1 Pakumala yeleyo che Samweli ŵawile, nipele Ŵaisilaeli wosepe ŵasongangene pamo kulila kwa malumbo malilo gakwe. Nipele ŵansichile kumangwakwe ku Lama.

Pakumala yeleyo che Daudi ŵatyosile kwaula ku chipululu cha Palani. 2 Jwapali mundu jumo ku musi wa Maoni juŵakwete chipanje kwele ku Kalimeli, mundu ju ŵaliji jwakusichila kwannope. Ŵalanjile ngondolo elufu tatu ni mbusi elufu moja ni ŵaliji nkusikata manyunya kwele ku Kalimeli ko. 3 Mundu jo jwaŵilanjikwe che Nabali ni ŵankwakwe jwaŵilanjikwe che Abigaili. Che Abigaili ŵaliji jwankongwe jwalunda ni jwakusalala. Nambo che Nabali ŵankwakwe juŵaliji jwa ntundu wa che Kalebu ŵaliji mundu jwachigongomalo ni jwa kulema.

4 Katema che Daudi paŵaliji kweleko kuchipululu ko ŵapilikene kuti che Nabali ŵaliji nkusikata manyunya ngondolo syakwe kwele ku Kalimeli ko. 5 Kwayele ŵaajigele achachanda likumi, ŵaasalile, "Njaulanje ku che Nabali kwele ku Kalimeli ko nkaasalile kuti ngwakomasya. 6 Nkaasalile kuti che Daudi akuti ‘Ntame yaaka yejinji yaili ni mboka mmweji ni ŵapaulongo wenu ni yanayose inkwete. 7 Mbilikene kuti katema ka nkusikata manyunya ngondolo syenu, ngusaka mmanyilile kuti ŵakuchinga ŵenu ŵaliji pamo ni uwe, ni uwe nganitwatendaa chachili chose changalumbana. Sooni katema kose paŵaliji pamo ni uwe akuno Kalimeli ku, nganajiwikwa chilichose. 8 Mwausyaga tachinsalila. Sambano ngummenda, mwatendele ya mbone achachanda ŵangu, pakuŵapo tuiche pa ndaŵi ja sangalala. Choonde mwape chilichose chinkwete ŵakutumichila ŵenu wo ni une che Daudi mwanagwenu.’" 9 Achachanda ŵa che Daudi ŵajawile ni kwasalila che Nabali nti iŵalajisye che Daudi. Nipele ŵalindilile kanondi. 10 Nipele che Nabali ŵaajanjile ŵakutumichila ŵa che Daudi pakwausya kuti, "Ana che Daudi ju akulitenda ŵani? Ana chapi chakuntendasya mwanagwe che Yese aliwone kuti ali wmuhimu? Agano moŵa gano kwana ŵakutumichila ŵaajinji ŵakwautuka achambuje ŵawo. 11 Uli, nyigale mikate ni meesi ni nyama jinasikite kwaligongo lya ŵakukata manyunya ga ngondolo syangu ni kwapa ŵandu ŵangangukumanyilila kwakutyochela?"

12 Nipele achachanda ŵa che Daudi ŵala ŵausile ni kwasalila che Daudi iŵajanjilwe ni che Nabali. 13 Che Daudi ŵaasalile ŵandu ŵakwe kuti, "Kila mundu alitaŵilile lipanga lyakwe mchiunu." Nipele kila mundu ŵalitaŵilile lipanga lyakwe, ni che Daudi nombe ŵalitaŵilile lipanga lyakwe. Ŵandu nti mia nne ŵankuiye che Daudi ni ŵandu mia mbili ŵasigalile ni ndundu.

