1 Pakumala che Daudi kukunguluka ni che Sauli, che Yonasani mwanagwe che Sauli ŵanonyelwe nnope ni che Daudi, ni ŵannonyele kwa ntima wao wose nti yakuti kulinonyela nsyene. 2 Kutandilila lyuŵa lyo, che Sauli ŵanjigele che Daudi kumangwakwe, nganakunda kuti auje kwa atatigwe. 3 Pakuŵa che Yonasani ŵannonyele che Daudi nti yakuti kulinonyela nsyene, ŵatesile lilangano nawo. 4 Che Yonasani ŵausile mwinjilo uŵawasile ni kwapa che Daudi pamo ni yakuwala yakwe ya pangondo. Sooni ŵampele yakumenyanilana yakwe ya pangondo pamo ni lipanga ni mpaamba ni mkaanda wakwe. 5 Kwakulikose kuŵantumile ni che Sauli, che Daudi ŵaapundile ŵammagongo ŵakwe. Kwayele, che Sauli ŵantesile aŵe chilongola jwa mpingo wakwe wa ngondo. Chele chindu cho chaasengwasisye ŵandu wose namose ŵakutumichila ŵa che Sauli nombe.

6 Ŵangondo paŵaujaga kumusi, pamo ni che Daudi, pakumala kummulaga Mfilisiti jula, achakongwe kutyochela kila musi mu Isilaeli ŵatyosile kukunchingamila mwenye che Sauli. Achakongwe wo ŵaliji nkwimba nyiimbo sya sangalala ali nkugomba tugoma twamwana ni ing'wenyeng'wenye. 7 Sooni ŵaliji nkutyala ni kwimba nyiimbo syakuitichisyana yelei:

"Che Sauli auleje ŵandu maelufu gakwe

ni che Daudi auleje ŵandu makumi elufu gakwe."

8 Che Sauli ngananonyelwa ni maloŵe gagali mu lujimbo lu, kwayele ŵatumbile kwannope. Ni ŵatite, "Ampele che Daudi makumi elufu nambo une ambele maelufu pe. Chachisigalile kuli kwapa che Daudi umwenye." 9 Kutandilila lyuŵa lila ni kwendelechela che Sauli ŵaliji nkwakolela wiu che Daudi.

10 Kundaŵi kwakwe mbumu jwakusakala kutyochela kwa Akunnungu ŵanjinjile che Sauli kwa machili, ni ŵaliji nkuŵechetaŵecheta mu nyuumba mwakwe nti mundu jwakwete masoka. Katema ko che Daudi ŵaliji nkugomba ching'wenyeng'wenye nti moŵa gose. Che Sauli ŵakamulile mpamba, 11 nipele, chisisimuchile che Sauli ŵamponyisye che Daudi mpaamba kaŵili pakuŵa ŵaganisyaga kuti, "Tinansome ni mpaamba wu asigalile pa lipupa po." Nambo che Daudi wakwepile kaŵili kosepe.

12 Che Sauli ŵanjogwepe che Daudi pakuŵa Ambuje Akunnungu ŵaliji pamo najo, nambo Ambuje Akunnungu ŵaliji annesile che Sauli. 13 Kwayele, che Sauli ŵantyosisye che Daudi paujo pakwe ni kuntenda aŵe chilongola jwa mpingo wa ŵangondo elufu moja. Nombe che Daudi ŵaalongwesye yambone ŵangondo wo ku ngondo. 14 Che Daudi yaajendele chenene kila chindu chatesile, pakuŵa Ambuje Akunnungu ŵaliji pamo najo. 15 Che Sauli paŵaiweni kuti che Daudi ŵaliji nkupunda katema kose ku ngondo, ŵapundile kunjogopa kwannope. 16 Nambo ŵandu wose ŵa ku Isilaeli ni ku Yuda ŵannonyele che Daudi, pakuŵapo ŵaalongwesye yambone pa ngondo.

