1 Samuel 27

Che Daudi akutama ni Ŵafilisiti

1 Che Daudi ŵalisalile muntima mwakwe, "Palyuŵa limo che Sauli tachiimulaga. Mmbaya kukwangu mutuchile ku chilambo cha Ŵafilisiti. Che Sauli tachileka kuusosa pa Isilaeli, ni une chime salama ngamulaga." 2 Kwayele, papopo che Daudi ni ŵandu ŵakwe mia sita ŵajawile ku Gati kwa mwenye che Akishi mwanagwe che Maoki. 3 Che Daudi ni ŵandu ŵakwe pamo ni ulongo wakwe ŵajile kutama ni che Akishi kwele ku Gati ko. Che Daudi ŵakwete achakongwe ŵaŵili: Che Ahinoamu jwakutyochela ku Yesileeli ni che Abigaili jwa ku Kalimeli, jwankongwe jwawililwe ni ŵankwakwe che Nabali. 4 Che Sauli paŵapilikene kuti che Daudi autuchile ku Gati, ŵalesile kwasosa.

5 Lyuŵa limo che Daudi ŵansalile che Akishi, "Iŵaga ngundikwe paujo penu ngunchondelela mumbe musi umo mu chilambo chenu kuti uŵe pamalo pangu pakutama. Ngaŵa yambone une jwakutumichila jwenu kutama apano pamo ni mmwe mu musi wa chimwenye wu." 6 Lyuŵa lyo, che Akishi ŵampele che Daudi musi wa ku Sikilagi. Kwayele, kutandilila lyuŵa lyo musi wa ku Sikilagi uŵele wao mamwenye ŵa ku Yuda.

7 Che Daudi ŵatemi ku chilambo cha Ŵafilisiti kwa chaka ni miesi ncheche. 8 Pa moŵa go che Daudi ni ŵandu ŵakwe ŵaagungumuchile Ŵageshuli, ni Ŵagilisi ni Ŵaamaleki ŵaŵaliji achinsyene chilambo cho kalakala nnope. Malo jao jajenele kutandilila ku Telemu kulili litala lyalikwaula ku Shuli, mpaka mu mpika mwa chilambo cha ku Misili. 9 Che Daudi ŵaauleje ŵandu ŵa chilambo cho, panganneka jwanjumi namose mundu jumo, aŵeje jwannume pane jwankongwe, ŵajigele ngondolo ni ng'ombe ni mbunda ni ngamia ni yakuwala. Nipele ŵausile ni kwika ku che Akishi. 10 Che Akishi paŵammusisye che Daudi kuti, "Ana lelo mwajile kukumenya ngondo ni ŵani?" Che Daudi ŵansalile, "Twajile kukumenyana ni ŵandu ŵa ku Negebu ja ku Yuda" pane "Ŵandu ŵa ku Negebu ja ku Yelameeli" pane "Ŵandu ŵa ku Negebu ja Ŵakeni." 11 Che Daudi ŵauleje ŵandu wosepe, ngananneka jwanjumi mundu jwajulijose aŵeje jwannume pane jwankongwe kuti akapagwa mundu jwakwika ku Gati, ŵaganisisye kuti: Akukombolanga kwamanyisya ngani syetu achitiji, "Yeleyi ni indu yaakuitenda che Daudi ni ŵandu ŵakwe." Yeleyi ni iŵatesile che Daudi pa ndaŵi syosepe siŵatemi ku chilambo cha Ŵafilisiti. 12 Kwayele, che Akishi ŵankulupilile che Daudi, achiganisyaga kuti, "Ŵaisilaeli achinjakwe akunchima kwannope. Kwayele, tachindumichila pa umi wangu wose."

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?