1 Lisanduku lya lilangano lya Ambuje Akunnungu palyatemi kwa Ŵafilisiti kwa miesi saba, 2 Ŵafilisiti ŵaaŵilasile ŵambopesi ŵa Dagoni ni ŵachisango ŵao ni kwausya, "Ana tutende ichichi nkati lisanduku lya Lilangano lya Ambuje Akunnungu? Ntusalile yachitujile kuliusya ku Isilaeli."

3 Ni ŵanyawo ŵajanjile, "Iŵaga nkusaka kuliusya lisanduku lya lilangano lya Ambuje Akunnungu ŵa Ŵaisilaeli, nkaliusya makono pe. Nambo ntende yaili yose nliusye ni sadaka ja kutyosya chileŵo nipele chi tinlame. Ni ŵanyamwe chimmanyilile kwachichi Akunnungu wanjamukaga."

4 Ŵandu ni ŵausisye, "Ana twajauchisye sadaka chi jakutyosya chileŵo jo?" Ni ŵaajanjile, "Inyago nsano ya sahabu yaili mpela yakuimbila, ni inyago nsano ya sahabu yaili mpela mapuku, chilichose chikwima pamalo pa chilongola jumo jwa Ŵafilisiti pakuŵapo ulwele uwansimene ŵanyamwe ni ulwele uwowo uwasimene ilongola ŵenu. 5 Kwayele nkolosye inyago ya yakuimbila yenu, ni inyago ya mapuku genu, indu yaikuchitenda chilambo chenu chijonasiche kuti mwape luchimbichimbi Akunnungu ŵa Ŵaisilaeli. Panepa taleche kwajamuka ŵanyamwe mwachinsyene, minungu jenu ni chilambo chenu. 6 Kwachichi nkulimba ntima mpela Ŵamisili ni Falao iŵatite kutenda? Ana Akunnungu paŵatendele kwa chikali Ŵamisili, ŵele ŵandu wo nganiŵalechela Ŵaisilaeli ajaulanje? 7 Nipele nlinganye mutuka jampya ni ng'ombe siŵili syasikonjesya syanganisitawikwe likongwa chitandilile. Nsitaŵe syele ngombe syo mmutuka nambo ŵanache ŵakwe mwausye ni kwajinjisya mwichinga mwao. 8 Nlijigale lisanduku lya lilangano lya Ambuje Akunnungu ni kuliŵika mmutuka mo, ni pambali pakwe mmiche aila inyago ya sahabu inkunjauchisya nti sadaka ja kutyosya chileŵo chenu. Nipele nlileche lijaule kulikusaka kwaula. 9 Nipele nloleje, iŵaga mutuka jo jikwamba kwaula ku nsinda wa ku Beti Shemeshi, pelepo chitumanyilile kuti jwatuichisye chitapano chi ali Ambuje Akunnungu. Nambo iŵaga ngajikwaula kweleko, nipele tutwimanyilile kuti ngaŵa nkono wakwe watuputile, nambo malilo ga gatusimene kwa kutapana kwetu."

10 Nipele ŵatesile mpela iŵatite kusalilwa, ŵasijigele ng'ombe siŵili sila ni kusitaŵila mutuka, ni ŵanache ŵakwe ŵaalesile mu lichinga. 11 Ŵaliŵisile lisanduku lya lilangano lya Ambuje Akunnungu mmutuka mo pamo ni lisanduku lyana inyago ya sahabu yelandane ni mapuku ni aila inyago ya yakwimbila. 12 Ng'ombe sila syagambile kwaula ku musi wa ku Beti Shemeshi pangali kugalauchila kulyo atamuno kunchiji, syaliji nkulila pisyajaulaga. Ilongola ŵa Ŵafilisiti ŵala ŵaakuilisye mpaka mumpika wa ku Beti Shemeshi.

13 Ŵandu ŵa ku Beti Shemeshi ŵaliji nkugungula ngano mu chiŵata. Paŵanyakwile mitwe jawo ni kulolechesya ŵaliweni lisanduku lya lilangano lya Ambuje Akunnungu, ni ŵasangalele kwannope. 14 Mutuka jo jajawile kungunda wa che Yoshua, mundu juŵatamaga ku Beti Shemeshi. Palyaiche pelepo lyajimi chiŵandika ni liganga lyekulungwa. Ŵandu ŵajipaswile sasu mutuka jila, nipele ŵasikite ngombe syo ni kusityosya mbopesi jakutinisya kwa Ambuje Akunnungu. 15 Nombe Ŵalawi ŵalitulwisye lisanduku lya lilangano lya Ambuje Akunnungu ni alila lisanduku lyalili ni inyago ya sahabu ni kuiŵika pachanya pa liganga lyekulungwa lila. Nipele pa lyuŵa lyo ŵandu ŵa ku Beti Shemeshi ŵapeleche mbopesi syakutinisya ni mbopesi sine kwa Ambuje Akunnungu. 16 Ilongola nsano ŵa Ŵafilisiti ŵala paŵaiweni yeleyo ŵausile ku Ekiloni pa lyuŵa lilyolyo.

17 Ŵafilisiti ŵaijawisye inyago nsano ya sahabu ya yakwimbila ila kwa Ambuje Akunnungu nti sadaka jakutyosya chileŵo chao, chinyago chimo kwa kila musi umo: Musi wa ku Ashidodi ni ku Gasa ni ku Ashikeloni ni ku Gati ni ku Ekiloni. 18 Sooni ŵaijawisye inyago nsano ya sahabu ya mapuku malinga ni uŵalaje wa misi jose ja Ŵafilisiti jijatawalikwe ni ilongola nsano ŵa Ŵafilisiti. Misi jo jaliji ni makome ni misinda jakwe nganijisyunguchiswa likumba. Liganga lyekulungwa lila ku ngunda wa che Yoshua jwa musi wa ku Beti Shemeshi apala peuto paŵaliwisile lisanduku lya lilangano lya Ambuje Akunnungu, lili umboni wa chele chindu cho mpaka lelojino.

19 Ambuje Akunnungu ŵaauleje ŵandu sabini ŵakutama musi ŵa ku Beti Shemeshi, ligongo ŵalingulile mulisanduku lya lilangano lya Ambuje Akunnungu. Ŵandu ŵalisile malilo ligongo Ambuje Akunnungu ŵajamwiche kwa chikali.

20 Nipele ŵandu ŵakutama ku musi wa ku Beti Shemeshi ŵatite, "Ana ŵani chakombole kulama paujo pa Ambuje Akunnungu, ŵeleŵa Akunnungu ŵaakukundikwa kupopelelwa? Ni lisanduku lya lilangano lya Ambuje Akunnungu tilichijaula kwapi pakuti lityoche akuno?" 21 Ni ŵaatumile ŵantenga kwaula kwa ŵandu ŵakutama ku musi wa ku Kiliati Yealimu, akajile kuti, "Ŵafilisiti aliusisye lisanduku lya lilangano lya Ambuje Akunnungu, njise kwajigale."