1 Lyuŵa limo che Yonasani mwanagwe che Sauli mwenye, ŵansalile nchanda jwakwe jwakunjigalila yakumenyanilana, "Njise, twende tujombochele ku chigono cha Ŵafilisiti." Nambo che Yonasani nganansalila atatigwe chele chindu cho. 2 Pa moŵa go che Sauli ŵaliji aŵisile chigono kuusi kwa chitela cha mkomamanga kwele ku Migiloni paasa pa musi wa ku Gibea, ali pamo ni ŵangondo mia sita. 3 Jwambopesi juŵawalaga chisibao ŵaliji che Ahiya mwanache ju che Ahitubu nlongo njakwe che Ikabodi mwanache ju che Finehasi, mwanagwe che Eli juŵaliji jwambopesi jwa Ambuje Akunnungu musi wa ku Shilo. Ngapagwa juŵaimanyililaga kuti che Yonasani ŵaliji atyosile pachigono.

4 Kila upande uwatiji che Yonasani apite kuti aiche pa chigono cha Ŵafilisiti kwaliji ni lwala siŵili sisyaliji ni nduluko syekulungwa. Nduluko jimo jaŵilanjikwe Bosesi ni nduluko jine jaŵilanjikwe Sene. 5 Nduluko jimo jaliji chakumpoto kulolegana ni musi wa ku Mikimashi ni nduluko jine jaliji kulujenda kulolegana ni musi wa ku Gibea.

6 Che Yonasani ŵansalile nchanda jwakunjigalila yakumenyanilana jula, "Njise tujaule upaande waaŵili, akula ku chigono cha ŵandu ŵangakwamanyilila Akununnungu ŵanganaumbale ŵa. Panepa Ambuje Akunnungu chatukamuchisye, pakuŵa Ambuje Akunnungu ngakukulupusya kwa ligongo lya kutupa kwa ŵandu pane ungatupa."

7 Jwanchanda jwakunjigalila yakumenyanilana jula ŵajanjile, "Elo uneji ndili pamo ni mmwe, pakuŵapo chinkuchiganisya mmwe ni chinguchiganisya une." 8 Che Yonasani ŵansalile, "Elo ukotopasyo wangu ni au, tutujomboche twajaulileje ŵandu ŵala kuti akatuwone. 9 Iŵaga chatusalile kuti twalindilile mpaka aiche kutuli uwe, nipele tutujime papopo ni ngatwajaulila. 10 Nambo atiji tukwele twajaulile, nipele tutukwele kwajaulila pakuŵa chelecho chichiŵe chimanyisyo chakuti Ambuje Akunnungu chatukombolesye kwapunda." 11 Nipele ŵalikopwesye kuti awoneche ni Ŵafilisiti. Ŵafilisiti paŵaaweni ŵatite, "Nnole Ŵaebulania ŵala ali nkukopoka mmasimbo muŵalisisile." 12 Ŵafilisiti ŵaŵaliji nkulindilila pachigono ŵammilasile che Yonasani ni ajula nchanda juŵanjigalile yakumenyanilana "Njise akuno, nchiwone!"

Che Yonasani ŵansalile nchanda jula, "Nkwele twende, Ambuje Akunnungu ŵaatesile Ŵaisilaeli ŵaapunde." 13 Nipele che Yonasani ŵakwesile pa nduluko pala chakwaŵa ni nchanda jwakwe jula ali nkukuya chapanyuma ali nkwaulaga Ŵafilisiti. 14 Ŵandu ŵaŵaauleje che Yonasani ni nchanda jwakwe paŵagungumuchile kaandanda ŵaliji ŵandu ishilini, ŵaaulajile pa malo gakunandipa gakwanila nusu heka. 15 Ŵangondo wose ŵa Ŵafilisiti ŵatandite kulyulyuganya, aŵala ŵangondo ŵaŵaliji pachigono ŵautuchile mmamigunda namose ŵangondo ŵaŵalindililaga pa chigono ni ŵakugungumuchila ŵatetemele kwaligongo lya woga. Kwaliji ni chindendemesi pamalo pala ni pele paliji ni woga wekulunga wannope uŵaichisye Akunnungu.

