1 Ambuje Akunnungu ŵansalile che Samweli, "Ana chinjendelechele kwalilila che Sauli mpaka chakachi ni pakuŵapo une naakanile akajendelechela kuŵa mwenye jwa ŵandu ŵangu Ŵaisilaeli? Ngumbasye mauta mu nsengo wenu, nguntuma njaule ku musi wa ku Beselehemu ku che Yese. Pakuŵa nalisagulile mwenye pasikati ja achiŵanagwe." 2 Nambo che Samweli ŵatite, "Tinyaule chanti uli? Apikanaga che Sauli ngani syo tachimulaga!" Ambuje Akunnungu ŵansalile, "Njigale ng'ombe jamwana pakwaula ni mwaikaga kweleko njileje, ‘Iiche kukwapelechela mbopesi ja kutinisya Ambuje Akunnungu.’ 3 Mwalaliche che Yese kukupeleka mbopesi ja kutinisya ko ni une tinjinnosya chakupanganya. Nomwe timunjitilile mauta pantwe pamalo pangu mundu jutinjinnosya jula."

4 Che Samweli ŵatesile mpela yaasasile Ambuje Akunnungu, ni ŵajawile ku Beselehemu. Ilongola ŵa musi ŵajawile kukwachingamila ali nkutetemela, ni ŵammusisye, "Ana nnyiche kwa chitendewele?"

5 Che Samweli ŵajanjile, "Elo iiche kwa chitendewele, iiche kukwapelechela mbopesi ja kutinisya Ambuje Akunnungu. Nliŵiche chile kuti nkundikwe ni Akunnungu nipele tujaule kukupeleka mbopesi." Che Samweli ŵantesile che Yese pamo ni achiŵanagwe akundikwe ni Akunnungu, nipele ŵaalaliche kuti nombe nawo apeleche mbopesi jakutinisya.

6 Che Yese ni achiŵanagwe paŵaiche, che Samweli paŵammweni che Eliabu, ŵalisalile muntima, "Kusyene, mundu jwasagulikwe ni Ambuje Akunnungu kuti ajitililwe mauta aŵe mwenye, ni jweleju jwajimi paujo pakwe!" 7 Nambo Ambuje Akunnungu ŵansalile, "Ngasinlola kusalala pane ulewu wakwe. Uneji nankanile pakuŵapo uneji ngangulola indu mpela yakuti kulola ŵandu. Ŵandu akulola usalale chapaasa nambo uneji nguilolaga yamuntima." 8 Nipele che Yese ŵammilasile che Abinadabu ni kunjausya paujo pa che Samweli. Nambo che Samweli ŵatite, "Namose ajuju nganasagulikwa ni Ambuje Akunnungu." 9 Che Yese ŵansalile che Shama apite paujo pa che Samweli, nambo che Samweli ŵatite "Namose ajuju nganasagulikwa ni Ambuje Akunnungu." 10 Che Yese ŵaaŵilasile achiŵanagwe wose saba paujo pa che Samweli nambo che Samweli ŵansalile, "Ambuje Akunnungu nganansagula jwajulijose pasikati ja aŵaŵa." 11 Pelepo che Samweli ŵammusisye che Yese, "Ana ŵanache achalume ŵankwete ali ŵeleŵa pe?"

Che Yese ŵajanjile "Apali jumo jwannondi nambo jweleju akuchinga ngondolo." Che Samweli ŵansalile, "Muntume mundu akammilanje, uweji ngatutama paasi kulya, mpaka jwelejo aiche apano." 12 Nipele che Yese ŵantumile mundu, nombejo ŵaiche najo. Jwele nchanda jo ŵaliji jwanchejewu ni ŵakwete meeso gakusalala ni uwoneche wakusalala. Ambuje Akunnungu ŵansalile che Samweli, "Sambano jwelejo ni jusyenesyene, njimuche munjitilile mauta." 13 Che Samweli ŵajigele nsengo wakwe wauli ni mauta ŵanjitilile che Daudi mauta paujo pa achakulugwe. Kutandilila lyele lyuwa lyo mbumu jwa Akunnungu ŵannyichilile che Daudi kwa machili ni kutamilisya mwa jwelejo ni kwendelechela. Nipele che Samweli ŵausile ku Lama.

14 Nipele mbumu jwa Ambuje Akunnungu ŵannesile che Sauli, ni mbumu jakusakala kutyochela kwa Ambuje Akunnungu ŵanjinjile che Sauli ni kunsausya. 15 Pelepo ŵakutumichila ŵa che Sauli ŵansalile kuti, "Tukuimanyilila mbumu jwakusakala kutyochela kwa Akunnungu akunsausya. 16 Sambano alakwe ambuje ŵetu, ntulajisye uweji ŵakutumichila ŵenu tunsosele mundu jwakumanyilila kuchigomba chingwenyengwenye, ni jwele mbumu jwakusakala kutyochela kwa Akunnungu patannyichilile, mundu jo chagombe ching'wenyeng'wenye ni mmwe chimpate eja."

17 Che Sauli ŵaasalile ŵakutumichila ŵakwe, "Elo musosele jwelejo mundu jwakukombola kuchigomba ching'wenyeng'wenye yambone jo munyichisye apano." 18 Jwanchanda jumo pasikati ja ŵakutumichila ŵatite, "Nammweni nchanda jumo jwa che Yese, jwa musi wa ku Beselehemu. Nchanda jo akukombola kuchityala chingwenyengwenye. Nchanda jo ali jwakukangamala ni jwakuimanyilila kuputa ngondo, akwete lunda mkuŵecheta ni sooni ali mundu jwakusalala. Ambuje Akunnungu ali pamo ni jwelejo."

19 Kwayele che Sauli ŵatumile utenga ku che Yese, waukuti, "Mumbelechele che Daudi mwanagwenu jwakuchinga ngondolo." 20 Che Yese ŵampeleche che Daudi ku che Sauli pamo ni mbunda jwatwichile mikate, ni nsaku wa divai ni kambusi. 21 Che Daudi ŵaiche kwa che Sauli ni kugatanda masengo gakwe. Che Sauli ŵannonyele kwannope mpaka ŵantesile aŵe jwakunjigalila yakumenyanilana yakwe. 22 Nipele che Sauli ŵatumile utenga kwa che Yese waukuti, "Nonyelwe ni che Daudi, mwaleche atame kunokuno, aandumichile." 23 Kakajinji ajula mbumu jwakusakala kutyochela kwa Akunnungu paŵanyichilile che Sauli, che Daudi ŵajigalaga chingwenyengwenye chakwe ni kutanda kuchigomba, ni mbumu jo jannesile che Sauli, nombe che Sauli ŵalipikanaga eja.