1 Kwayele ŵandu ŵa ku Kiliati Yealimu ŵajawile ni kulijigala lisanduku lya lilangano lya Ambuje Akunnungu, ŵalijawisye ku nyuumba ji che Abinadabu, juŵatamaga ku chitumbi. Ŵantesile akundikwe kwa kwapopelela Akunnungu mwanagwe jwannume jwakuŵilanjikwa che Eleasali kuti aŵe jwakulilolela lisanduku lyo.

2 Lisanduku lya lilangano lya Ambuje Akunnungu lyatemi ku Kiliati Yealimu kwa yaka ishilini. Pa kele katema ko Ŵaisilaeli wose ŵaliji nkulilasika nombewo ŵapopesile kwa Ambuje Akunnungu kuti ŵakamusye.

3 Che Samweli ŵaasalile Ŵaisilaeli kuti, "Iŵaga nkwaujilila Ambuje Akunnungu ni mitima jenu jose nkusachilwa ntyosye minungu josepe ja chilendo ni inyago ya nnungu jwankongwe Ashitaloti. Mungalauchile Ambuje Akunnungu ni mitima jenu, ni kwatumichila ŵawowo pe, nombewo tachinkulupusya mmakono mwa Ŵafilisiti." 4 Kwayele Ŵaisilaeli ŵatyosisye inyago ya minungu ja Baali ni Ashitaloti ni kwatumichila Ambuje Akunnungu jikape.

5 Nipele, che Samweli ŵaasalile ilongola kuti "Mwaŵilanje Ŵaisilaeli wose asongangane ku Misipa, ni kweleko tingaaŵende Ambuje Akunnungu kwaligongo lyenu." 6 Kwayele Ŵaisilaeli wose ŵasongangene kwele ku Misipa ko. Ŵagatechile meesi kutyochela ku lusulo ni kugajita paujo pa Ambuje Akunnungu kulosya kuti ali mmasauko, ŵataŵile lyuŵa lila lyose ni kuti, "Tutesile sambi paujo pa Ambuje Akunnungu." Che Samweli ni juŵaliji jwakulamula jwa Ŵaisilaeli kwele ku Misipa ko.

7 Katema Ŵafilisiti paŵapilikene kuti Ŵaisilaeli asongangene ku Misipa ko, ilongola nsano ŵa Ŵafilisi ŵajawile kukwagungumuchila. Ŵaisilaeli paŵapilikene nkati ngani jo ŵajogwepe. 8 Nipele ŵansalile che Samweli, "Nkaleka kupopela kwa Ambuje Akunnungu, Akunnungu ŵetu, kuti atukulupusye kwa Ŵafilisiti wo." 9 Nipele che Samweli ŵajigele kangondolo kakonga ŵampelechele jose jene Ambuje Akunnungu nti mbopesi jakutinisya. Pelepo che Samweli ŵapopesile kwa Ambuje Akunnungu kwaligongo lya Ŵaisilaeli, nombe Ambuje ŵajanjile lipopelo lyakwe. 10 Katema che Samweli paŵaliji nkupeleka mbopesi jakutinisya jila, Ŵafilisiti ŵaaŵandichile Ŵaisilaeli kuti ŵaagungumuchile. Nambo Ambuje Akunnungu ŵaajogoisye Ŵafilisiti ni liloŵe lya njasi kutyochela kwinani ni kwalyulyuganya nnope, mwakuti ŵapwilingene paujo pa Ŵaisilaeli. 11 Ŵaisilaeli ŵautwisye Ŵafilisiti kutyochela ku Misipa mpaka chiŵandika ni musi wa ku Beti Kali, ali nkwaulaga litala lyosepe.

12 Nipele che Samweli ŵajigele liganga ni kulijimika pasikati ja Misipa ni ku Sheni, ŵaliŵilasile liganga lyo Ebeneseli, nikuti, "Ambuje Akunnungu atukamwisye mpaka pelepa patuli pano." 13 Kwanti yeleyo Ŵafilisiti ŵalepele pa ngondo, ni nganaujila sooni kwagungumuchila Ŵaisilaeli. Katema kose che Samweli paŵaliji ŵajumi Akunnungu ŵatesile ukombole wakwe uputane ni Ŵafilisiti. 14 Misi jose ja Ŵaisilaeli jijajigalikwe ni Ŵafilisiti kutandilila musi wa ku Ekiloni ni ku Gati jajigalikwe ni kwauchisya Ŵaisilaeli. Nipele kwaliji ni chitendewele pasikati ja Ŵaisilaeli ni Ŵaamoli.

15 Che Samweli ŵajendelechele kuŵa jwakulamula jwa Ŵaisilaeli pa moŵa gose ga umi wakwe. 16 Pa kila chaka che Samweli ŵajaulaga ku Beseli ni ku Giligali ni ku Misipa, ni kulamula magambo ga Ŵaisilaeli pa misi jose jo.

17 Nipele ŵaujaga ku Lama, pakuŵa kweleko kwaliji kumangwawo, ni kweleko nombe ŵalamulilaga magambo ga Ŵaisilaeli. Nombe kweleko ŵaataŵile Ambuje Akunnungu chilisa.