14 Jwanchanda jumo pasikati ja ŵamasengo ŵa che Nabali, ŵansalile che Abigaili ŵankwakwe che Nabali kuti, "Che Daudi ŵaatumile ŵantenga kutyochela ku chipululu kuti ŵaakomasye ambuje jwetu, nambo ambujewo ŵaatukene. 15 Nambo ŵele ŵandu wo ŵaliji ŵambone kwa uwe. Nganatutendela chindu chilichose chakusakala, ni katema kose katwaliji nawo kwele ku chipululu ko, pangali chindu chetu chimo chichajiŵikwe. 16 Kukwetu, ŵaliji wakulindilila ndaŵi syose pitwachingaga ilango yetu chilo ni muusi wakwe. 17 Sambano nganichisye chele chindu chi ni mmanyilile chintende ichichi. Chele chindu chi chikomboleka kwikanalyo limbulunga kwa ambuje ŵetu ni ŵapaulongo wakwe wose. Wankwenu che Nabali ali mundu jwangalumbana, ni jwangasaka kupikanila chakwasalila mundu jwine."

18 Che Abigaili ŵajanguisye, ŵajigele mikate mia mbili ni misaku jiŵili jajigumbele divai ni nyama ja ngondolo syejoche nsano ni kilo kumi na saba sya imanga yakalanga ni isagwa mia moja ya sabibu syejumule, ni mikate ja tini mia mbili ni yele indu yose yo ŵaikwesisye pachanya pa mbunda. 19 Ni ŵansalile jwanchanda jwakwe jula, "Nnongolele! Une tinankuye." Nambo nganansalila che Nabali ŵankwakwe chilichose. 20 Paŵaliji nkutuluka ku chitumbi kwaula ku chiŵata, ali akwesile mbunda jakwe, che Daudi ni ŵandu ŵakwe nombe ŵaliji nkutuluka chitumbi kwika kuŵaliji. 21 Che Daudi ŵaganisisye kuti, "Uneji nalisawisye kulindilila ipanje yose ya mundu ju mu chipululu pangali chakupata, ni ngapagwa chindu chakwe chichapotele, nombejo andipile yangalumbana pakwatendela yambone inaatendele. 22 Ambuje Akunnungu aambute ni kuumulaga une, iŵaga malaŵi kundaŵi, nginguulaga ŵamasengo achalume wose ŵa mundu jo."

23 Nipele che Abigaili paŵammweni che Daudi, ŵajangwiye kutuluka pa mbunda jakwe, ŵatindiŵele ni kukotama mpaka paasi paujo pa che Daudi. 24 Ŵaligwisisye pamakongolo pa che Daudi ni kwasalila, "Alakwe ambuje jwangu, chileŵo chi chiŵe kwa une pe. Choonde muungunde ngunguluche ni mmwe. Mpilikanile maloŵe gingusaka kunsalila. 25 Nkanganichisya che Nabali mundu jwachigongomalo, jwelejo ali jwakuloŵela mpela malumbo ga liina lyakwe yagatite kuŵa, nombejo akupanganya mpela mundu jwakuloŵela. Ambuje jwangu, aŵala achachanda ŵenu pamwatumile, uneji jwakutumichila jwenu nganinaawona. 26 Sambano ambuje jwangu, ngulumbila kwa Ambuje Akunnungu ŵajumi, ni yanli ŵajumi mmwe, kuti pakuŵa Ambuje Akunnungu ansiŵilile nkaliuchisya kwa kuulaga ni kuliichisya malalatilo, mwaleche ŵammagongo ŵenu ni aŵala wose ŵakunsachila yangalumbana aŵeje ŵakuloŵela mpela che Nabali. 27 Ambuje jwangu, ngunchondelela mpochele au ntuka wu unanjigalile, ni kwapa achachanda unnongene nawo. 28 Choonde muunechelesye une jwakutumichila jwenu kwa chilichose chiineŵile. Nguimanyilila kuti Ambuje Akunnungu tachintenda mmwe kuŵa umwenye jwa ku Isilaeli, ni ŵanache ŵenu nombe tachiŵa iyoyo, pakuŵapo mmwejo nkuputana ngondo ja Ambuje Akunnungu. Yangalumbana ikapagwa katema kose ka umi wenu. 29 Yakopochelaga ŵandu kunkuilisya kuti ammulaje, Ambuje Akunnungu, Akunnungu jwenu, tachiulindilila umi wenu mpela mundu yakuti kulindilila indu ya ndalama. Nambo ŵammagongo ŵenu Akunnungu tachaponya kwakutalika mpela mundu yakuti kuponya maganga ni linati. 30 Pakumala Ambuje Akunnungu kutendekanya yambone yose yannanjile, ni kunsagula mme mwenye jwa ku Isilaeli, 31 alakwe ambuje jwangu, ngankola ligongo lya kulilasika namose kulaga muntima kuti mmuleje pangali ligongo kwa kuliuchisya. Nambo ambuje jwangu, Ambuje Akunnungu patachimpa upile, ngunchondelela mungumbuchile une jwakutumichila jwenu."

