1 Pakumala yeleyo, che Daudi ŵatyosile ku Gati ko, ŵatolochele ku mbugu chiŵandi ni musi wa ku Adulamu. Achachimwene ŵakwe ni achalongo ŵakwe ŵane paŵamanyilile pamalo paalijuŵile, wose ŵajawile kukwalimbisya ntima. 2 Ŵandu wose ŵaŵaliŵatilwaga pane juŵalionaga kuti che Daudi ŵaapanganyichisye indu yambone, pane aŵala ŵangananonyelwa ni utawala wa che Sauli, ŵalumbikene ni che Daudi. Ŵandu wose ŵaliji nti ŵandu mia nne, nombe che Daudi ŵaalongwesye.

3 Kutyochela kweleko, che Daudi ŵajawile mpaka ku Misipa chilambo cha ku Moabu. Ni ŵansalile mwenye jwa ku Moabu, "Ngummenda, atati ŵangu ni achikulu ŵangu aiche atameje apano kukwenu mpaka patimanyilile itachindendela Akunnungu." 4 Nipele che Daudi ŵaalesile achaŵelesi ŵakwe atame ni mwenye jwa ku Moabu. Nipele ŵatemi kweleko moŵa gose che Daudi paŵaliji nkulijuŵa mu mbungu mula. 5 Nipele jwakulondola liina lyakwe che Gadi ŵansalile che Daudi, "Nkatama akuno, ntyoche kwakwanguya njaule ku chilambo cha ku Yuda." Nipele che Daudi ŵatyosile, ŵajawile mu litinji lyalikuŵilanjikwa Heleti.

6 Pa lyuŵa limo che Sauli ŵaliji ku Gibea, ali atemi paasi pa chitela cha ukwesu, chichamesile pachikwesya ali ajigele mpamba mmakono ni ŵakutumichila ŵakwe ŵaliji ajimi pambali pakwe. Nipele ŵasalile kuti che Daudi ni ŵandu ŵakwe awoneche. 7 Nombe che Sauli ŵaasalile ŵakutumichila ŵakwe, "Sambano mwanya lukosyo lwa Benjamini mumbilikanile, uli nkuganisya kuti aju che Daudi mwanagwe che Yese tachimpa kila mundu migunda ni migunda ja misabibu? Pane uli nkuganisya kuti tachintenda kila mundu kuŵa jwankulu jwa mpingo wa ŵangondo elufumoja pane jwankulu jwa mpingo wa ŵangondo mia moja? 8 Ana lyeleli nganiliŵa ligongo lya ŵanyamwe ŵanawose kundaŵila malindi gakusaka kundyosya umwenye? Ngapagwa namose jumo jwenu juŵandanjile kuti chakachi mwanangu ŵatesile chilanga ni mwanache jwa che Yese. Nganapagwa namose jumo jwenu jwakulichenjeusya ni une atamuno kuusalila kuti mwanangu ni jwakunlimbisya ntima jwakutumichila jwangu kuti anyuŵilile kuti amulaje, mpela mwakutendela lelojino." 9 Pelepo che Daegi, jwa lukosyo lwa Ŵaedomu juŵajimi chiŵandi ni achakulu ŵangondo ŵa che Sauli ŵatite "Nammweni che Daudi mwanagwe che Yese achiikaga ku Nobu kwa jwambopesi che Ahimeleki mwanagwe che Ahitubu. 10 Che Ahimeleki Ŵausisye Ambuje Akunnungu kwaligongo li che Daudi, ni sooni ŵampele yakula ni alila lipanga lya Goliati, Mfilisiti jula."

