1 Nipele, Ŵafilisiti ŵaputene ngondo ni Ŵaisilaeli, ni Ŵaisilaeli ŵaautwiche Ŵafilisiti, ni achajinji ŵaulajikwe ku chitumbi cha Giliboa. 2 Nambo Ŵafilisiti ŵaagungumuchile che Sauli ni achiŵanagwe, nipele ŵaauleje che Yonasani ni che Abinadabu ni che Maliki Shua, ŵanache ŵakwe che Sauli. 3 Ngondo jaliji jekulungwa kwannope kwa che Sauli. Ŵandu ŵakuputa mipamba paŵammweni, ŵammulesye ŵamba. 4 Nipele che Sauli ŵansalile mundu juŵanjigalilaga yakumenyanilana yakwe, "Nswekule lipanga lyenu muusome, mumulaje, kuti aŵa ŵandu ŵangaumbala ŵa pitaiche tachitanda kuuseka une ni kuumulaga." Nambo mundu juŵanjigalilaga yakumenyanilana jula nganalinga ligongo ŵajogopaga kwannope. Kwayele, che Sauli ŵajigele lipanga lyakwe nsyene ni kuligwilila. 5 Pelepo mundu juŵanjigalilaga yakumenyanila paŵaiwe kuti che Sauli aŵile, nombejo ŵaligwilile lipanga lyakwe, ŵawile pamo ni che Sauli. 6 Yeleyo ni iyatite kuwa che Sauli, ni ŵanache ŵakwe ŵatatu, nombe ni mundu juŵanjigalilaga yakumenyanila yakwe pamo ni ŵandu ŵakwe wose pa lyuŵa limpepe lilyolyo. 7 Ŵaisilaeli ŵaŵaliji pesi pa lichemba lya Yesileeli, ni ŵane ŵaŵaliji kungopochelo lyuŵa kwa lusulo lwa Yolodani paŵaiweni kuti Wangondo ŵa Ŵaisilaeli autwiche, nombe che Sauli ni ŵanache awilenje, ŵasamile ni ŵajilesile misi jao. Nombe Ŵafilisiti ŵajawile kutama mu misi jo.

8 Malaŵi jakwe, Ŵafilisiti paŵajawile kukujigala indu ya ŵandu ŵaŵauleje ŵala ŵasimene che Sauli ni ŵanache ŵakwe ŵatatu ali awile pa litumbi lya Giliboa. 9 Ŵaukatile ntwe wa che Sauli ni kummula yakuwala yakwe, nipele ŵaatumile ŵantenga ku chilambo chose cha Ŵafilisiti kulalika ngani jambone mu nyuumba ja inyago yao ni kwa ŵandu ŵao. 10 Yakumenyanilana yakwe ila ŵaiŵisile mu nyuumba ja kwapopelela nnungu jwao Ashitaloti, ni ŵachikoleche chiilu chakwe palipupa lya musi wa ku Beti Sheani.

11 Nambo ŵandu ŵakutama musi wa ku Yabesh Gileadi paŵapilikene iŵatite kwapanganyichisya che Sauli ni Ŵafilisiti, 12 ŵangondo ŵakulimba ntima wose ŵatyosile, ŵajesile chilo chosepe mpaka ku Beti Sheani, ŵaitulwisye pepupa po ilu ya che Sauli ni ŵanache ŵakwe. Ŵaichenago mpaka ku Yabeshi ni kujijocha kweleko. 13 Kanyuma, ŵajigele maupa gao ni kugasika pasi pa chitela cha ukwesu kwele ku Yabeshi ko; nipele ŵataŵile kwa moŵa saba.