 20 Pelepo che Hana wakwete chitumbo, ŵaligopwele mwanache jwannume, ŵammilasile liina lyakwe Samweli, achitiji, "Napopelele Ambuje Akunnungu."

21 Chaka chichakuiye Che Elikana ni ŵamu nyuumba jakwe ŵapite sooni ku Shilo ni kwapelechela Ambuje Akunnungu mbopesi sya chaka ni chaka ni kugopola nasili syawo. 22 Au ulendo wu che Hana nganajaula, ŵansalile ŵankwakwe kuti, "mwanache ju pitaleche konga tinjijaula najo kuti ngampeleche paujo pa Ambuje Akunnungu, akatameje kweleko umi wakwe wosepe." 23 Che Elikana ŵankwakwe ŵansalile, "Ntendeje inkwiwona ili yambone. Nlindilileje mpaka pachimunnekasye konga mwanache jo. Ambuje Akunnungu ankamuchisye kuti nasili jenu jitendeche." Nipele che Hana ŵasigalile panyuumba, ŵajendelechele kunnela mwanache jwao mpaka paŵannekasisye konga.

24 Pakaiche katema ka mwanache jo kunnekasya konga ŵanjigele ni kunjausya ku nyuumba ja Ambuje Akunnungu ku Shilo pamo ni ng'ombe jankambako ja yaka itatu, mbisi sita sya utandi ni nsaku wa lipende wetaje divai. Che Hana ŵampeleche mwanache jo pa nyuumba ja Ambuje Akunnungu ali mwanache jwannandi. 25 Paŵamasile kusikita ng'ombe jankambaku jila, ŵanjawisye samweli kwa jwambopesi che Eli. 26 Che Hana ŵansalile che Eli "choonde ambuje ŵangu, mpela inkuti kutama, une ndili jwankongwe ajula jumwamweni ndili nyiimi paujo penu kwapopelela Ambuje Akunnungu. 27 Napopesile kuti ambe mwanache ju, nombewo ambele chinaaŵendile cho. 28 Kwa ligongo lyo uneji ngwapa Ambuje Akunnungu mwanache ju, katema kose pachaŵe jwanjumi, aŵichikwe pajika kwaligongo lya Ambuje Akunnungu."