1 Pa moŵa go Ŵafilisiti ŵasongangenye mipingo jawo ja ŵangondo kuti amenyane ni Ŵaisilaeli. Che Akishi ŵansalile che Daudi kuti, "Mmanyilile kuti mmwejo ni ŵandu ŵenu nkusachilwa kwaula pamo ni une kukuputana ngondo." 2 Che Daudi ŵanjanjile che Akishi, "Elo! Chimumone une jwakutumichila jwenu yanguti kukombola kuputana." Che Akishi ŵansalile kuti, "Ni une tinantende kuŵa jwakulindilila jwangu katema kose ka umi wangu wosepe."

3 Katema ko, che Samweli ŵaliji awile, ni Ŵaisilaeli wose ŵanlilile nipele ŵansichile ku musi wakwe kwele ku Lama ko. Che Sauli ŵaliji ŵaŵinjile mu chilambo ŵachisango ni ŵasaŵi.

4 Ŵafilisiti ŵasongangene ni kuŵika chigono chao kwele ku Shunemu ni che Sauli ŵaasongangenye Ŵaisilaeli wose ni kuŵika chigono chao ku litumbi lya Giliboa. 5 Che Sauli paŵauweni mpingo wa ŵangondo ŵa Ŵafilisiti ŵatandite kogopa, ni ŵaliji ni lipamba kwannope. 6 Che Sauli ŵausisye kwa Ambuje Akunnungu, nambo Ambuje Akunnungu ngananjanga kwa kusagamila atamuno kwa maganga ga ulimu atamuno kwa litala lya ŵakulondola. 7 Pelepo che Sauli ŵaasalile ŵakutumichila ŵakwe, "Muusosele jwankongwe jwakukombola kukunguluka ni ŵandu ŵawile, kuti naajaulile ngaausye."

Ŵakutumichila ŵakwe ŵanjanjile, "Apali jwachisango jumo kwele ku Endoli ko."

8 Nipele, che Sauli ŵaligalawisye kwakuwala yakuwala ine akamanyika, ŵajawile kweleko pamo ni ŵandu ŵakwe ŵaŵili. Ŵaiche kwa jwankongwe jo chilo, ni ŵansalile, "Mmuchilichisye kwa masoka, chindu chichichisimane, ni muunyichisye ajula jutinansalile."

9 Jwankongwe jula ŵansalile, "Mmwejo nkumanyilila kusyene kuti mwenye che Sauli ŵaauleje ŵachisango ni ŵasaŵi wose muchilambo cha ku Isilaeli. Sambano kwachichi nkuumichila chitanje kuti muundanjisye ni kuumulaga?"

10 Che Sauli ŵanlumbilile kwa liina lya Ambuje Akunnungu achitiji, "Ngulumbila kwa Ambuje Akunnungu ŵajumi, kuti ngapagwa majamuko galigose gatigansimane kwaligongo lya chele chindu chi."

11 Jwankongwe jula ŵammusisye, "Ana nkusaka nammilanjile nduni?"

Che Sauli ŵajanjile, "Muumilanjile che Samweli."

12 Jwankongwe jula paŵammweni che Samweli ŵalisile kwakunyanyisya, ni ŵansalile che Sauli, "Kwachichi muunambisye? Mmweji nli che Sauli!"

13 Mwenye che Sauli ŵansalile "Nkajogopa! Nkuwona ichichi?"

Jwankongwe jula ŵanjanjile, "Nguchiwona chindu nti nnungu jichikopochelaga paasi."

14 Che Sauli ŵansalile jwankongwe jo, "Akulandana na acheni?"

Jwankongwe jo ŵajanjile, "Jwannume jwachekulwipe, akukwela, nombejo awasile mwinjilo."

Pelepo che Sauli ŵaimanyilile kuti jwelejo ali che Samweli. Che Sauli ŵajineme mpaka pasi kwa kwachimbichisya. 15 Che Samweli ŵansalile che Sauli, "Kwachichi muunagesye pakuunyichisya akuno?"

Che Sauli ŵajanjile "Uneji ndili pa isausyo yekulungwa! Ŵafilisiti akuputana ngondo ni une, ni Akunnungu anesile jika. Ngakunyanga sooni kwa litala lya ŵakulondola atamuno kwa kusagamila. Lyelelyo ni ligongo nammilasile muumanyisye chakupanganya." 16 Che Samweli ŵatite, "Kwachichi nkusaka une nansalile chakutenda akuno Ambuje Akunnungu annesile jika ni aŵele jwammagongo jwenu? 17 Ambuje Akunnungu ampanganyichisye achila chansalile kwa litala lyangu. Ambuje Akunnungu autyosisye umwenye kukwenu, ampele njenu che Daudi. 18 Pakuŵapo mmwejo nganimunjitichisya Ambuje Akunnungu, namose nganinkwanilisya lutumbilo lwakwe kwa kwaulaga Ŵaamaleki wosepe mpela yatite kunnajisya ni indu yao yiŵakwete mpela iŵatite pakunsalila. Lyelelyo ni ligongo lelo Ambuje Akunnungu akuntendela mmwejo yeleyi. 19 Kupunda ni yeleyo, Ambuje Akunnungu tachintenda mmwejo pamo ni Ŵaisilaeli wose mme paasi pa Ŵafilisiti. Malaŵi, mmwejo ni ŵanache ŵenu tinchiŵa pamo ni une; namose mpingo wa ŵangondo wa Ŵaisilaeli Ambuje Akunnungu tachatenda aputikwe ni Ŵafilisiti."

20 Chisisimuchile, che Sauli ŵagwile manguku, kwa lipamba ligongo lya maloŵe ga che Samweli, machili gaamalile, pakuŵa ŵaliji jwangalya chachilichose lyuŵa lyose, muusi ni chilo. 21 Pelepo jwankongwe jula ŵanjaulile che Sauli, ni paŵaiweni kuti che Sauli akwete lipamba kwannope, ŵansalile, "Uneji jwakutumichila jwenu nanjitichisye mmwe, nautasile umi wangu mu chakogoya pakutenda achila chimuusalile nantendele. 22 Sambano choonde mumbilikanile uneji jwakutumichila jwenu, tinankolochesye nkate kuti nlye nomwe tinkole machili ga kuendelechela ni ulendo wenu." 23 Nambo che Sauli ŵakanile nikuti, "Ngangulya." Nambo aŵala ŵakutumichila ŵa che Sauli ŵalumbikene pamo ni njwankongwe jula, ŵanchondelele kuti alye, nombejo ŵaapilikanile. Kwayele ŵajimwiche pasi pala ni kutama pachindanda. 24 Jwankongwe jula ŵakwete ng'ombe ja mwana jakwimbala, ŵajisinjile mwakwanguya, ŵajigele utandi ŵa ngano, ŵaukandile ni kolosya mikate jangataga amila. 25 Ŵampele che Sauli, ŵaapele nombe ŵakutumichila ŵakwe, nombe nawo ŵalile. Nipele ŵatyosile chilo chichocho.