1 Pa moŵa go nchanda che Samweli paŵaliji nkwatumichila Ambuje Akunnungu ali mkwimililwa ni che Eli, Ambuje Akunnungu ŵakungulwiche ni ŵandu kwakwapikanisya liloŵe ngaŵa kakajinji, ni nganiŵaasagamisya sagamisi gagajinji. 2 Pa lyuŵa limo chilo, che Eli juŵaliji ngakulola yambone ŵaliji agonile mu chuumba mwakwe. 3 Che Samweli nombe ŵaliji agonile pa Nyuumba ja Akunnungu chiŵandika ni lisanduku lya lilangano lya Akunnungu. Lumuli lwa Ambuje Akunnungu lwaliji luchikolelaga. 4 Pelepo Ambuje Akunnungu ŵammilasile che Samweli. Nombejo ŵajitiche "Une apano!" 5 Nipele che Samweli ŵautuchile ku che Eli, ni ŵatite, "Iiche, ngati mumilasileje." Nambo che Eli ŵajanjile achitiji, "Uneji nganinammilanga. Njaule nkagone." Che Samweli ŵausile kukugona.

6 Ambuje Akunnungu ŵammilasile sooni, "Che Samweli!" Che Samweli ŵajimwiche, ŵajawile sooni kwa che Eli ni kwasalila, "Iiche, ngati mumilasileje."

Nambo che Eli ŵajanjile, "Mwanangu uneji nganinammilanga, njaule nkagone." 7 Che Samweli ŵaliji ngaanaŵe kwamanyilila Ambuje Akunnungu, ni utenga wa Akunnungu waliji nguunawe kuunukulikwa kukwakwe. 8 Ambuje Akunnungu ŵammilasile che Samweli kaatatu. Che Samweli ŵajimwiche, ŵanjaulile che Eli ni kwasalila, "Iiche, ngati mumilasileje." Pelepo che Eli ŵaimanyilile kuti Ambuje Akunnungu ni ŵaakummilanga che Samweli. 9 Nipele che Eli ŵansalile che Samweli, "Njaule nkagone, ammilangaga sooni nkajile ‘Mmechete alakwe Ambuje Akunnungu, pakuŵapo une jwakutumichila jwenu ngupikanila.’" Kwayele che Samweli ŵausile ni kugona.

10 Kanyuma Ambuje Akunnungu ŵaiche ni kwima pelepo, ŵammilasile che Samweli mpela kuundanda, "Che Samweli, che Samweli!" Nipele che Samweli ŵajanjile, "Mmechete alakwe Ambuje Akunnungu pakuŵa uneji jwakutumichila jwenu ngupilikanila." 11 Nipele Ambuje Akunnungu ŵansalile che Samweli, "Nnole maandichile kuchitenda chindu mu Isilaeli, ni kila mundu juchapikane, tachijogopa. 12 Pa lyuŵa lyo tinjitindimisya aila indu yose inaisasile kuti tindende kutandilila kuundanda mpaka kumbesi nkati che Eli ni ŵapannango wakwe. 13 Naasalile kuti tinjajamuka ŵapannango wakwe moŵa gose pangali mbesi, kwaligongo lya sambi jiŵajimanyililaga pakuŵapo achiŵanagwe achalume andukene une, nombejo nganiŵaakanya. 14 Kwayele nalumbile nkati ŵamu nyuumba ji che Eli, kuti maleŵa ga ŵamu nyuumba ji che Eli ngagatyosekwa, iŵeje kwa sadaka atamuno kwa mbopesi syakutinisya."

15 Che Samweli ŵagonile pepala mpaka kundaŵi, nipele ŵajimwiche ni kuugula minango ja nyuumba ja Ambuje Akunnungu. Nambo ŵajogwepe kwasalila che Eli yele indu yasasile Ambuje Akunnungu yo. 16 Kwayele che Eli ŵammilasile che Samweli ni kunsalila, "Mwanangu che Samweli."

Nombejo ŵajanjile "Une apano!" 17 Che Eli ŵammusisye, "Ana Ambuje Akunnungu ansalile ichichi? Nkaasisa chansalile. Mwaasisaga chansalile, Ambuje Akunnungu anjamuche nnope." 18 Nipele che Samweli ŵasasile yanayose iŵasalilwe, pangasisa chindu chilichose. Nipele che Eli ŵatite, "Ŵelewo ali Ambuje Akunnungu, apanganye chilichose chakuchiwona kuti chili chambone kukwakwe."

19 Che Samweli paŵajendelechele kukula Ambuje Akunnungu ŵaliji pamo nawo, ni nganaleka chachilichose chiŵansalile che Samweli changanichimalila. 20 Ŵandu wose mu Isilaeli kutandilila ku Dani cha kumpoto, mpaka ku Beli Sheba, cha kulujenda, ŵaimanyilile kuti che Samweli ŵaliji jwakulondola jwakukulupilichika jwa Ambuje Akunnungu.

21 Ambuje Akunnungu ŵapundile kulilosya kwele ku Shilo ko, ni kweleko Ambuje Akunnungu ŵalilosisye ku che Samweli kwa litala lya liloŵe lyakwe.