32 Che Daudi ŵanjanjile che Abigaili, "Achimbichikwe Ambuje Akunnungu, Akunnungu jwa ku Isilaeli, jwantumisye mmwe kuchingangana ni une. 33 Ambuje Akunnungu ampe upile kwa yantite kupanganya kwa lunda kwa kuusiŵilila kuti ngasimulaga ŵandu ni kuliuchisya une nansyene. 34 Kusyene, Ambuje Akunnungu, Akunnungu jwa ku Isilaeli, asiŵilile ngasinammulasya mmwe. Ngankatende kwakwanguya kwika kukuchingangana ni une, kusyene, malaŵi kundaŵi ngapagwa jwannume jwalijose jwali paasi pa che Nabali jwakasigalile jwanjumi." 35 Nipele, che Daudi ŵapochele indu yose iŵannyichisye che Abigaili, ŵansalile che Abigaili, "Mmuje kumangwenu kwa chitendewele. Nnole, une nampikene insasile, chimmendile cho nachipikene."

36 Che Abigaili paŵausile kumusi, ŵansimene che Nabali achitendaga chindimba chekulungwa cha wandu achajinji ni chakulya mu nyuumba jakwe mpela ja chimwenye. Che Nabali ŵaliji asengwile kwannope muntima mwakwe ni ŵaliji akolelwe kwannope, kwayele che Abigaeli nganansalila chilichose ŵakwakwewo nipele ŵalindilile mpaka kundaŵi. 37 Pakwachele, che Abigaili paŵaweni kuti ŵankwakwe atulele nkologo waakopweche, ŵansalile indu yose, ni papopo che Nabali ŵatatele, ni ŵaliji mpela liganga. 38 Moŵa likumi kanyuma, Ambuje Akunnungu ŵaujigele umi u che Nabali.

39 Che Daudi paŵapilikene kuti che Nabali aŵile, ŵatite, "Achimbichikwe Ambuje Akunnungu jwammuchisye che Nabali kwa kuundukana, nombe Ambuje Akunnungu anekasisye une jwakutumichila jwakwe kuti ngatenda ya chigongomalo. Ambuje Akunnungu ammuchisye che Nabali kwa ugongomalo wakwe."

Nipele che Daudi ŵaatumile ŵandu kuti akaajigalile che Abigaili kuti aŵe ŵankwakwe. 40 Ŵakutumichila ŵa che Daudi paŵaiche kwa che Abigaili kwele ku Kalimeli ko, ŵansalile, "Che Daudi atutumile tunjigale kuti mme ŵankwakwe."

41 Che Abigaili ŵajimwiche, ni kutindiŵala ni ŵakoteme mpaka pasi paujo pao, ni ŵatite, "Uneji ndili jwakutumichila pe, ndili chile kwagulula makongolo ŵakutumichila ŵa ambuje jwangu." 42 Che Abigaili ŵajangwiye, ŵajimwiche ni kukwela pa mbunda jakwe, ŵalongene ni ŵakutumichila ŵakwe nsano achakongwe, ŵajawile ni ŵakutumichila ŵa che Daudi, nombejo ŵaliji ŵankwakwe che Daudi.

43 Sooni che Daudi ŵalombele che Ahinoamu kutyochela ku Yesileeli. Kwayele ŵele achakongwe ŵaŵili wo ŵaliji achiŵankwakwe. 44 Kele katema ko, che Sauli ŵannombekasisye che Mikali, mwali jwakwe, juŵaliji ŵankwakwe che Daudi, ku che Palitieli mwanagwe che Laishi, jwakutyochela musi wa ku Galimu.