16 Ŵakuuchilichisya ŵa che Sauli ku Gibea ko mu chilambo cha Benjamini ŵaaweni ŵandu ŵajinji ali nkuutuka akuno ni akunokuno. 17 Che Sauli ŵaasalile ŵandu ŵaŵaliji pamo nawo, "Nliŵalanje kuti tuimanyilile iŵaga pana ŵatyosile." Ŵaŵalasile nipele che Yonasani ni nchanda jwakwe jwakunjigalila yakumenyanilana nganawoneka. 18 Che Sauli ŵansalile jwambopesi che Ahiya, "Njisenawo lisanduku lya Ambuje Akunnungu." Pa katema ko lisanduku lya lilangano lya Ambuje Akunnungu lyaliji pamo ni Ŵaisilaeli. 19 Che Sauli paŵaliji chiŵela nkuŵecheta ni jwambopesi, masegwe ga lipamba pachigono cha Ŵafilisiti gapundile kwannope. Kwayele che Sauli ŵansalile jwambopesi, "Nneche, nkaikanawo lisanduku lya lilangano lya Ambuje Akunnungu lyo." 20 Nipele che Sauli ni ŵandu ŵakwe ŵaliŵisile chile ni kwaula ku ngondo kukumenyana ni Ŵafilisiti. Nambo Ŵafilisiti ali alyulyugene kwannope ali nkumenyana achinsyene pe ni mapanga gao. 21 Ŵaebulania ŵaŵaliji ku upaande wa Ŵafilisiti, aŵala ŵaŵajawile nawo ku chigono, ŵatyosile ŵaapite kuŵa pamo ni ŵangondo wa Ŵaisilaeli ŵaŵaliji pamo ni che Sauli ni che Yonasani. 22 Ni Ŵaisilaeli ŵane ŵaŵaliji alisisile ku chilambo cha ikwesya cha Efulaimu, paŵapilikene kuti Ŵafilisiti ali nkuutuka, nombe nawo ŵaakuiye ni kwaputa.

23 Kwayele Ambuje Akunnungu ŵaapele Ŵaisilaeli kupunda. Ngondo jajenele mpaka jaiche ku Beti Aveni.

24 Lyele lyuwa lyo Ŵaisilaeli ŵaliji alepetele ligongo lya sala, pakuŵa che Sauli ŵalumbisye ŵandu kuti, "Mundu jwalijose juchalye chakulya chilichose lelo lyuŵa likanaŵe kutiŵila, ni sooni une ngunaŵe kwauchisya ŵammagongo ŵangu alweseche." Kwayele pangali mundu jwalijose juŵalile chakulya chilichose lyuŵa lila lyose. 25 Ŵangondo wose paŵaiche mu ukweti ŵauweni uchi uli ujenele paasi. 26 Pawajinjile mu ukweti wauweni uchi uli nkusulula, nambo nganapagwa mundu jwajuli jose juŵalinjile kulapita uchi wo ligongo ŵajogopaga kulumbila kuŵalumbilile kula. 27 Nambo che Yonasani ŵaliji ŵangapikana atatigwe paŵalumbisye ŵandu. Kwayele ŵalugolwesye lubokola luŵaliji nawo, ŵalutoŵele pa liseega ŵalapite uchi ula. Pelepo ŵapatile machili. 28 Mundu jumo ŵansalile, "Atati ŵenu ŵaalumbisye kwachikali ŵandu achitiji, ‘Mundu jwalijose juchalye chakulya lelo alweseche.’ Lyelelyo ni ligongo ŵandu alepetele." 29 Che Yonasani ŵajanjile, "Atati ŵangu ŵaichisye wandu malagasyo. Sambano uneji ngulipikana ngwete machili ligongo napite uchi kanandi. 30 Ŵangondo ŵetu akalile achila chakulya chiŵasumwile kutyochela kwa ŵammagongo ŵao, Ŵafilisiti ŵajinji akaulajikwe!"

31 Pa lyuŵa lila Ŵaisilaeli ŵaaputile Ŵafilisiti kutandilila ku Mikimashi mpaka ku Aiyaloni. Kwayele Ŵaisilaeli ŵamalilwe machili kwannope ligongo lya sala, 32 nipele ŵautuchile ku indu iŵasumwile kwa ŵammagongo ila, ŵajigele ngondolo ni ngombe jankambaku ni kuisikata jikanaŵe miasi kumala kusulula ŵajiŵawile nyamajo ni kulya. 33 Ŵandu ŵane ŵansalile che Sauli, "Nnole ŵandu akutenda sambi kwa Ambuje Akunnungu pakutauna nyama jajili ni miasi." Che Sauli ŵaasalile ŵandu "Mwanya mmela ŵandu wangakulupilichika kwa Ambuje Akunnungu. Nligalambule liganga lyekulungwa apano pandili pano." 34 Ni ŵaasalile sooni, "Njaule nkaasalile ŵandu wose aicheje ni ngombe ni ngondolo syao, asikite aleche miasi jisulule ni akulumisyeje ni kulya kunokuno nambo akatenda sambi kwa Ambuje Akunnungu kwa kulya nyama jajili ni miasi." Kwayele kila mundu wajiichisye ngombe jakwe chilo chila ni kusikitila papopo. 35 Nipele che Sauli ŵaataŵile Ambuje Akunnungu chilisa. Keleko kaliji kaandanda kwa Che sauli kwataŵila Ambuje Akunnungu chilisa.

36 Nipele che Sauli ŵaasalile ŵandu, "Chilo twende twakuilisye Ŵafilisiti, tukaagungumuchile ni kwasumula ipanje yao mpaka kuninkucha, tukanneka jwanjumi mundu jwalijose." Ŵandu ŵansalile "Ntendeje chilichose chinkuchiona chili chambone." Nambo jwambopesi ŵaasalile, "Twausye Ambuje Akunnungu kaje."