17 Nipele che Sauli ŵansalile che Daudi kuti, "Ajwapa mwali jwangu jwankulungwa che Melabu. Tinampe nlombele iŵaga timundumichile mpela jwangondo jwangu jwakulimba ntima ni jwakukulupilichika pakuputa ngondo sya Ambuje Akunnungu." Che Sauli ŵatendaga yeleyo pakuganisya mu ntima mwakwe kuti Ŵafilisiti ni ŵatakammulaje che Daudi ngaŵaga che Sauli nsyene.

18 Che Daudi ŵansalile che Sauli, "Uneji nduni kwampaka me nkwegwe jwawo mwenye? Ntundu wangu namose ulongo wa atati ŵangu ngaikumanyika pa Isilaeli." 19 Nambo pilyaiche lyuŵa lyakuti che Daudi alombele che Melabu, che Sauli atatigwe mwali jo ŵampeleche kwa mundu jwine liina lyakwe che Adiliyeli jwa musi wa ku Mehola aŵe ŵankwakwe.

20 Nambo che Mikali mwali jwine jwa che Sauli ŵannonyelaga che Daudi. Che Sauli paŵasalilwe ngani jo ŵasangalele kwannope. 21 Ŵaganisisye kuti, "Tinampe che Daudi aŵe ŵankwakwe, pelepo mwali jwangu ju tachiŵa mpela chitanje kwa jwelejo, nipele Ŵafilisiti tachimmulaga." Kwayele che Sauli ŵansalile che Daudi kaaŵili, "Sambano nkwete lipesa liine lyakuti mme akwegwangu." 22 Pelepo che Sauli ŵaalajisye ŵakutumichila ŵakwe achitiji, "Nkunguluche ni che Daudi pachisyepela ni kunsalila kuti, ‘Mwenye akunnonyela mmwejo, atamuno ŵakutumichila ŵakwe akunnonyela kwa yele mkunde kuti mme nkwegwe jwawo mwenye.’"

23 Nipele ŵakutumichila ŵa che Sauli wo ŵansalile che Daudi gele maloŵe go pachisyepela, nombe che Daudi ŵaasalile, "Uneji ndili mundu jwakulaga ni sooni jwangamayika kose. Uli, nkuganisya kuti chili chindu changalema une kuŵa nkwegwe jwa mwenye?"

24 Ŵakutumichila ŵala ŵansalile che Sauli nti iŵatite pakusala che Daudi. 25 Che Sauli ŵaasalile, "Munsalile che Daudi yeleyi: ‘Mwenye ngakusaka chindu chachili chose chakuti chiŵe mahali ga kulombela mwali jwakwe ikaŵe misumbu mia moja ja Ŵafilisiti kuti aliuchisye kwa ŵammagongo ŵakwe.’ " Mwelemu ni muŵaganisyaga che Sauli kuti che Daudi aulajikwe ni Ŵafilisiti. 26 Ŵakutumichila ŵala paŵansalile che Daudi indu iŵasakaga che Sauli, che Daudi ŵasangalele kuti aŵe nkwegwe jwa mwenye. Kwa yele lyuŵa lya kwichisya mahali likanaiche, 27 che Daudi ni ŵandu ŵakwe ŵajawile, ŵaauleje Ŵafilisiti mia mbili ni kujijigala misumbu jao mpaka kwa mwenye che Sauli. Pelepo ŵajiŵalasile josepe kuti jwalakwe jo aŵe nkwegwe jwawo mwenye. Kwayele che Sauli ŵannombekasisye che Mikali mwalijwao kuti aŵe ŵankwakwe che Daudi.

28 Nambo che Sauli paŵaiweni kuti Ambuje Akunnungu ali pamo ni che Daudi, ni kuti che Mikali mwali jwakwe akunnonyela che Daudi jo, 29 ŵapundile kunjogopa nnope che Daudi, nipele ŵasandwiche mmagongo jwakwe umi wao wosepe.

30 Achakulu ŵa ŵangondo ŵa Ŵafilisiti ŵajendelechele kuputana ngondo ni Ŵaisilaeli, nambo ndaŵi syosepe siŵaikaga kukuputana, che Daudi ŵaliji nkupunda kwa nnope mu ngondo syose kwapunda achakulu wose ŵa ngondo ŵa che Sauli. Kwayele liina li che Daudi lyapikaniche nnope.