1 Pelepo che Samweli ŵajigele kachuupa kamauta ni kwajitilila che Sauli muntwe, pelepo ŵankumbatile ni kunsalila, "Ambuje Akunnungu anjitilile mauta kuti mme wakutawala pa ŵandu ŵenu wali muchilambo chenu. 2 Lelo patintyoche apano tinsimane ni ŵandu ŵaŵili chiŵandika ni lilembe lya che Laheli kwele ku Selisa ku mpika wa chilambo cha Benjamini. Tachinsalila kuti mbunda simwasosaga sila siwoneche. Atati ŵenu alesile kuganisya ya mbunda sano ali ni lipamba lya mmwejo. Kila katema ali nkuliusya, ‘Chinampate chinauli mwanangu?’ 3 Mwatyokaga pelepo njaule kwachili chitela chachikulungwa mwaloni chachili ku Taboli, kuchinkasimane ni achalume ŵatatu, ali nkwaula kupeleka mbopesi kwa Akunnungu ku Beseli ko. Jumo tachiŵa ali nkusilongosya mbusi sitatu syamwanamwana ni jwaaŵili ajigele mikate jitatu, ni jwaatatu jo tachiŵa ali ajigele msaku wa lipende wauli ni divai. 4 Tachinkomasya ni kumpa mikate jiŵili, mmwejo nkapochele mikate jo. 5 Nipele patinkaiche kwele ku Gibea ja Akunnungu, pelepo paali ni chigono cha ŵangondo ŵa Chifilisi, pele patinkaŵandichile musi, tinkasimane mpingo wa ŵakulondola ŵa Akunnungu, ali nkutyoka ku malo gakupelechela mbopesi ku chitumbi ko ali nkuputa inanda ni tugoma twamwana ni ing'wenyeng'wenye ni itolilo, akuno ali nkulondola. 6 Mbumu jwa Ambuje Akunnungu tachintuluchila kwa machili, nomwe wakwe tinchitanda kulondola pamo nawo, ni tinchigalauswa ni kuŵa mpela mundu jwine. 7 Pelepo imanyisyo yo patinnyiwone, ntende chilichose chitanlongosye Akunnungu kuti nchitende, pakuŵa Akunnungu ali pamo ni mmwe. 8 Nnongolele kwaula ku musi wa ku Giligali, kutinansimane ni kutyosya mbopesi syakutinisya ni mbopesi syachitendewele. Nkaalindilile kweleko kwa moŵa saba mpaka pachiiche kunnosya chakupanganya."

9 Che Sauli paŵagalawiche kuti alekangane ni che Samweli Akunnungu ŵaugalawisye ntima wa che Sauli kuŵa wine. Imanyisyo yosepe ila yatendekwe lyuŵa lila. 10 Che Sauli ni jwakutumichila jwakwe paŵaiche ku Gibea ko, ŵachingamilwe ni mpingo wekulungwa wa ŵakulondola. Mbumu jwa Akunnungu ŵanjinjile kwa machili ni che Sauli ŵatandite kulondola pamo ni ŵakulondola ŵala. 11 Ŵandu ŵaŵammanyililaga kalakala, paŵammweni ali nkulondola pamo ni ŵakulondola ŵatandite kuusyana, "Ana chinsimene ichichi mwanagwe che Kishi? Uli che Sauli nombe ali jumo jwa ŵakulondola?" 12 Mundu jumpepe juŵatamaga kukoko ŵajanjile, "Uli achatati ŵao ali ŵani?" Nipele kwaliji ni chiŵecheto chachikuti, "Ana che Sauli nombe ali mu mpingo wa ŵakulondola?" 13 Che Sauli paŵamasile kulondola, ŵakwesile kwaula pamalo pa kupeleka mbopesi ku chitumbi.

14 Atatigwe ŵanandi paŵaweni che Sauli ni jwakutumichila jwakwe, ŵausisye, "Ana mwaliji kwapi?"

Che Sauli ŵajanjile "Twapite kukusosa mbunda, ni patwaiweni kuti ngasikuwoneka, twapite ku che Samweli kukwausya." 15 Atatigwe ŵanandi ŵala ŵansalile, "Choonde muusalile chansalile che Samweli." 16 Che Sauli ŵajanjile, "Ŵatusalile kuti mbunda siwoneche." Nambo che Sauli nganaasalila atatigwe ŵanandi jula kuti che Samweli ŵaasalile kuti tachiŵa mwenye.

17 Che Samweli ŵaaŵilasile ŵandu wose asongangane paujo pa Ambuje Akunnungu ku Misipa ko. 18 Paŵasongangene ŵaasalile, "Ambuje Akunnungu, Akunnungu jwa ku Isilaeli akuti nnyi: Naawombwele Ŵaisilaeli ku chilambo cha ku Misili, nankopwesye mwanya mmakono mwa Ŵamisili ni mwenye sine sisyanliŵatilaga. 19 Nambo lelo jino muunganile une Akunnungu ŵenu jungunkulupusya mu imbulunga ni masausyo. Ni ŵanyamwe ntite, ‘Ngwamba! Ntujimichisye mwenye juchatutawale.’ Sambano nlisonganye ŵanawose mmbujo mwa Ambuje Akunnungu nli mu ngosyo syenu ni mitundu jenu." 20 Nipele che Samweli paŵasiichisye ngosyo syose sya ku Isilaeli chiŵandi nawo, ni Ambuje Akunnungu ŵalusagwile lukosyo lwa Benjamini. 21 Ŵaaiche nawo mmbujo ŵandu ŵa lukosyo lwa Benjamini, malinga ni ntundu ni ntundu, ni ntundu wa che Matili wasagulikwe. Kumbesi che Sauli mwana ju che Kishi ŵasagulikwe kwa kutenda gudugudu. Nambo paŵansosile nganawoneka. 22 Ŵammusisye Ambuje Akunnungu sooni, "Uli jwele mundu jo aiche apano?"

Ambuje Akunnungu ŵajanjile, "Elo, alisisile pa misigo." 23 Nipele ŵautuchile kunjigala, ŵankopwesye ni kunnyikanawo. Che Sauli paŵajimi pasikati ja ŵandu ŵaliji alewipe kwapunda ŵandu wose, ŵanawose ŵampelelaga mmakoyo. 24 Che Samweli ŵaasalile ŵandu wose, "Jweleju ni mundu jwasagulikwe ni Ambuje Akunnungu, ngapagwa julijose jwali mpela jweleju pasikati ja ŵandu wose."

Ŵandu wose ŵanyanyisye achitiji, "Akole umi weleu mwenye."

25 Nipele che Samweli ŵaasalile ŵandu nkati ulamusi ni indu yaakusachilwa mwenye kuipanganya, ni ŵalembile mu chitabu chiŵachiŵisile paujo pa Ambuje Akunnungu. Nipele che Samweli ŵaalanjile ŵandu wose, kila mundu ajaule kumangwakwe. 26 Nipele che Sauli ŵajawile kumangwakwe ku Gibea, pamo ni ŵandu ŵaali ni machili ŵati Akunnungu ŵaalongwesye kutenda yeleyo. 27 Nambo ŵandu ŵane ŵakulaŵalaŵa ŵatite, "Uli, jwele mundu ju chakombole chinauli kutukulupusya?" Ŵannyelwisye che Sauli ni nganampanga ntuuka uliwose. Nambo nsyene ŵatemi jii.