1 Pa lyuŵa lyaatatu, che Daudi ni ŵandu ŵakwe ŵaujile ku Sikilagi. Ŵaamaleki ŵaliji agungumuchile malo ga kulujenda kwa chilambo cha Yuda yaani Negebu pamo ni musi wa Sikilagi ni kuutinisya mooto. 2 Ŵaliji ŵaajigele mateeka achakongwe ni ŵandu wose ŵaŵaliji mmusi mo, achakulugwa ni ŵananche. Nganambulaga namose jumo nambo wajigele ni kwaula nao. 3 Che Daudi ni ŵandu ŵakwe paŵaiche ŵausimene musi wetinisye ni mooto, ni achakongwe ni ŵanache ŵao ŵachilume ni ŵachikongwe, ajigalikwe mateeka. 4 Pelepo che Daudi ni ŵandu ŵakwe ŵatandite kulila kwa kunyanyisya, mpaka machili gakulila gamasile. 5 Achakongwe ŵaŵili ŵa che Daudi, che Ahinoamu kutyochela ku Yesleeli ni che Abigaili jwankongwe jwawililwe ni ŵankwakwe che Nabali, nombe nawo ŵajigalikwe mateeka.

6 Sambano, che Daudi ŵaliji pa yakogoya yekulungwa ligongo ŵandu ŵaŵechetaga kumponya maganga. Kila mundu yampetekaga muntima ligongo lya kwapootesya ŵanache ŵawo ni achiŵali ŵao. Nambo che Daudi ŵapegwilwe machili ni Ambuje Akunnungu, Akunnungu jwakwe. 7 Nipele che Daudi ŵansalile jwambopesi che Abiasali mwanache jwa che Ahimeleki, "Munyichisye chisibao cha umbopesi." Che Abiasali ŵampelechele. 8 Che Daudi ŵammusisye Ambuje Akunnungu kuti, "Uli naukuye au mpingo wa ŵangondo wejigale ŵandu ŵetu? Ana tinaakamule?"

Ambuje Akunnungu ŵajanjile, "Muukuye pakuŵapo tinkaakamule ni kwawombola mateeka."

9 Kwayele, che Daudi ŵatyosile pamo ni aŵala ŵandu mia sita ŵaŵaliji nawo. Paŵaiche pa kasulo ka Besoli, ŵaasimene ŵampepe mwa ŵandu ŵaŵajigalikwe mateeka ŵaalesile pelepo. 10 Nambo che Daudi ŵajendelechele kwaukuilisya mpingo ula ali ni ŵandu mia nne, ŵandu mia mbili ŵasigalile papopo pakuŵa ŵaliji apesile kwannope, nganakombola komboka kasulo ko. 11 Ŵandu ŵaŵaliji ni che Daudi ŵala ŵansimene mundu jumo Mmisili mwikonde mo, ni ŵanjawisye ku che Daudi. Ŵampele mundu jo nkate ni mesi. 12 Sooni ŵampele chipande cha nkate wa tini ni isagwa iŵili ya sabibu syejumu. Paŵamalisisye kulya, ŵapatile machili, pakuŵa ŵaliji jwangalya atamuno kung'wa chindu chachilichose kwa moŵa gatatu, muusi ni chilo. 13 Che Daudi wammusisye, "Ambuje jwenu ali nduni? Ana nkukopochela kwapi?"

Ŵelewo ŵajanjile, "Uneji ndili jwanchanda Mmisili. Ndili kapolo jwa mundu jumo Mwamaleki. Ambuje jwangu anesile panyuma moŵa gatatu gagapite pakuŵa naliji ngulwala. 14 Uwe twajawile kukuputa ngondo ku Negebu, yaani kulujenda kwa chilambo cha ku Yuda, pa malo paakutama Ŵakeleti, ni malo jaakutama ŵandu ŵa ntundu wa Kalebu. Ni uweji twachomile mooto musi wa ku Sikilagi."

