1 Che Samweli paŵachekulwipe, ŵaatesile ŵanache ŵao achalume kuŵa ŵakulamula chilambo cha Ŵaisilaeli. 2 Mwanache jwakwe jwakwitiwo ŵaŵilanjikwe che Yoeli, ni jwaaŵili ŵaŵilanjikwe che Abiya. Wose ŵanaŵaŵili ŵaliji ŵakulamula kwele ku Beli Sheba. 3 Nambo ŵanache wo nganatamaga kwakwanonyelesya Akunnungu mpela muŵatesile atati ŵao. Nambo ŵagambaga kulisosela yakupoka kwawo. Ŵapochelaga indu kwachisyepela ni nganalamulaga magambo kwagoloka.

4 Nipele ilongola wose ŵa Ŵaisilaeli ŵasongangene pamo, ŵanjaulile che Samweli ku Lama ko, 5 ŵansalile, "Nnole alakwe jo sambano achekulwipe ni ŵanache ŵenu ngakutama kwakwanonyelesya Akunnungu mpela mmwe. Kwayele ntusagulile mwenye juchatulongosye mpela mwakutendela ilambo ine yose." 6 Maloŵe gele ga ŵandu ŵa ku Isilaeli gakusaka kuti ŵaasagulile mwenye jwakwalongosya, nganigannonyelesya che Samweli. Kwayele jwapopesile kwa Ambuje Akunnungu. 7 Ambuje Akunnungu ŵansalile che Samweli, "Mwajitichisye kila chindu chaakunsalila ŵandu, pakuŵa ngakunkana mmwejo, nambo akuungana une kuŵa mwenye jwawo. 8 Kutandilila panaakopwesye ku Misili, aanesile une, aŵele ali nkujitumichila minungu jine mpaka lelo. Indu yaambanganyichisye une, ni iyoyo yaakumpanganyichisya ni mmwe wakwe. 9 Nipele mwapilikanile, nambo mwajamuche kwannope, ni mwasalile pangasisa indu itaachapanganyisya mwenye jutachatawala jo."

10 Kwayele, che Samweli ŵaasalile aŵala ŵandu ŵaŵaŵendaga ŵaasagulile mwenye yosepe iŵasasile Ambuje Akunnungu. 11 Ŵatite, "Yeleyi ni ichajile pakumpanganyichisya mwenye jwenu jutachintawala. Ŵanache ŵenu achalume chachatenda ŵakwendesya mutuka sya ngondo, ni ŵane ŵakwendesya falasi ŵakwe, ni ŵane ŵakuutuka mmbujo mwa mutuka syo. 12 Tasagule ŵane aŵe ilongola ŵa mipingo ja ŵangondo elufu moja ni ŵane aŵe ilongola ŵa mipingo ja ŵangondo hansinihansini. Ŵane tachatenda aŵe ŵakulima mu ngunda mwakwe, ni kugungula magungulo gakwe. Ŵane tachatenda aŵe ŵakusyana yakumenyanila ya pa ngondo ni ŵane tachisyana isyano ya mutuka syakwe sya ngondo. 13 Achiŵali ŵenu tachajigala ŵatende ŵakukolosya mauta gakununjila, ni ŵane ŵakuteleka yakulya ni ŵane ŵakuteleka mikate. 14 Tachijigala migunda jenu jajili ni chajila, migunda ja miseituni ni ja sabibu ni kwapa ŵakutumichila ŵakwe. 15 Tachijigala liunjili lya kakumi lya magungulo genu ni lya sabibu syenu ni kwapa ŵakamusi ŵakwe ni ŵakutumichila ŵakwe. 16 Tachajigala ŵakutumichila ŵenu achalume ni achakongwe ni ng'ombe syenu syakunakana ni mbunda syenu ni kwaligongo lya masengo gakwe. 17 Tachijigala liunjili lya kakumi lya ngondolo ni mbusi syenu. Ni ŵanyamwe mwachinsyene tinchiŵa achikapolo ŵakwe. 18 Pelepo patigannyichile gelego tinchiika kulila, kusosa ukamuchisyo kwa ligongo lya mwenye jumunsagwile ŵanyamwe mwachinsyene. Nambo Ambuje Akunnungu ngaika kunjanga."

19 Namose yeleyo ŵandu nganampilikanila che Samweli, ni ŵatite, "Ngwamba! Uweji tukusaka tukole mwenye jutatutawale, 20 ni uwe tuŵe mpela ŵandu ŵa ilambo ine. Mwenye jwetu atulamulileje magambo getu ni kutulongosya pa ngondo."

21 Ni pele che Samweli ŵajile kukwasalila Ambuje Akunnungu gele maloŵe gose gasalilwe ni wandu. 22 Ambuje Akunnungu ŵasalile che Samweli, "Mwapilikanile ni mwape mwenye." Nipele che Samweli ŵaasalile Ŵaisilaeli aujangane kila mundu ku musi wakwe.