1 Pakumala che Sauli kuuja kungondo kuŵamenyanaga ni Ŵafilisiti, ŵasalilwe kuti che Daudi ali ku chipululu cha Engedi. 2 Nipele che Sauli ŵaajigele ŵangondo elufu tatu ŵaŵasagwile ŵaŵaliji ŵakombola nnope kuputana mu chilambo chansima cha ku Isilaeli, ŵajawile kukwasosa che Daudi ni ŵandu ŵakwe ku lwala syasikuŵilanjikwa Mbusi sya mwitinji. 3 Paŵaiche chiŵandi ni machinga ga ngondolo gagaliji mungulugulu litala, paliji ni mbugu, che Sauli ŵajinjile mu mbugu mo kuti akasyetelele. Che Daudi ni ŵandu ŵakwe ŵaliji munkati mmangoningoni mwa mbugu jijojo. 4 Ŵandu ŵa che Daudi ŵala ŵansalile kuti, "Ali ni lyuwa lyati Ambuje Akunnungu ŵansalile kuti ‘Tinjintenda mwakamule ŵammagongo ŵenu kuti mwatende iliyose inkwisaka.’" Pelepo che Daudi ŵanjaulile che Sauli chapanyuma kwa nyakatulila, ŵakatile lujenje lwa chakuwala chi che Sauli. 5 Che Daudi ŵatandite kulilasika muntima pakuŵapo akatile lujenje lwa chakuwala chi che Sauli. 6 Nipele ŵaasalile ŵandu ŵakwe, "Ambuje Akunnungu anekasye ngasinampweteka ata kanandi mwenye jwangu jwajitililwe mauta kwa ligongo lya Ambuje Akunnungu pakuwa ali Ambuje Akunnungu ni ŵaŵansagwile aŵe mwenye." 7 Kwa maloŵe go, che Daudi ŵasalile ŵandu ŵakwe ligongo lyangaulaga che Sauli. Nipele che Sauli ŵajimi, ŵakopweche mmbugu ŵajendelechele ni ulendo. 8 Kanyuma, che Daudi nombe ŵakopweche mmbugu ni kwaŵilanga che Sauli, "ambuje ŵangu mwenye!" Mwenye che Sauli paŵagalawiche panyuma, che Daudi ŵatindiŵele, ŵajineme mpaka paasi kwakwachimbichisya che Sauli. 9 Nipele ŵansalile, "Kwachichi nkwapilikanila ŵandu ŵakunsalila kuti, ‘Nnole che Daudi akusaka kummulaga?’ 10 Sambano nnole, lelo nnyiweni mwasyene kuti pamwaliji mu mbugu Ambuje Akunnungu ŵambele lipesa lyakuti nammulaje. Ŵandu ŵampepe ŵali pamo ni une ŵasalile kuti nammulaje, nambo nannesile nganinammulaga. Natite nganinambulaga ambuje jwangu pakuŵapo ŵelewo asagulikwe ni Ambuje Akunnungu aŵe mwenye kwa kwikitililwa mauta. 11 Alakwe atati ŵangu, nnole lujenje lu lwa mwinjilo wenu mmakono mwangu, kwa kukata lujenje lwa mwinjilo wenu pangammulasya, nkukombola sambano kwimanyilila kusyenesyene kuti unejinganinantendela sambi atamuno nganinangalauka. Uneji nganinanneŵela mmwejo nachiŵamuno mmwejo nkuusosa kuti mumulaje. 12 Ambuje Akunnungu alamule pasikati jetu, mmwe ni une. Ŵelewo ammuchisye yangalumbana imuundendele, nambo une ngandenda kwa mwe changalumbana chachili chose. 13 Nkumbuchileje chiŵecheto chachiikala chachikuti, ‘Chakusakala chikusatendekwa ni ŵandu ŵakusakala pe,’ nambo ngandenda kwa mwe changalumbana chachili chose. 14 Sambano mmwejo mwenye jwa ku Isilaeli, ana mundu chi junkusaka kunkamula! Uli nkunkuilisya nduni? Ana mmbwa jewe! Pane chiloboto! 15 Ambuje Akunnungu aŵeje jwakulamula pasikati jetu. Ŵelewo achilolechesye chigongomalo chankuundendela chi, anjenjele ni kuungulupusya ngaulajikwa ni mmwe."

16 Che Daudi paŵamalisisye kuŵecheta maloŵe go, che Sauli ŵatite, "Uli, lyelelyo lili liloŵe lyenu mwanangu che Daudi?" Che Sauli ŵatandite kulila. 17 Nipele ŵansalile che Daudi, "Mmwejo nli mundu jwa nkutenda yakuisaka Akunnungu kuumbunda une, muundendele yambone, nambo une nantendele yakusakala. 18 Lelo, munosiye yantite kuwa wambone kwa uneji. Nganimumulaga nachiŵamuno Ambuje Akunnungu ŵampele lipesa lyakumulaga une. 19 Uli, mundu ankamulaga jwammagongo jwakwe akunneka ajaule salama? Ambuje Akunnungu ambuchisye yambone kwa ligongo lya indu imuundendele lelo. 20 Sambano naimanyi kusyene kuti mmwejo tinchiŵa mwenye jwa ku Isilaeli, ni chichiutenda umwenye wa ku Isilaeli uŵe wakulimbangana. 21 Nambo munumbilile kwa liina lya Ambuje Akunnungu kuti ngasinnyiulaga iŵelesi yangu, namose kulitenda liina lyangu liliŵalikwe pasikati pa ulongo wa atati ŵangu." 22 Che Daudi ŵalumbilile kuti chaitende yose iŵaiŵendile che Sauli.

Nipele che Sauli ŵausile kumangwawo, nambo che Daudi ni ŵandu ŵakwe ŵajawile ku malo kuŵalijuŵaga kula.