1 Samuel 4

Lisanduku lya lilangano likujigalikwa ni Ŵafilisiti

1 Che Samweli ŵaliji nkwasalila Ŵaisilaeli wose utenga uwasalilwaga ni Akunnungu. Ni yaliji pa moŵa go Ŵafilisiti ŵasongangene kuti aputane ni Ŵaisilaeli. Ŵaisilaeli ŵaŵisile chigono chao kwele ku Ebeneseli, ni Ŵafilisiti ŵaŵisile chigono chao kwele ku Afeki. 2 Ŵafilisiti ŵaajaulile Ŵaisilaeli ni kwagungumuchila, ni pakumala kuputana kwannope Ŵaisilaeli ŵaputikwe. Ŵaisilaeli elufu nne ŵaulajikwe ku ngondo ko. 3 Ŵangondo ŵaŵasigalile paŵausile pachigono, achachekulu ŵa ku Isilaeli ŵatite, "Ligongo chichi Ambuje Akunnungu akundile kuti Ŵafilisiti atupunde lelo jino? Twende tukajigale lisanduku lya lilangano lya Ambuje Akunnungu ku Shilo ko kuti Ambuje wo alongane ni uweji ku ngondo, akatukulupusye ni ŵammagongo ŵetu." 4 Kwayele ŵaatumile ŵandu kwele ku Shilo ko, nombewo ŵalijigele lisanduku lya lilangano lya Ambuje Akunnungu ŵa machili gose, ŵati chitengu chakwe cha umwenye chili pasikati ja yepanganyikwe iŵili yaili ni mapapiko yaikuŵilanjikwa makelubi. Aŵala achachanda ŵaŵili ŵa che Eli, che Hofini ni che Finehasi ŵaiche pamo ni alila lisanduku lya lilangano lya Ambuje Akunnungu.

5 Katema Lisanduku lya lilangano lya Ambuje Akunnungu palyaiche pachigono, Ŵaisilaeli wose ŵakwesisye liloŵe mwakusangalala, mpaka chilambo chose chatenganyiche. 6 Ŵafilisiti paŵapilikene malama ga sangalala, ŵatite, "Apikane malama gakogoya ku chigono cha Ŵaisilaeli! Ana yeleyi malumbo gakwe ichichi?" Piŵapilikene kuti lisanduku lya lilangano lya Ambuje Akunnungu liiche pa chigono cha Ŵaebulania, 7 ŵajogwepe kwannope, ni ŵatite, "Kuiche minungu ku chigono kwawo! Ulaje kukwetu! Pakuŵa indu yanti nnyi nganiitendecheje kunyuma ko. 8 Ulaje kukwetu! Ana ŵani chatukulupusye uwe kwa jele minungu ja machili ji? Jeleji ni minungu jijauleje Ŵamisili kwa iputiko yakupisyangana ku chipululu kula. 9 Sambano ŵanyamwe Ŵafilisiti, nlimbangane. Mputane ngondo mpela ŵangondo ŵamachili, nkaika kuŵa achikapolo ŵa Ŵaebulania mpela ŵanyawo iŵatite kuŵa achikapolo ŵetu. Nputane nawo nti ŵangondo ŵali ni umanyilisi."

10 Kwa yele Ŵafilisiti ŵaputile ngondo mwakulimba mpaka kwapunda Ŵaisilaeli, ŵaŵautwiche kila mundu ku nyuumba kwakwe. Pa lyuŵa lyo ŵandu ŵajinji ŵaulajikwe, pakuŵa ŵangondo ŵaakwenda wamakongolo elufu salasini pasikati ja Ŵaisilaeli ŵaulajikwe. 11 Lisanduku lya lilangano lya Ambuje Akunnungu lyajigalikwe ni Ŵafilisiti ni aŵala achachanda ŵaŵili ŵa che Eli, che Hofini ni che Finehasi ŵaulajikwe.

Che Eli akwasika

12 Pa lyuŵa lilyolyo mundu jumo jwa lukosyo lwa Benjamini ŵautwiche kutyochela pa luŵala luŵaputilanaga ngondo mpaka ku Shilo, ali apapwile papwile yakuwala yakwe, ni kulitaga luundu luli muntwe mwakwe kulosya kulilasika. 13 Mundu jula paŵaiche, che Eli ŵaliji atemi pa chitengu chakwe mungulugulu litala, achilolechesyaga iŵaga kwana mundu jutaiche kutyochela ku ngondo, ligongo ntima wakwe waliji ni lipamba nkati lisanduku lya lilangano lya Ambuje Akunnungu. Mundu jula paŵaiche mmusi ni kusala iyakopochele, ŵandu wose ŵalisile mwakunyanyisya. 14 Che Eli paŵapilikene kulila ko ŵausisye, "Uli lilama lyo lyachichi?" Mundu jula ŵajawile kwakwanguya ku che Eli kukwasalila ngani syo. 15 Kele katema ko che Eli ŵaliji ni yaka tisini na nane ni meeso gakwe galiji gangali machili gakulola uchenene. 16 Mundu jula ŵansalile che Eli, "Uneji ndyochele ku ngondo sampano; utwiche kungondo lelo jino."

Che Eli ŵausisye, "Mwanangu indu yaliji uli kweleko?" 17 Mundu jula ŵatite, "Ŵaisilaeli aputikwe ni Ŵafilisiti mpaka autwiche. Ŵandu ŵajinji aulajikwe pasikati ja Ŵaisilaeli. Kupunda pelepo achachanda ŵenu ŵaŵili che Hofini ni che Finehasi aulajikwe, ni lisanduku lya lilangano lya Ambuje Akunnungu lijigalikwe ni Ŵafilisiti."

18 Mundu jula paŵalikolasile lisanduku lya lilangano lya Ambuje Akunnungu, che Eli ŵagwile lugali, kutyochela pa chitengu chakwe mungulugulu litala. Paŵagwile ŵatemangwiche lukosi lwakwe pakuŵa ŵaliji jwakwimbala ni jwancheku, nipele ŵawile. Che Eli ŵaliji ŵaalongwesye Ŵaisilaeli kwa yaka alobaini.

Ŵankwakwe che Finehasi akwasika

19 Sooni yele indu yo payakopochele, akwegwawo che Eli, yaani ŵankwakwe che Finehasi ŵaliji ni chitumbo, ni moŵa gakuligopola galiji gaŵandichile. Jwalakwe jo paŵapilikene kuti lisanduku lya lilangano lya Ambuje Akunnungu lijigalikwe ni Ŵafilisiti, ni kuti akwegwawo ŵalume ni ŵankwakwe ŵaliji ali awile, popopo ŵalwasile chilungusi ni kuligopola. 20 Jwankongwe jo paŵawaga, achakongwe ŵaŵankamuchisyaga ŵansalile, "Nlimbangane ntima, nligopwele mwanache jwannume." Nambo jwelejo nganajanga chilichose namose kwapikanila. 21 Jwammilasile mwanache jo Ikabodi, malumbo gakwe, "Lumbili lwa Akunnungu lutyosile pasikati ja Ŵaisilaeli," pakuŵa lisanduku lya lilangano lya Ambuje Akunnungu lijigalikwe, ni sooni akwegwawo ni ŵankwakwe ŵanawose awile. 22 Ŵatite yeleyo ligongo, lumbili lwa Akunnungu lutyosile pasikati ja Ŵaisilaeli pakuŵa lisanduku lya lilangano lya Ambuje Akunnungu lijigalikwe ni Ŵafilisiti.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?