1 Che Sauli ŵaliji ni yaka salasini katema paŵatandite kutawala. Ni ŵatawele ku Isilaeli kwa yaka alobaini na mbili. 2 Che Sauli ŵasagwile Ŵaisilaeli elufu tatu kuŵa ŵangondo ŵakwe, pasikati jawo ŵandu elufu mbili ŵaliji ni che Sauli ku Mikimashi ni ku chilambo cha ikwesya cha ku Beseli. Ŵandu elufu moja ŵaaŵisile kwele ku Gibea mu chilambo cha lukosyo lwa Benjamini, paasi pa ulongosi wa che Yonasani mwanagwe. Ŵandu ŵaŵasigalile ŵane wosepe ŵausisye kumangwawo. 3 Che Yonasani ŵachigungumuchile chigono cha Ŵafilisiti chichaliji ku Geba, nipele Ŵafilisiti wosepe ŵaipikene yeleyi. Kwayele che Sauli ŵagombile lipenga ku chilambo chose ŵatangesye achitiji, "Ŵaebulania apilikane." 4 Ŵaisilaeli paŵapilikene kuti che Sauli ŵaliji auleje ŵangondo ŵa Ŵafilisiti ŵawaliji pachigono ni Ŵafilisiti wo ŵatandite kwachima kwannope Ŵaisilaeli, Nipele ŵandu ŵaŵilanjikwe ajaule kukukamulangana ni che Sauli kwele ku Giligali ko.

5 Ŵafilisiti ŵasongangene kuti akaputane ni Ŵaisilaeli ali ni mutuka syakwekwelemwa elufu salasini ni ŵangondo ŵakwela mu falasi elufu sita ni ŵangondo ŵakwenda wapaasi ŵajinji nti nsanga wakumbwani, ŵanawose ŵakwesile ni kuŵika chigono chao kwele ku Mikimashi, kungopochelo lyuŵa kwa Beti Aveni.

6 Ŵaisilaeli paŵaiweni kuti alinji mu chakogoya ni kuti ŵangondo ŵao akwagungumuchila kwannope, ŵatandite kulisisa. Ŵane ŵalisisile mmalembe ni wane muisukutu wane mu lwala ni ŵane mmasimbo ni ŵane mu isima. 7 Waebulania Ŵane ŵajombweche lusulo lwa Yolodani ni kwinjila ku chilambo cha ku Gadi ni ku Gileadi.

Nambo che Sauli ŵaliji ku Giligali kukoko ni ŵandu wose ŵankuiye ali nkutetemela. 8 Che Sauli ŵaliji nkwalindilila che Samweli kwa moŵa saba, mpela iŵatite kusala che Samweli. Nambo che Samweli nganajaula kwele ku Giligali ni ŵandu ŵatandite kupwilingana.

9 Nipele che Sauli ŵaasalile ŵandu, "Munyichisye mbopesi jenu jakutinisya ni asila sya chitendewele." Nombejo ŵatasile mbopesi syakutinisya sila.

10 Papopo paŵamalisisye kupeleka mbopesi sya kutinisya, che Samweli ŵaiche. Che Sauli ŵakopweche pasa kwaula kukunchingamila. 11 Che Samweli ŵausisye, "Ana ntesile ichichi?" Che Sauli ŵajanjile, "Panaiweni kuti ŵandu akupwilingana, ni ŵalakwe jo mwaliji nkanaŵe kwika pa moŵa gamwaŵechete kuti tinnyiche, ni sooni panaiweni Ŵafilisiti aliŵisile chile kwa ngondo kwele ku Mikimashi ko, 12 ni naganisye kuti Ŵafilisiti chaiche kukuugungumuchila ku Giligali kunokuno. Sooni naliji bado kuŵenda chanasa kwa Ambuje Akunnungu. Pelepo yanganganichisye kupeleka mbopesi jakutinisya une nansyene."

13 Che Samweli ŵajanjile che Sauli kuti, "Ntesile mwakuloŵela. Nganingajitichisya gaŵansalile Ambuje Akunnungu, Akunnungu ŵenu. Nkaajitichisye Ambuje Akunnungu akautamilisye umwenye wenu pa Ŵaisilaeli moŵa gose pangali mbesi. 14 Nambo sambano umwenye wenu ngautamilisya, pakuŵa nganingajitichisya makanyo gaŵampele Ambuje Akunnungu. Ambuje Akunnungu alisosele mundu jwine jwakuunonyelesya ntima wakwe, jwelejo ni jwansagwile kuŵa mwenye pa ŵandu ŵakwe."

15 Nipele che Samweli ŵatyosile ku Giligali ni kwaula ku Gibea ku chilambo cha Benjamini.

Che Sauli paŵaŵalasile ŵandu ŵaŵaliji pamo nawo, ŵaliji ŵangondo mia sita. 16 Che Sauli ni che Yonasani mwanagwe pamo ni ŵangondo ŵaŵaliji pamo nawo ŵatemi ku Gibea chilambo cha Benjamini ni Ŵafilisiti ŵaŵisile chigono ku Mikimashi. 17 Ŵafilisiti ŵatyosile ku chigono chao kwaula kukwagungumuchila ali pa mipingo jitatu. Mpingo umo wajawile ku Ofila ku chilambo cha ku Shuali. 18 Mpingo wine wajawile ku Beti Holoni, ni mpingo wine wajawile ku mpika waukwaula ku chiŵata cha Seboimu chachikulolegana ni chipululu.

19 Pa kele katema ko paliji pangali mundu jwali jose ku chilambo chose cha ku Isilaeli jwaŵakombwele kusyana chindu chachili chose pakuŵa Ŵafilisiti nganiŵakundaga Ŵaebulania kuti alijiganye kusyana mapanga pane mipamba. 20 Kila Mwisilaeli yakanganyichisye kwajaulila Ŵafilisiti kukunolesya lijela lyakwe lyakukwekwelemya ni chinyama, majela ni maŵago ni ikwakwa yao. 21 Pakuti anolesye maŵago ni isonga yakuputila ng'ombe Ŵaisilaeli ŵalipaga ntengo wekulungwa, ŵatyosyaga ipande iŵili ya madini ga feza, nambo iŵaga kunola lijela lyakukwekwelemya ni chinyama ntengo wakwe waliji chipande chimo cha madini ga feza. 22 Kwayele pajakopochelaga ngondo nganapagwa jwangondo pasikati ja wose ŵaŵaliji ni che Sauli ni che Yonasani mwanagwe juŵaliji ni lipanga pane mpamba ikaŵe che Sauli ni che Yonasani mwanagwe. 23 Kwayele Ŵafilisiti ŵajawisye mpingo wa ŵangondo kukulindilila litala lyalikwaula ku Mikimashi.