1 Samuel 11

Che Sauli akwapunda Ŵaamoni

1 Nipele pawapite mweesi umo, mwenye che Nahashi jwa Ŵaamoni, ŵapite ni kuusyungula musi wa ku Yabeshi Gileadi. Ŵandu ŵakutama mu mmusi wo ŵansalile che Nahashi, "Ntende chilanga cha chitendewele ni uwe, ni uweji tutuchintumichila." 2 Nambo che Nahashi ŵaasalile, "Tindende chilanga cha chitendewele ni ŵanyamwe ikaŵe ndili nankolopwele liso lya kunchiji lya jwalijose, kuti pakutenda yeleyo naatesye soni Ŵaisilaeli wose." 3 Achakulu ŵa ku Yabeshi ŵansalile, "Ntulecheje kwa moŵa saba kuti twatume ŵantenga ku chilambo chose cha Ŵaisilaeli. Iŵaga ngaapagwa mundu jwalijose jwakutukulupusya, pelepo tutulipeleche kwa mmwejo twachinsyene." 4 Ŵantenga ŵala paŵaiche ku Gibea, kuŵatamaga che Sauli, ŵasasile utenga wo kwa ŵandu, ni ŵandu wose ŵatandite kulila kwa kunyanyisya.

5 Katema ko che Sauli ŵaliji nkutyoka kumigunda ni ng'ombe syakwe, ŵausisye, "Ŵandu wo ajinjilwe chindu chachi? Uli chikusausya ichichi mpaka ŵandu alile?" Ŵansalile utenga uŵaichenawo ŵandu kutyochela ku Yabeshi. 6 Papopo che Sauli paŵagapilikene maloŵe go, mbumu jwa Akunnungu ŵannyichilile kwa machili, ŵatumbile kwannope. 7 Ŵajigele ng'ombe syankambaku siŵili ni kusisinga, nipele ŵasikatenye ipandeipande, ŵaatumile ŵantenga kuti aijausye ipande yo ku chilambo chosepe cha Ŵaisilaeli, ni akaŵecheteje kuti, "Amu ni mutachitendelwa ng'ombe ja mundu jwalijose jwangakunkuya che Sauli ni che Samweli ku ngondo." Ŵandu wose ŵa ku Isilaeli ŵajinjilwe ni lipamba, kwaligongo lya Ambuje Akunnungu. Kwayele ŵandu wose ŵakamulene ni kuŵa chindu chimo. 8 Che Sauli ŵaasongangenye ku Beseki ko, ni ŵaliji ni ŵandu laki tatu kutyochela ku Isilaeli ni elufu salasini kutyochela ku Yuda. 9 Ŵaasalile aŵala ŵantenga ŵaŵaiche kutyochela ku Yabeshi, "Ŵandu ŵakutama ku Yabeshi Gileadi mwasalile nnyi: Malaŵi pachiliŵale lyuŵa, chimme nli nkulupwiche." Ŵandu ŵa ku Yabeshi paŵapilikene yeleyo ŵasangalele kwannope. 10 Kwayele ŵandu ŵa ku Yabeshi ŵaasalile Ŵaamoni kuti, "Malaŵi tutulipeleche kukwenu, ni ŵanyamwe chintutende chilichose chinkuchisaka."

11 Kundaŵi kwakwe che Sauli ŵagaŵenye ŵandu mipingo jitatu. Nipele kumasikusiku ŵajinjile pa chigono cha waamoni, ni kwagungumuchila. Wajendelechele kwaulaga mpaka muusi. Ŵaŵakulupwiche wo ŵapwilingene, jwalijose kuutuchilaga kwa jikajikape.

12 Pelepo Ŵaisilaeli ŵamusisye che Samweli, "Ana ali kwapi aŵala ŵandu ŵaŵatiji kuti che Sauli ngakombola kuŵa mwenye jwetu? Mwaichisye ŵandu wo, ni uweji tutwaulaje." 13 Nambo che Sauli ŵaasalile, "Pakapagwa jwalijose jwakuulagwa lelo, pakuŵa lelojino Ambuje Akunnungu ŵaakulupwisye Ŵaisilaeli."

14 Che Samweli ŵaasalile, "Twende wosepe tujaule ku Gileadi tukantangasye sooni kuti che Sauli ni mwenye jwetu." 15 Ŵandu wose ŵajawile ku Giligali, ni paŵaiche kweleko ŵantangesye che Sauli kuŵa mwenye paujo pa Ambuje Akunnungu. Ŵampelechele Ambuje Akunnungu mbopesi sya chitendewele kweleko. Che Sauli pamo ni ŵandu wose ŵa ku Isilaeli ŵatesile chindimba chekulungwa.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?