1 Che Sauli ŵansalile che Yonasani mwanagwe ni achakulu ŵa ngondo ŵakwe wose kuti ambulaje che Daudi. Nambo che Yonasani mwanagwe che Sauli ŵannonyele kwannope che Daudi. 2 Kwayele che Yonasani ŵansalile che Daudi, "Atati ŵangu akusosa itajile kummulaga, kwayele nlilolechesye. Malaŵi kundaŵi njaule pamalo pakusisika pala, nkalijuŵe pelepo. 3 Une tiiche ni atati ŵangu ku ngunda ko ni kwima chiŵandi ni patinkalijuŵe po. Tingunguluche nawo nkati mmwe, ni une tinansalile chilichose chitinjichipikana."

4 Che Yonasani ŵanlapile che Daudi paujo pa atatigwe, achitiji, "Nkaatendela chachilichose chakusakala jwakutumichila jwenu che Daudi, pakuŵapo jwelejo ngantendelela chachilichose changalumbana, yanayose yatesile inkamuchisye mmwejo kwannope. 5 Paŵammuleje ajula Mfilisiti Goliati jula, ŵautasile umi wakwe mu chakogoya, nombe Ambuje Akunnungu ŵaapele Ŵaisilaeli kupunda kwakukulungwa. Ni mmwe mwasangalele pimwaiweni yeleyo. Sambano ligongo chichi nkusaka kutenda sambi kwa kummulaga che Daudi mundu jwangali ni chileŵo."

6 Che Sauli ŵampilikanile che Yonasani, nipele ŵalumbilile achitiji, "Ngulumbila kwa Ambuje Akunnungu ŵajumi, ngasinammulaga che Daudi." 7 Nipele che Yonasani ŵammilasile che Daudi ni kunsalila yanayose yo. Che Yonasani ŵanjawisye che Daudi ku che Sauli ni che Daudi ŵantumichele che Sauli mpela iyatiji kuundada po.

8 Kanyuma kwaliji ni ngondo sooni pasikati ja Ŵafilisiti ni Ŵaisilaeli. Che Daudi ŵatyosile kuputana ni Ŵafilisiti, ŵaauleje Ŵafilisiti ŵajinji ni ŵaŵasigalile ŵautwiche paujo pao. 9 Nambo mbumu jwangalumbana kutyochela kwa Ambuje Akunnungu ŵannyichilile che Sauli paŵaliji atemi kumangwakwe ali akamulile mmakono mpamba, katema che Daudi paŵagombaga ching'wenyeng'wenye. 10 Che Sauli ŵalinjile kuntwinyichisya che Daudi mulikumba ni mpaamba wo, nambo che Daudi ŵasyembile nipele mpaamba wo wasomile mwikumba. Chilo chichocho che Daudi ŵautwiche ni ŵatolweche pelepo.

11 Chilo chichocho che Sauli ŵaatumile ŵandu kunyuumba ku che Daudi akaalole iŵaga ali kweleko kuti ŵaaulaje kundaŵi. Nambo che Mikali ŵankwakwe che Daudi ŵansalile che Daudi, "Iŵaga ngammutuka kuukulupusya umi wenu chilo chino, malaŵi timmulajikwe." 12 Nipele che Mikali ŵantulwisye che Daudi pedilisha, nombe che Daudi ŵatyosile ni kuutuka. 13 Che Mikali ŵachijigele chinyago, ŵachiŵisile pachindanda ni kuntwe ŵaŵisile nsamilo wa manyunya ga mbusi. Nipele ŵachiunichile ni nguo. 14 Che Sauli paŵaatumile ŵandu kunkamula che Daudi, che Mikali ŵaasalile kuti, "Che Daudi ali jwakulwala." 15 Nipele che Sauli ŵaatumile auje sooni kweleko, ŵaalajisye achitiji, "Munyichisye che Daudi kukwangu nachiŵamuno ali pachindanda kuti naaulaje." 16 Ŵandu ŵala paŵajinjile mu nyuumba ji che Daudi ni kuchilola chindanda, ŵaiweni kwana chinyago ni nsamilo wamanyunya ga mbusi kuntwe. 17 Nipele che Sauli ŵammusisye che Mikali kuti, "Kwachichi muunambisye kwanti nnyi? Munnesile jwammagongo jwangu atoloche?"

Nombe che Mikali ŵajanjile che Sauli kuti "Che Daudi ŵaasalile kuti ‘Muuneche nyaule ngaakaŵa tinammulaje.’"

18 Che Daudi paŵatolweche, ŵajawile ku Lama ku che Samweli. Ŵansalile che Samweli indu yose iŵantendele che Sauli. Nipele che Daudi ni che Samweli ŵajawile kutama musi wa ku Nayoti. 19 Kanyuma che Sauli ŵasalilwe kuti che Daudi ali musi wa ku Nayoti kwele ku Lama ko. 20 Kwayele che Sauli ŵaatumile ŵandu akaakamule che Daudi. Nambo paŵausimene mpingo wa ŵakulondola ŵa Akunnungu ali nkulondola ni che Samweli ali nkwalongosya, mbumu jwa Akunnungu ŵaaichilile aŵala ŵakutumichila ŵa che Sauli, nombe nawo ŵatandite kulondola. 21 Che Sauli paŵasalilwe ngani syo, ŵaatumile ŵakutumichila ŵane, nombe nawo ŵatandite kulondola. Che Sauli paŵaatumile ŵakutumichila ŵane kaatatu, nombe nawo ŵatandite kulondola. 22 Pelepo che Sauli nsyene jo ŵajawile ku Lama. Paŵaiche ku chisima chekulungwa chachili kwele ku Seku, ŵansimene mundu jumpepe juŵammusisye, "Che Samweli ni che Daudi ali kwapi?" Jwelejo mundu jo ŵajanjile, "Ali ku Nayoti, kwele ku Lama ko." 23 Nombe che Sauli ŵajawile ku Nayoti musi wa ku Lama. Paŵaiche kweleko, mbumu jwa Akunnungu ŵannyichilile, nombewo ŵatandite kulondola ali mwitala mpaka paŵaiche ku Nayoti musi wa ku Lama.

24 Che Sauli ŵausile yakuwala yakwe ni ŵaliji nkulondola paujo pa che Samweli. Ŵasigalile matakope lyuŵa lyansima, muusi ni chilo. Lyele ni ligongo ŵandu ŵatandite kuliusya, "Uli, che Sauli nombe aŵele jumo mwa ŵakulondola?"