1 Nipele che Daudi ŵatyosile musi wa ku Nayoti kwele ku Lama kwa kuutuka, ŵanjaulile che Yonasani ni kummusya kuti, "Ana ndesile ichichi? Neŵile ichichi? Ana atati ŵenu naaleŵele kwantiuli mwakuichila kusaka kuumulaga?" 2 Che Yonasani ŵajanjile, "Ngammulajikwa! Atati ŵangu ngaatenda chindu chilichose, chiŵeje chachikulungwa pane chamwanamwana, pangaasalila. Namose chele chindu chi ngaakombola kuusisa. Ngaiŵa yeleyo namose kanandi."

3 Nambo che Daudi ŵalumbile achitiji, "Kusyene atati ŵenu akwimanyilila chenene inkuti kuunonyela, ni akuganichisya kunsisa chindu chi kuti pachaipanganye po nkasupuka. Nambo kwailiyose ila, ngulumbila kwa Ambuje Akunnungu ŵajumi, ni kwa mmwe, kuti ngukombola kuulajikwa katema kalikose." 4 Che Yonasani ŵansalile che Daudi, "Chilichose chinkusaka nampanganyichisye, chiimbanganye."

5 Che Daudi ŵansalile, "Malaŵi kwana chindimba chakuwone mwesi, ni une ngusachikwa kwika kulya pamo ni mwenye. Nambo mungunde kuti ngalijuŵe kwitinji mpaka ntoondo ligulo. 6 Atati ŵenu iŵaga ngasamona pachakulya, amuchilichisyaga, nipele mwasalile kuti ‘Che Daudi anganganichisye kuti naakunde ajaule kumangwawo ku Beselehemu, pakuŵa jiŵele ndaŵi jakupeleka mbopesi jakutinisya kweleko pamo ni ulongo wakwe wose nti yakuti kutenda kila chaka.’ 7 Iŵaga tajile kuti, ‘Atesile yambone,’ nipele mmanyilileje kuti une jwakutumichila jwenu ndili salama. Nambo iŵaga chatumbile, mmanyilile kuti akwete nningwa wakuumulaga. 8 Kwayele muundendele ukoto ntima uneji jwakutumichila jwenu, pakuŵapo mmwejo mwatesile lilangano ni une paujo pa Ambuje Akunnungu. Nambo iŵaga ndesile chileŵo, nipele muumulaje mmwe mwasyene, nkaambeleka kwa atati ŵenu kuti amulaje?"

9 Che Yonasani ŵansalile, "Ngaŵa yeleyo! Ngaimanyilile namose chindu chamwana, kuti atati ŵangu akuganichisya yangalumbana nkati mmwe, ngangansise." 10 Che Daudi ŵammusisye, "Tinaimanyilile chinauli iŵaga atati ŵenu tanjanje mwachikali?"

11 Che Yonasani ŵajanjile, "Njise tujaule kumigunda!" Nipele ŵajawile. 12 Che Yonasani ŵansalile che Daudi kuti, "Ambuje Akunnungu, Akunnungu jwa ku Isilaeli, aŵeje jwaumboni jwetu. Malaŵi pane ntoondo katema nti akano tinaausye atati ŵangu. Iŵaga nganisyo syao pa mmwejo sili syambone tinjintumichisya utenga. 13 Ambuje Akunnungu aandendele kwa chikali iŵaga che Sauli akulapilila kummulaga, ni une pangansalila kuti mmutuchile kwakutalika kuti mme salama. Ambuje Akunnungu aŵeje pamo ni mmwe mpela iŵaliji ni atati ŵangu. 14 Iŵaga tinyendelechele kuŵa jwanjumi muunosye aula ukoto ntima wangamala mpela wa Ambuje Akunnungu kuti ngasimwa, 15 sooni njendelechele kulosya ukoto ntima wangamala kwa ulongo wangu, mpaka pele Ambuje Akunnungu patachaulaga ŵammgongo ŵenu pachilambo pa." 16 Nipele che Yonasani ŵatesile lilangano ni ŵapaulongo wa che Daudi achitiji, "Ambuje Akunnungu ŵaauchisye ŵammagongo ŵa che Daudi."

17 Che Yonasani ŵanlumbisye sooni che Daudi kuti tajendelechele kunnonyela, pakuŵa che Yonasani ŵannonyele che Daudi mpela muŵalinonyelaga nsyene. 18 Nipele che Yonasani ŵansalile che Daudi, "Pakuŵa malaŵi chili chindimba chakuwoneka mwesi, ŵandu chaiwone kuti nganimpagwa, ligongo chitengu chenu tichiŵe pangali mundu. 19 Ntondo ligulo njauleje pamalo pamwalijuŵile katema pagatandite maasauko ga, nkalindilile kunyuma kwa liganga lyalikuŵilanjikwa Eseli. 20 Uneji tinjiponya imaje itatu pambali mpela nguloonda chindu. 21 Nipele tinjimtuma jwakutumichila jwangu ajaule akasose mipamba jo. Nansalilaga kuti, ‘Nnole, imaje yo ili au upande wenu wu, nlokoteje,’ yeleyo malumbo gakwe nikuti nli salama, nomwe tinlikoposye pakulanguka pakuŵa ngulumbila kwa Ambuje Akunnungu ŵajumi kuti time salama. 22 Nambo nansalilaga nchanda jula kuti, ‘Nnole imaje ili paujo penu,’ pelepo ntyoche pakuŵa Ambuje Akunnungu asachileje kuti njaule kwakutalika. 23 Malinga ni malangano gatuŵichilene, mkumbuchile kuti Ambuje Akunnungu ali jwaumboni pasikati jetu moŵa gose pangali mbesi."

