1 Payamasile yeleyo, che Samweli ŵaasalile ŵandu wose ŵa ku Isilaeli achitiji, "Ndesile yanayose imuusalile. Nampele mwenye juchamtawale. 2 Sambano, nkwete mwenye jutachinlongosya. Kwa uneji, akuno kuchekulupa ni muntwe mwegumbale uli, ni ŵanache ŵangu nli nawo pamo. Uneji mele ndili nkunlongosya kutandila uchanda wangu mpaka sambano jino. 3 Une ndili panopano, iŵaga ndesile chilichose changalumbana, nipele nsaleje paujo pa Ambuje Akunnungu ni paujo pa mwenye jwakwe jwasagulikwe. Ana sumwile ng'ombe pane mbunda ja mundu jwalijose? Ana nampunjile mundu jwalijose? Ana apali mundu jwalijose junammonele? Ana mbochela chindu kwa mundu kuti nambusye magambo? Iŵaga ndesile indu yati mpela yeleyo, une tinjilipa." 4 Ŵandu ŵajanjile, "Ngwamba, nganatulambusya namose kutuliŵatila namose kwigala chindu chilichose kwa mundu." 5 Che Samweli ŵajanjile, "Ambuje Akunnungu ali jwaumboni jwetu, ni mwenye jwakwe jwansagwile lelo jino ali jwaumboni kuti mumweni nganingola ligambo." Ŵanyawo ŵajanjile, "Ŵelewo Ambuje Akunnungu ali jwaumboni." 6 Che Samweli ŵaasalile, "Ambuje Akunnungu ni jwansagwile che Musa ni che Haluni ni kwakoposya achambuje Ŵenu ku chilambo cha ku Misili. 7 Sambano njimanje papopo kuti tuilolelole paujo pa Ambuje Akunnungu ipanganyo yachigolochelo iŵaitesile Ambuje Akunnungu kwa mwanya ni kwa achambuje ŵenu. 8 Che Yakubu ni ŵapaulongo wakwe paŵajawile ku Misili, ni Ŵamisili paŵaaliŵatile, achambuje ŵetu ŵaalilile Ambuje Akunnungu, nombewo ŵaatumile che Musa ni che Haluni ŵaŵaakopwesye achambuje ŵenu ku chilambo cha ku Misili ni kwatesya ntamanje mu chilambo chi. 9 Nambo ŵandu wo ŵaaliŵalile Ambuje Akunnungu, Akunnungu jwawo, nombe Akunnungu ŵantesile che Sisela chilongola jwa ŵangondo ŵa ku Hasoli wapute, ni sooni waputikwe Ŵafilisiti ni mwenye jwa ku Ŵamoabu. Ŵele ŵandu ŵa ilambo wo ŵaputene ni achambuje ŵetu ni kwapunda. 10 Achambuje ŵenu ŵalisile kwa Ambuje Akunnungu achitiji, ‘Tutesile sambi ligongo tunnesile mmwe Ambuje Akunnungu ni kujitumichila minungu ja Baali ni Ashitaloti yaikolochekwe ni ŵandu. Ntukulupusye mmakono mwa ŵammagongo ŵetu, ni uweji tutuntumichile.’ 11 Pelepo Ambuje Akunnungu ŵantumile Yelubaali yaani che Gidioni ni kanyuma ŵantumile che Balaka ni che Yefuta ni mbesi ŵandumile une che Samweli. Nombe Ambuje Akunnungu ŵankulupwisye kutyochele kwa ŵammagongo ŵenu ŵaŵansyungwile, ni ŵanyamwe mwatemi mu chitendewele. 12 Nambo pamwammweni mwenye che Nahashi jwa Ŵaamoni aiche kungungumuchila, mwankanile Ambuje Akunnungu jwali mwenye jwenu, ni mwasalile, ‘Ngwamba, tukunsaka mwenye atutawaleje.’

13 "Sambano mwenye jumunsagwile ni aju. Mwaŵendile Ambuje Akunnungu ampe mwenye, nombewo ampele mwenye jwa kumtawala. 14 Iŵaga timwachimbichisye Ambuje Akunnungu, ni kwatumichila ni kwapilikanila pangaleka ni kugakamulisya malamusi gakwe, ŵanyamwe mwachinsyene pamo ni mwenye jwenu jwakumtawala iŵaga timwakuye Ambuje Akunnungu, Akunnungu ŵenu, nipele yosepe tiichinjendela chenene. 15 Nambo iŵaga ngankwapilikanila Ambuje Akunnungu, ni kuleka kukuya makanyo gakwe, nipele ŵelewo tachijamuka mwanya pamo ni mwenye jwenu mpela iwatite kwajamuka achambuje ŵenu. 16 Kwayele, njimanje jii ni tinchiwone chindu chekulungwa chichatende Ambuje Akunnungu paujo penu. 17 Uli, sambano ngaŵa chau ni katema ka magungulo ga ngano? Nambo uneji tinaapopelele Ambuje Akunnungu kuti aichenawo njasi ni ula, ni ŵanyamwe tinchimanyilile achi chindu chi yachitite kuŵa chakusakala paujo pa Ambuje Akunnungu pammendile kuti nkole mwenye."

18 Nipele che Samweli ŵapopesile kwa Ambuje Akunnungu ni Ambuje Akunnungu wo ŵatumisye njasi ni ula pa lyuŵa lyo. Ŵandu wose ŵanjogwepe Ambuje Akunnungu kwannope ni che Samweli jwakwe. 19 Nipele ŵansalile che Samweli, "Choonde atupopelele uweji ŵakutumichila ŵenu kwa Ambuje Akunnungu jwenu, kuti tukawa. Uwe sambano tumanyilile kuti pa ileŵo yetu yose tujonjechesye sambi jekulungwa kwakulisachila mwenye."

20 Che Samweli ŵaajanjile, "Nkajogopa, nachiŵamuno ntesile ugongomalo wu, nkaleka kwakuya Ambuje Akunnungu, nambo mwatumichile kwa mitima jenu jose. 21 Nkajikuya minungu ja unami jangampokasya namose ngajikukombola kunkulupusya, pakuŵa ngajikombola kutenda chachilichose. 22 Kwaligongo lya liina lyakwe lyekulu, Ambuje Akunnungu ngawakana wandu ŵandu ŵakwe pakuŵa Ambuje Akunnungu wanonyelwe kuntenda mme ŵandu ŵakwe. 23 Kwauneji ngaiŵa yambone neche kwapopelela kwa Ambuje Akunnungu, natendaga yeleyo chime ngutenda sambi kwa Ambuje Akunnungu kwa yele chinyendelechele kwajiganya litala lya lili lyamboni ni lya chigolochelo. 24 Nambo ŵanyamwe katema kose mwachimbichisyeje Ambuje Akunnungu ni kwatumichila kwa kukulupilichika kwa mitima jenu jose. Nkumbuchileje aila indu yekulungwa yantendele. 25 Nambo iŵaga nkwendelechela kutendekanya ugongomalo, chimmulajikwe mwanya pamo ni mwenye jwenu."