11 Mwenye che Sauli ŵalajisye kuti jwambopesi che Ahimeleki mwanagwe che Ahitubu pamo ni ŵandu wose ŵapaulongo wa atatigwe ŵaŵaliji ŵambopesi ku Nobu ko aŵilanjikwe. Ŵanawose ŵaiche kwa mwenye che Sauli. 12 Che Sauli ŵatite, "Sambano mpilikane mmwe mwanagwe che Ahitubu." Che Ahimeleki ŵajanjile, "Elo ambuje jwangu." 13 Che Sauli ŵansalile, "Ligongo chichi mmwe ni che Daudi mwanagwe che Yese, ntesile malindi ga kuung'alauka kuti muundyosye pa chitengu cha umwenye? Kwachichi mumpele mikate ni lipanga, nombe mummendele kwa Akunnungu? Kwaligongo lyo, ang'alawiche ni akuunyuŵilila kuti amulaje mpela mwakutendela lelojno."

14 Che Ahimeleki ŵajanjile, "Pasikati ja ŵakutumichila ŵenu, che Daudi ali jwakutumichila jwakukulupilichika kupunda ŵanawose. Ŵelewo ali akwegwenu mwasyene alakwe mwenye, ni ali jwankulu jwa Ŵakulindilila ŵenu mwasyene ni sooni akuchimbichikwa kupunda ŵanawose munyuumba jenu. 15 Lelo ngaŵa kaandanda kwa uneji kwausya Akunnungu chindu kwaligongo lyakwe. Mwenye, nkaang'anichisya yangalumbana une atamuno mundu jwine jwalijose mu ulongo wa atati ŵangu. Une jwakutumichila jwenu, nganguchimanyilila chilichose, chiŵeje chekulungwa atamuno chamwanamwana nkati kuntyosya mmwe kuti nkaŵa mwenye."

16 Nambo mwenye che Sauli ŵansalile, "Che Ahimeleki, kusyene timmulajikwe, mmwe ni ŵapaulongo wose wa atati ŵenu." 17 Che Sauli ŵaasalile ŵakulindilila ŵaŵajimi pambali pakwe, "Ngalauche ni kwaulaga ŵambopesi ŵa Ambuje Akunnungu, pakuŵapo ali upaande wa che Daudi. Ŵaimanyilile kuti che Daudi atuutwiche ni nganaasalila." Nambo ŵakulindilila wo ngananyakula makono gao kuti ŵaaulaje ŵambopesi ŵa Ambuje Akunnungu. 18 Kwayele, mwenye che Sauli ŵansalile che Daegi, "Ngalauche mmwejo mwaulaje ŵambopesi." Pelepo che Daegi jwa lukosyo lwa Ŵaedomu ŵagalawiche ni kwaulaga ŵambopesi wose. Palyuŵa lyo, che Daegi ŵauleje ŵambopesi semanini na tano ŵakuwala isibao ya chimbopesi ya nguo jeswela mbee. 19 Sooni ŵauleje ni lipanga ŵandu wose ŵakutama ku Nobu, musi wa ŵambopesi achalume ni achakongwe, ni ŵanache achanandi ni ŵakonga, ni ng'ombe ni mbunda ni ngondolo. 20 Nambo che Abiasali, jumo jwa ŵanache ŵachilume ŵa che Ahimeleki, mwanagwe che Ahitubu, ŵakulupwiche, ni kuutuka nipele ŵalumbikene ni che Daudi. 21 Che Abiasali ŵansalile che Daudi kuti che Sauli ŵaauleje ŵambopesi ŵa Ambuje Akunnungu. 22 Nombe che Daudi ŵansalile che Abiasali kuti, "Naimanyilile palyuŵa lila panammweni che Daegi jwa lukosyo lwa Ŵaedomu, kuti tachinsalila che Sauli. Kwayele, uneji ni junalemwesye chiwa cha ŵandu ŵa paulongo wa atati ŵenu. 23 Mmwe, ntame pamo ni une, nkajogopa. Pakuŵapo che Sauli jwakusaka kuumulaga une ni jujojo jwakusaka kummulaga mmwe. Mwaŵaga pamo ni une, yangalumbana yo ngainnyichilila."