1 Achalume ŵampepe kutyochela musi wa ku Sifu ŵanjaulile che Sauli kwele ku Gibea ko ni kunsalila kuti che Daudi akulisisa ku litumbi lya Hakila, upaande wa kungopochelo lyuŵa kwa Yeshimoni. 2 Papopo, che Sauli ŵatulwiche ŵapite ku chipululu cha sifu ali ni ŵangondo ŵakulimbangana ŵa ku Isilaeli elufu tatu, kukunsosa che Daudi. 3 Che Sauli ŵaŵisile chigono mungulugulu litala pachanya chikwesya cha Hakila chachikulolegana ni musi wa Yeshimoni, nambo che Daudi ŵaliji nkutama kwele kuchipululu ko. Paŵaiweni kuti che Sauli aiche kukunsosa, 4 ŵatumile ŵakulolesya, ni ŵasalilwe kuti "ili isyene che Sauli aiche". 5 Pelepo che Daudi ŵatyosile ŵajawile mpaka peuto paŵaŵisile che Sauli chigono. Ŵapaweni peuto pati che Sauli ni che Abuneli mwanagwe che Neli, jwankulu jwa ŵangondo ŵa che Sauli agonile. Che Sauli ŵaliji agonile mu chigono ni ŵangondo ŵaliji ŵaasyungwile.

6 Che Daudi ŵaausisye che Ahimeleki juŵaliji Mhiti ni che Abishai mpwakwe che Yoabu, achikuluŵawo ŵaŵilanjikwe che Seluya, kuti, "Nduni jutajaule pamo ni une kuchigono chi che Sauli?"

Che Abishai ŵajanjile, "Uneji tinyaule pamo nomwe."

7 Kwayele, chilo che Daudi ni che Abishai ŵajinjile mu chigono chi che Sauli, ŵansimene che Sauli ali agonile pasikati ja chigono cho, ni mpamba wakwe uli wetotomeche pasi chiŵandi ni ntwe wakwe. Che Abuneli ni ŵangondo ŵaliji agonile kwasyungula che Sauli. 8 Che Abishai ŵansalile che Daudi, "Lelo Akunnungu ampele lipesa lyakummulaga jwammagongo jwenu. Nipele muuneche naasome mpaka paasi kwa chiputiko chimo cha mpamba wangu, nganansoma kaŵili."

9 Nambo che Daudi ŵansalile che Abishai kuti, "Nkammulaga, pakuŵa kusyene Ambuje Akunnungu tachinjamuka mundu jwajulijose jutaugolosye nkono wakwe pa jwasagulikwe kwakwajitilila mauta." 10 Che Daudi wajendelechele kuwecheta kuti, "Mpela Ambuje Akunnungu yatite kuŵa ŵajumi, kuti Ambuje Akunnungu nsyene tachimmulaga che Sauli, pane pa lyuŵa lya chiwa chakwe tilichiika, pane tachijaula kungondo ni kuwilila kukoko. 11 Nambo Ambuje Akunnungu akunganya ngasing'olosya nkono wangu kummulaga mundu jwansagwile kwakunjitilila mauta. Nambo njigale mpamba wakwe pamo ni chitumba chakwe cha mesi yauli chiŵandi ni ntwe wakwe, nipele tujaule." 12 Nipele che Daudi ŵaujigele mpamba ula ni chitumba cha meesi chiŵandi ni ntwe u che Sauli ni wose ŵatyosile. Nambo ngapagwa juwaiweni namose juwaimanyilile atamuno juŵajimwiche, pakuŵa Ambuje Akunnungu ŵaaichisye lugono lwakutopela.

13 Nipele, che Daudi ŵajawile upaande ŵaaŵili wa lichemba lyo, ŵajimi pachanya chitumbi kwakutalichila nnope ni mpingo wa che Sauli. 14 Che Daudi ŵaaŵilasile ŵangondo ŵa che Sauli ni che Abuneli mwanagwe che Neli achitiji, "Che Abuneli, ana nkuumbikana?"

Che Abuneli ŵausisye, "Ana nduni mmwe junkummilanga mwenye?"

15 Che Daudi ŵajanjile, "Uli, mmwe nli jwannume? Ana nduni jwali mpela mmwe mu Isilaeli? kwachichi nganimunlindilila mbuje gwenu, jwali mwenye? Pakuwa mundu jumo pasikati jetu ŵajinjile pelepo kuti ammulaje mbuje gwenujo. 16 Chindu chintesile ngachilumbana. Ngulumbila kwa Ambuje Akunnungu ŵajumi, kuti mwe ni wandu ŵenu nkusachilwa kuulajikwa, pakuŵapo nganimunlindilila mbuje gwenu, jwati Ambuje Akunnungu anjitilile mauta. Sambano nnole, mpamba wa mwenye ni chitumba cha meesi chichaliji chiŵandi ni ntwe wakwe iŵaga ipali!" 17 Che Sauli ŵalimanyilile liloŵe li che Daudi, ni ŵausisye, "Uli, lyelelyo lili liloŵe lywa mwanangu che Daudi?" Che Daudi ŵajanjile, "Ambuje ŵangu, mwenye, ndili une che Daudi." 18 Ni ŵajendelechele kuŵecheta kuti, "Nambo kwachichi alakwe ambuje jwangu nkuunguilisya une jwakutumichila jwenu? Ana ndesile ichichi? Ana chigongomalo chantiuli chinantesile? 19 Nipele, sambano ambuje jwangu mwenye, mpilikane maloŵe ga jwakutumichila jwenu. Iŵaga Ambuje Akunnungu ni jwangalawisye mmwe kuti mme wammagongo wangu, nipele apochele mbopesi sya kutinisya syasisyatendekasye agalausye nningwa wakwe. Nambo iŵaga ali ŵandu, nipele wandu wo alwesekwe paujo pa Ambuje Akunnungu pakuŵa andopwele une kutyochela pamalo patupele Ambuje Akunnungu kuti paŵe petu, achitiji, ‘Njaule nkajitumichile minungu jine.’ 20 Nkaaneka mwilile ku chilambo chachilendo, kwakutalika ni pawele Ambuje Akunnungu. Ligongo chichi alakwe mwenye jwa ku Isilaeli ntyosile kukuusosa umi wangu mpela mundu jwakusakula ngwale kumatumbi?"

21 Nipele che Sauli ŵatite, "Ndesile sambi. Mmuje che Daudi mwanangu. Ngandandila sooni kulinga kumbulaga ligongo muukulupwisye umi wangu lelo. Uneji mele jwakuloŵela ni sooni neeŵile kwannope." 22 Che Daudi ŵajanjile, "Alakwe mwenye, mpaamba wenu uli apano, muntume jwanchanda jwenu aiche kukujigala. 23 Ambuje Akunnungu akumpa ntuuka kila mundu jwali jwakukulupilichika ni jwakutenda indu yakuisaka. Lelo Ambuje Akunnungu ŵambele lipesa lyakummulaga, nambo uneji nganigolosya nkono wangu kuti nammulaje mmwejo nsagulikwe ni Ambuje Akunnungu kwa kunjitilila mauta. 24 Nnole, mpela yandite kuulola umi wenu kuŵa wandalama leo jino, nombe Ambuje Akunnungu aulole umi wangu kuŵa wandalama ni kuungulupusya kutyochela mu malagasyo gose."

25 Nipele che Sauli ŵansalile che Daudi, "Akunnungu ampe upile mwanangu che Daudi. Tinchitenda indu yekulungwa, ni indu yenu tiinjindele yambone mu yosepe."

Nipele che Daudi ŵatyosile, che Sauli nombe ŵausile kumangwakwe.