37 Kwayele che Sauli ŵausisye kwa Akunnungu kuti, "Ana nduluche nyaule ngaagungumuchile Ŵafilisiti? Uli, timwakamuchisye Ŵaisilaeli ŵaapunde?" Nambo Akunnungu nganajanga chilichose pa lyuŵa lyo. 38 Pelepo che Sauli ŵatite, "Njisangane apano mwanya ilongola ŵa ŵandu ŵangondo, kuti tumanyilile sambi chi jitendekwe lelo. 39 Ngulumbila kwa Ambuje Akunnungu ŵaali ŵajumi ni ŵakuchikulupusya chilambo cha ku Isilaeli, namose iŵeje mwanangu che Jonasani akusachilwa aulajikwe." Nambo nganapagwa mundu juŵajanjile chilichose. 40 Kwayele che Sauli ŵaasalile, "Ŵanyamwe wose njimanje upaande ula, uneji ni mwanangu che Yonasani tutujime au upaande wu." Ŵandu ŵajanjile, "Ntendeje chilichose chinkuchiwona chili chambone." 41 Che Sauli ŵapopesile achitiji, "Alakwe Ambuje Akunnungu jwa ku Isilaeli, kwachichi nganimuunyanga une jwakutumichila jwenu? Alakwe Ambuje Akunnungu jwa ku Isilaeli, iŵaga uneji ni juneŵile pane che Yonasani mwanangu, nipele nlamule kwa liganga lyalikuŵilanjikwa ulimu. Nambo iŵaga ŵandu ŵenu Ŵaisilaeli ni ŵaleŵile, nlamule kwa liganga lyalikuŵilanjikwa Tumimu." Che Yonasani ni che Sauli ŵasimanikwe ni chileŵo, nambo ŵandu nganasimanikwa ni chileŵo. 42 Che Sauli ŵatite, "Mpijeje kula pasikati jangu ni che Yonasani mwanangu." Che Yonasani ŵasimanikwe ni chileŵo. 43 Pelepo che Sauli ŵansalile che Yonasani, "Muusalile ntesile ichichi?" Che Yonasani ŵajanjile, "Nalapite uchi kanandi ni lubokola lwangu. Ndili apano ni sooni ndili chile kuwa." 44 Che Sauli ŵatite, "Akunnungu aamulaje iwaga mmwe che Yonasani ngamulajikwa."

45 Nambo ŵandu ŵansalile che Sauli, "Ana nkuti awe che Yonasani jwapundile ngondo jajikulungwa jakwakulupusya Ŵaisilaeli? Yeleyo ngaikomboleka hata kanandi. Tukulumbila kwa Ambuje Akunnungu ŵajumi, namose luumbo lwa muntwe wakwe ngalupatuchila paasi. Chatesile lelo, atesile kwa ukamuchisyo wa Ambuje Akunnungu." Kwayele ŵandu ŵasiŵile kuti che Yonasani ni akaulajikwa.

46 Nipele che Sauli ŵalesile kwakuilisya Ŵafilisiti, nombe Ŵafilisiti ŵausile muchilambo chao.

47 Che Sauli paŵaliji mwenye jwa ku Isilaeli, ŵamenyene ni ŵammagongo ŵaŵansyungulile kulikose. Ŵamenyene ni Ŵamoabu ni Ŵaamoni ni Ŵaedomu ni mamwenye ŵa ku Soba ni Ŵafilisiti. Palipose paŵamenyene ngondo ŵapundile. 48 Ŵamenyene kwakulimbangana ni ŵaapundile Ŵaamaleki. Ŵaakulupwisye Ŵaisilaeli ni ŵandu wose ŵaŵaagungumuchile.

49 Ŵanache ŵachilume ŵa che Sauli ŵaliji che Yonasani ni che Ishivi ni che Maliki Shua. Ŵanache ŵachikongwe ŵaliji ŵaŵili, jwaandanda kupangwa jwaŵilanjikwe che Melabu ni jwannunguni jwaŵilanjikwe che Mikali. 50 Jwankongwe jwa che Sauli jwaŵilanjikwe che Ahinoamu mwali jwa che Ahimaasi. Jwankulu jwa ŵangondo jwa che Sauli jwaŵilanjikwe che Abuneli mwanache ju che Neli, njombagwe che Sauli. 51 Atatigwe che Sauli, yaani che Kishi ni atatigwe che Abuneli yaani che Neli ŵanawose ŵaliji ŵanache wachilule ŵa che Abieli.

52 Katema kose che Sauli pawaliji mwenye kwaliji ni ngondo jajikulungwa ni Ŵafilisiti, ni katema kose che Sauli ammonaga mundu jwamachili panepa jwakulimba ntima, ŵanjinjisyaga mu mpingo ŵa ŵangondo.