1 Ŵafilisiti paŵalijigele lisanduku lya lilangano lya Ambuje Akunnungu, ŵalinyakwile kutyochela ku Ebeneseli mpaka ku musi wao wa ku Ashidodi. 2 Nipele ŵalijinjisye lisanduku lya lilangano lya Ambuje Akunnungu mu nyuumba ja chinyago cha nnungu jwao jwakuŵilanjikwa Dagoni, ni kuliŵika pambali ni nnungu Dagoni jo. 3 Kundaŵi kwakwe ŵandu ŵa ku Ashidodi ali ajimwiche ŵachiweni chinyago cha Dagoni chili chigwile manguku paasi paujo pa lisanduku lya lilangano lya Ambuje Akunnungu. Ŵachijimiche sooni chinyago cho ni kuchiŵika sooni peuto pakwe. 4 Nambo kundaŵi kwakwe paŵajimwiche ŵachiweni chinyago cha Dagoni chigwile sooni manguku paujo pa lisanduku lya lilangano lya Ambuje Akunnungu, ntwe ni makono, yanayose itemangwiche, ni kugwila cha pannango. Chilu pe cha chinyago cha Dagoni cho ni chichasigele. 5 Lyelelyo ni ligongo ŵambopesi ŵa Dagoni ni ŵandu wosepe ŵakwinjila mu nyuumba ja Dagoni kwapopelela ngakuliŵata felemu ja paasi ja pannango wa nyuumba ja Dagoni mpaka lelo.

6 Ambuje Akunnungu ŵaajamwiche mwachikali ŵandu ŵa ku Ashidodi ni misinda jose jijaŵandichile nawo, ŵaichisye uwonasi ni kwalagasya ni yakwimbila. 7 Ŵandu ŵakutama ku Ashidodi paŵaiwe yele indu yo ŵatite, "Akunnungu jwa Ŵaisilaeli akutujamuka kwachikali uweji pamo ni nnungu jwetu Dagoni. Lisanduku lya lilangano lya Ambuje Akunnungu ngaikukomboleka kutama kukwetu." 8 Ŵaalajisye ŵantenga ni kwaŵilanga ilongola ŵa Ŵafilisiti ni kwausya, "Ana tutende nawo ichichi lisanduku lya lilangano lya Ambuje Akunnungu ŵa Ŵaisilaeli?" Nombewo ŵajanjile "Lisanduku lya lilangano nlijausye kwele ku Gati." Nipele ŵalijawisye ku musi wa Gati. 9 Nambo paŵalijawisye lisanduku lya lilangano lyo kwele ku Gati ko Ambuje Akunnungu ŵaujamwiche musi wo, ŵaatasile lipamba lyakogoya ŵandu ŵa musi wo, ŵaalagasisye ŵandu ŵa wele musi wo, achachanda ni achakulungwa, yaajinjile yakwimbila. 10 Kwayele ŵalijawisye lisanduku lya lilangano lya Ambuje Akunnungu lyo ku musi wa ku Ekiloni. Nambo lisanduku lya lilangano lya Ambuje Akunnungu lyo palyaiche kweleko, ŵandu ŵa musi wo ŵalisile achitiji, "Atuichisye lisanduku lya lilangano lya Ambuje Akunnungu ŵa Ŵaisilaeli kuti atuulaje uwe ni ŵandu ŵetu." 11 Nipele ŵaatumile ŵantenga ni kwasonganya sooni ilongola ŵa Ŵafilisiti ni kwasalila, "Nliusye lisanduku lya lilangano lya Ambuje Akunnungu jwa Ŵaisilaeli mu chilambo chakwe, nangaŵaga yeleyo tilituulaje uweji pamo ni ŵandu ŵetu." Ŵatesile yeleyo ligongo Akunnungu ŵaliji nkwajamuka ŵandu kwa chikali, ni ŵajinji ŵao ŵaliji awile, kwayele ŵandu ŵaliji ni lipamba lyekulungwa. 12 Nombe aŵala ŵanganajasika yaasime yakwimbila, ni ililo yao yaiche mpaka kwinani.