15 Che Daudi ŵammusisye, "Uli nkukombola kumbechesya ku wele mpingo wa ŵandu ŵaŵajigele ŵandu ŵetu wo?" Jwanchanda jo ŵajanjile, "Iŵaga timuulumbilile kwa liina lya Akunnungu kuti ngamumulaga, namose kuumusya kwa ambuje jwangu, tinjinjausya." 16 Jwanchanda jula ŵannongwesye che Daudi mpaka kwauli mpingo ula. Paŵaiche kweleko ŵaasimene Ŵaamaleki ŵala ali apwilingene palipose ali nkulya ni kung'wa ni kuntyala ligongo indu iŵasumwile kutyochela mu chilambo cha Ŵafilisiti ni chilambo cha Yuda yaliji yejinji nnope. 17 Che Daudi ŵaaputile kutandilila kundaŵi mpaka lyuŵa lyaaŵili lyakwe ligulo. Nganapagwa jwannume jwalijose juŵakulupwiche ikaŵe achachanda mia nne ŵaŵakwesile ngamia ni kuutuka. 18 Che Daudi ŵawombwele kila chindu chiŵajigele Ŵaamaleki, pamo ni achiŵankwakwe ŵaŵili ŵala. 19 Che Daudi ŵachiwombwele kila chindu chichaliji chakwe, ngapagwa changapatikana, aŵeje jwanchanda pane jwanchekulu, mwanache jwachilume pane jwachikongwe, ni kila chindu chichajigalikwe ni ŵandu wo. 20 Sooni che Daudi ŵausisye mipingo jose ja ngondolo ni ng'ombe ni ŵandu ŵaliji nkusakula ilango yo paujo pa ilango ya che Daudi, ŵaliji nkuti, "Ayiyi ni indu yasumwile che Daudi."

21 Che Daudi ŵaiche kwa aŵala ŵandu mia mbili ŵaŵasigalile ku kasulo ka Besoli kwaligongo lyakuti ŵaliji apesile. Ŵandu ŵala paŵammweni che Daudi pamo ni aŵala ŵaŵaliji pamo nawo, ŵajawile kukwachingamila. Che Daudi paŵaiche pakuŵandikana nawo, ŵaakomasisye. 22 Nambo ŵandu wose ŵangalumbana ni ŵauwanga pasikati ja ŵandu ŵaŵalongene ni che Daudi ŵatite, "Pakuŵa ŵanyaŵa nganajaula pamo ni uwe, ngatwagaŵila indu itujigele. Nambo kila mundu akukombola kwajigala ŵankwakwe ni achiŵanagwe ni kutyoka."

23 Che Daudi ŵaajanjile, "Ngaŵa yeleyo achalongo achinjangu. Ngankusachilwa kutenda yeleyo kwa achila chatupele Ambuje Akunnungu. Atutesile tuupunde aula mpingo wa ngondo uwaiche kutugungumuchila. 24 Nduni jutagajitichisye ginkuŵecheta go! Ajula jwajawile ku ngondo ni ajula jwasigalile ni ndundu yetu, ŵanawose tachipegwa yalumo." 25 Kutandilila lyuŵa lyo che Daudi ŵalamwile kuti litala lyakugaŵanya indu chanti nyi liŵe lilamusi, ni yeleyi ikutendekwa mu Isilaeli mpaka lelo jino.

26 Che Daudi paŵausile ku Sikilagi, ŵaajauchisye achachekulu ŵa chilambo cha ku Yuda ŵaŵaliji achambusangagwe, liunjili mwa indu yasumwile achitiji, "Jeleji jili mituka kukwenu kutyochela mu indu itusumwile kwa ŵammagongo ŵa Ambuje Akunnungu." 27 Mituuka jo jaliji kwaligongo lya ŵaakutama musi wa ku Beseli, ni ŵaakutama musi wa ku Lamoti jajili ku Negebu yaani kulujenda kwa chilambo cha ku Yuda, ni ŵaakutama musi wa ku Yatili, 28 ni ŵaakutama musi wa ku Aloeli, ni ŵaakutama musi wa ku Sifimoti, ni ŵaakutama musi wa ku Eshitemoa, 29 ni ŵakutama musi wa ku Lakali ni ŵakutama misi ja ku Ŵayelameeli, ni ŵakutama misi ja Ŵakeni, 30 ni ŵakutama musi wa ku Holoma ni ŵakutama musi wa ku Bolashani, ni ŵakutama musi wa ku Ataki, 31 ni ŵakutama musi wa ku Hebuloni. Che Daudi ŵaapelechele mituka nombe ŵandu ŵakutama ku misi jose jiŵajimajimile nsyene jo ni ŵandu ŵakwe nombe.