1 Che Samweli ŵansalile che Sauli, "Ambuje Akunnungu ŵandumile une nanjitilile mauta mme mwenye jwa ŵandu ŵakwe Ŵaisilaeli. Sambano mpilikanile maloŵe ga Ambuje Akunnungu. 2 Ambuje Akunnungu akuti yeleyi, ‘Tinaajamuche Ŵaamaleki ligongo ŵaaputile Ŵaisilaeli paŵaliji nkutyoka ku Misili. 3 Sambano njaule nkaagungumuchile ni kujonanga indu yao yakwete. Ngasimwaleka ŵajumi, nkaaulaje ŵanawose: Achalume ni achakongwe wakwe ni ŵanache achanandi ni ŵakonga, ni ng'ombe ni ngondolo ni ngamia ni mbunda.’"

4 Che Sauli ŵaaŵilasile ŵangondo ŵakwe ni kwaŵalanga kwele ku Telaimu ko. Kwaliji ni ŵangondo ŵakwenda ŵapasi laki mbili ŵakutyochela ku Isilaeli ni elufu kumi kutyochela ku Yuda. 5 Kanyuma nsyene jo pamo ni ŵandu ŵakwe ŵajawile ku musi wa Ŵaamaleki, nipele ŵalijuŵile mwichemba kuti ŵajuŵilile. 6 Che Sauli ŵaasalile Ŵakeni, "Ntyokangane pasikati ja Ŵaamaleki kogopa kwajonanjila pamo nawo. Pakuŵapo ŵanyamwe mwaatendele indu yambone Ŵaisilaeli paŵatyochelaga ku Misili." Nipele Ŵakeni ŵatyosile pasikati ja Ŵaamaleki.

7 Nipele che Sauli ŵaapundile Ŵaamaleki pa ngondo kutandila ku Hafila mpaka ku Shuli kungopochelo lyuŵa kwa Misili. 8 Ŵankamwile mwenye che Agagi jwa Ŵaamaleki ali jwanjumi ni ŵandu ŵakwe ŵaauleje ni lipanga. 9 Nambo che Sauli ni ŵangondo ŵakwe ŵalesile che Agagi ali wajumi, pamo ni ngondolo syakwimbala ni ng'ombe syakwimbala ni ng'ombe sya mwana ni ngondolo sya mwana ni chilichose chichawonekaga chakusalala indu yo nganasaka kuchijonanga. Nambo indu yose yanganaisaka ni yakuganda ŵaijonasile.

10 Ambuje Akunnungu ŵansalile che Samweli kuti, 11 "Ngulilasika kuti nantesile che Sauli kuŵa mwenye. Pakuŵa agalawiche nipele alesile kuunguya une kwakuti nganagajitichisya malamusi gangu." Che Samweli ŵatumbile, nipele ŵachesisye chilo chosepe kwalilila Ambuje Akunnungu. 12 Che Samweli ŵapilikene kuti che Sauli aiche ku Kalimeli ni ajimicheliganga lyekulungwa lya chikumbuchisyo cha ukulu wakwe, ni sooni apite ku Giligali. Kwayele kundaŵi kwakwe che Samweli ŵajimwiche kundaŵipe ŵapite kukusimana ni che Sauli. 13 Che Samweli paŵansimene che Sauli, che Sauli ŵansalile che Samweli, "Ambuje Akunnungu ampe upile, Ndesile malajisyo ga Ambuje Akunnungu."

14 Che Samweli ŵausisye, "Ana kulila kwa ngondolo ku ni chichi? ni akuku kulila kwa ng'ombe kwangukupikana ku ni chichi?" 15 Che Sauli ŵajanjile, "Ŵangondo ŵangu ŵaijigele yeleyi kwa Ŵaamaleki, nganaulaga asila ngondolo ni ng'ombe syakwimbala, ŵasilesile kuti asityosye mbopesi kwa Ambuje Akunnungu ŵao, nambo ine yose tuuleje." 16 Che Samweli ŵansalile kuti, "Mmyalale,! Tinansalile chindu chaasalile Ambuje Akunnungu chilo cha lelojino." Che Sauli ŵajanjile, "Muusalile."

17 Che Samweli ŵansalile, "Nachiŵamuno mwalionaga kuti mmwe nganimma ŵakumanyika, ana nganitendekwa kuwa chilongola jwa ngosyo sya ku Isilaeli? Ambuje Akunnungu ŵanjitilile mauta kuti mme mwenye jwa Ŵaisilaeli. 18 Ambuje Akunnungu paŵantumile ŵansalile kuti, ‘Njaule nkaaulaje aŵala Ŵaamaleki ŵali ni sambi, nkamenyane nawo mpaka nkaaulaje ŵanawose.’ 19 Ligongo chichi basi nganinlijitichisya liloŵe lya Ambuje Akunnungu? Ligongo chichi mwautuchile kusumula indu, ni kutenda ugongomalo paujo pa Ambuje Akunnungu?"