24 Nipele, che Daudi ŵalijuŵile kumigunda. Katema ka chindimba cha kuwoneka mwesi, mwenye che Sauli ŵatemi kulya. 25 Nti yaitite kuŵa masyoŵelelo mwenye ŵatemi pachitengu chakwe chichaliji chiŵandi ni likumba. Che Yonasani ŵatemi kulolegana ni mwenye ni che Abuneli ŵatemi chiŵandi ni mwenye. Nambo pamalo pakutamaga che Daudi paliji pangali mundu. 26 Lyuŵa lyo, che Sauli nganaŵecheta chilichose, pakuŵa ŵaganisisye kuti pane che Daudi asimene ni chindu chachikwatenda akakukundikwa kwa kwapopelela Akunnungu mwakuti aiche pa chindimba po. 27 Palyuŵa lyaaŵili, pakumala chindimba chakuwoneka mwesi, chitendu chi che Daudi chaliji pangali mundu sooni. Nipele che Sauli ŵammusisye che Yonasani mwanagwe, "Kwachichi che Daudi mwanache ju che Yese, nganaika ku chakulya, liiso ni leloji?" 28 Che Yonasani ŵajanjile, "Ŵaanjondelele kwannope kuti naakunde ajaule ku Beselehemu. 29 Ŵaasalile kuti ‘Mungunde nyaule kwa achalongo achinjangu, pakuŵapo akupeleka mbopesi sya kutinisya ku musi wetu ko, ni achimwene jŵangu asachileje kuti ngaŵe nawo kweleko. Pakuŵa ngusachilwa kwaula mungunde nyaule kwa achalongo achinjangu.’ Lyelelyo ni ligongo nganapagwa pelepa kulya chakulya cha mwenye."

30 Pelepo che Sauli ŵantumbilile kwannope che Yonasani, ni ŵansalile "Ugwe nchanda ndi mpela achikulu ŵenu, jwangajitichisya ni jwangalumbana kwa chachili chose! Naimanyi kuti nli upaande wa mwanache jwa che Yese ni nkulitesya soni mwasyene ni kwatesya soni achikulu ŵenu ŵammeleche! 31 Uli, ngankuimanyilila kuti che Daudi aŵaga jwanjumi, mmwe ngankombola kupata lipesa lyakuŵa mwenye jwa chilambo chi? Sambano njaule nkannyiche nawo apano, pakuŵa akusachilwa aulajikwe." 32 Che Yonasani ŵajanjile, "Ligongo chichi aulajikwe? Ana atesile ichichi?" 33 Nambo che Sauli ŵamponyisye che Yonasani mpamba kuti ammulaje. Nombe che Yonasani ŵaimanyilile kuti atatigwe ili muntima mwakwe yakwaulaga che Daudi. 34 Pelepo che Yonasani akuno ali atumbile kwannope, ŵatyosile pachakulya kwachitema, pangalya chakulya chilichose pa lyuŵa lyaaŵili lya kuwoneka mwesi lyo. Che Yonasani ŵalilasiche kwannope kwa isambo ya chipongwe ya atatingwe iŵaatendelaga che Daudi.

35 Kundaŵi kwakwe che Yonasani ŵajawile ku migunda kula, kukusimana ni che Daudi mpela iŵalangene. Ŵajawile kweleko ni jwanchanda jumo, 36 paŵaiche kweleko che Yonasani ŵansalile nchanda jula, "Mmbutuche nyikuye imaje jitinajiponye." Jwanchanda jula paŵaliji nkuutuka, che Yonasani ŵauponyisye mpamba chammbujo mwakwe. 37 Jwanchanda jula paŵaiche pamalo pachagwilile chimaje chila, che Yonasani ŵammilasile ni kunsalila, "Chimaje chili mmbujo mwenu mo. 38 Njanguyeje, nkajima pelepo." Jwanchanda jula ŵasongangenye imaje ila ni kunjaulila che Yonasani. 39 Nambo jwanchanda jula nganaimanyililaga chilichose. Nkati malumbo ga chele chindu cho. Ŵaŵaimanyililaga ali che Yonasani ni che Daudi pe. 40 Nipele che Yonasani ŵampele jwanchanda jula yakumenyanila yakwe ni kunsalila, "Njaule, mmuje kumusi."

41 Papopo nchanda jula paŵatyosile, che Daudi ŵajimwiche ni kutyoka paŵalijuŵile panyuma pa liganga lila. Ŵajineme mpaka pasi katatu kwa luchimbichimbi paujo pa che Yonasani. Wose ŵanaŵaŵili, che Daudi ni che Yonasani ŵakumbetene ni kulila. Che Daudi ni juŵalisile kwannope kupunda che Yonasani. 42 Pakumala pelepo che Yonasani ŵansalile che Daudi, "Njaule kwa chitendewele. Pakuŵa tulumbilile kuŵa ni uganja kwa liina lya Ambuje Akunnungu tuchitiji Ambuje Akunnungu ali jwaumboni pasikati ja mwe ni une, ni pasikati ja uŵelesi wangu ni uŵelesi wenu moŵa gose pangali mbesi." Che Daudi ŵajimwiche ni kwaula, nombe che Yonasani ŵausile kumusi.