20 Che Sauli ŵajanjile, "Une nagapikanile maloŵe ga Ambuje Akunnungu. Najawile akula kuŵandumile Ambuje Akunnungu, naauleje Ŵaamaleki wosepe ni nanjigele che Agagi mwenye jwa Ŵaamaleki ni kunnyikanawo apano. 21 Nambo ŵangondo ŵangu wajigele Ngondolo ni ng'ombe syakwimbala siŵasumwile. Ŵaiche nasyo akuno ku Giligali kuti ŵapelechele Ambuje Akunnungu jwenu mpela mbopesi sya kutinisya."

22 Pelepo che Samweli ŵansalile,

"Ana Ambuje Akunnungu akunonyelwa kwannope ni ichichi:

Mbopesi syakutinisya pamooto ni sya utandi

kupunda kwitichisya liloŵe lyakwe?

Nnole, kuli kwambone kwajitichisya Ambuje kupunda kupeleka mbopesi syakutinisya

kuli kwambone kwapilikanila kupunda kwapelechela mbopesi sya malo gakunakana ga mikambaku ja ngondolo.

23 Kwagalauka Ambuje Akunnungu kuli mpela usaŵi

ni chibuli chili mpela ugongomalo wa kuipopelela inyago.

Pakuŵa ngakanile makanyo ga Ambuje Akunnungu,

nombewo aukanile umwenye wenu."

24 Che Sauli ŵansalile che Samweli, "Ndesile sambi. Nagalesile malajisyo ga Ambuje Akunnungu, ni makanyo genu, ligongo naajogopaga ŵandu, nipele nagatesile gaŵagasachile ŵanyawo. 25 Nambo sambano ngunchondelela, muunechelesye sambi jangu. Muungunde muje pamo nomwe kuti ngaapopelele Ambuje Akunnungu." 26 Che Samweli ŵajanjile, "Une ngamuja yalumo ni mmwe. Pakuŵapo mmwejo mwagakanile malamusi ga Ambuje Akunnungu, nombe nawo ankanile mmwejo nkajendelechela kuŵa mwenye jwa Ŵaisilaeli." 27 Che Samweli paŵagalaukaga kuti ajaule, che Sauli ŵakamwile lujenje lwa mwinjilo wakwe, nipele lwapapwiche. 28 Nipele che Samweli ŵansalile che Sauli, "Kutandilila lelojino Ambuje Akunnungu ausumwile umwenye wa Ŵaisilaeli kutyoka kwa mmwejo lelo ŵaapele ŵane ŵali ŵambone kumpunda mmwejo. 29 Sooni Ambuje Akunnungu ŵaali ukulu wa ku Isilaeli ngasala unami namose ngaagalausya nganisyo syakwe, pakuŵapo ŵelewo nganaŵa mundu mwakwichila kugalausya nganisyo syakwe." 30 Che Sauli ŵajanjile, "Ndesile sambi. Namose yeleyo choonde ngummenda munjimbichisye paujo pa ilongola ŵa ŵandu ŵangu Ŵaisilaeli. Muungunde muje pamo ni mmwe kuti ngaapopelele Ambuje Akunnungu, Akunnungu ŵenu."

31 Nipele che Samweli ŵaujile yalumo ni che Sauli mpaka ku Giligali nipele che Sauli ŵaapopelele Ambuje Akunnungu. 32 Nipele che Samweli ŵatite, "Munnyiche nawo che Agagi mwenye jwa Ŵaamaleki." Che Agagi ŵajawile kwa che Samweli ali nkusangalala pakuŵa ŵaganisyaga kuti, "Panepa anechelele, ngaamulajikwa." 33 Che Samweli ŵatite, "Mpela muwutendele upanga wenu kwasandusya achakongwe ŵajinji kuŵa ŵangali ŵanache, iyoyo sambano achikulu ŵenu nombe tachiŵa jwangali mwanache pasikati pa achakongwe ŵane." Ni ŵankatile che Agagi iŵaloiŵalo paujo pa Ambuje Akunnungu kwele ku Giligali ko. 34 Nipele che Samweli ŵajawile ku Lama, ni mwenye che Sauli ŵakwesisye kuuja kumangwakwe ku Gibea ko. 35 Kutandilila lyuŵa lyo, che Samweli nganawonegana sooni ni che Sauli, mpaka lyuŵa liŵawile che Samweli, nachiŵamuno che Samweli ŵasupwiche ligongo li che Sauli. Ni Ambuje Akunnungu ŵalilasiche kuti ŵaasagwile che Sauli aŵe mwenye pasikati ja Ŵaisilaeli.