1 Samuel 9

Che Sauli akusimana ni che Samweli

1 Mu lukosyo lwa Benjamini jwapali mundu jwakusichila ni jwakumanyika kwannope juŵaŵilanjikwe che Kishi. Jweleju ŵaliji mwanache ju che Abieli chisukulu chi che Selo, mwanache jwa mmauja ju che Bekolati atatigwe ŵaŵilanjikwe che Afia, mundu jwa lukosyo lwa Benjamini. 2 Che kishi ŵakwete mwanache jwannume liina lyakwe che Sauli. Che Sauli ŵaliji jwakusalala nnope, pasikati ja Ŵaisilaeli paliji pangali nchanda jwakusalala kumpunda jweleju. Che Sauli ŵaliji jwanlewu kwapunda ŵandu wose ŵa Islaeli mwakuti ŵandu wosepe ŵapelelaga mmakoyo.

3 Pa lyuŵa limo mbunda sya che Kishi atatigwe che Sauli syapotele. Nipele che Kishi ŵansalile che Sauli, "Munjigale jwamasengo jumo njaule nkasose mbunda syo." 4 Nipele che Sauli ŵajawile kukusosa kumatumbi ga Efulaimu, ni malo gose ga Shalisha, nambo kweleko nganiŵawona. Nipele ŵaiche mpaka ku Shalimu, ni kweleko nombe nganiŵawona. Ni ŵaasosile ku chilambo cha Benjamini, namose yeleyo nganiŵawona. 5 Paŵaiche ku chilambo cha Sufu che Sauli ŵansalile jwakutumichila jwakwe, "Twende tuuje kumusi, nangaŵa yeleyo atati ŵangu taleche kuganisya yankati mbunda, ni kutanda kola lipamba kwaligongo lyetu."

6 Jwakutumichila jula ŵansalile, "Nlindilile kanandi, pa musi wu apali mundu jwa Akunnungu jwakuchimbichikwa kwannope, chilichose chakusala chikutendekwaga. Sambano tunjaulile, panepa chatusalile kuti tujaule kwapi." 7 Che Sauli ŵausisye, "Nambo twanjaulilaga tutukampe ichichi? Nnole masulufu gatwaliji nago gamasile ni nganitukola ntuuka wa kumpa mundu jwa Akunnungu jo. Ana tukwete ntuuka wauli ŵose wakwaapa sooni?"

8 Jwakutumichila jula ŵajanjile, "Une ngwete chipande cha mwana cha madini ga fesa. Tingampe jwele mundu jwa Akunnungu jo kuti atusalile tujaule litalachi." 9 Kalakala ko ku Isilaeli mundu asakaga kummusya Akunnungu chiusyo ŵatiji, "Tunjaulile mundu jwa Ambuje Akunnungu jwakumanyilila yachiikopochele mmbujo." Pakuŵa mundu jwakuŵilanjikwa jwakulondola sambano kalakala ko ŵaŵilanjikwe jwakumanyilila yachiikopochele mmbujo. 10 Che Sauli ŵajanjile, "ili yachambone, tunjaulile." Kwayele ŵajawile ku musi uwatamaga mundu jwa Akunnungu jula. 11 Piŵakwelaga chitumbi kwaula ku musi wo, ŵasimene achiŵali ŵaŵajaulaga kukuteka mesi. Ni ŵaausisye achiŵali wo, "Ana mundu jwa kuiwona indu ya kuiwona Akunnungu jula ali mu musi mu?" 12 Achiŵali ŵala ŵaajanjile, "Elo apali. Sooni ali mmbujo mwenu, mwajanguyaga chimunsimane. Aiche lelo jino pamusi pa, pakuŵapo ŵandu lelo akwaula kukutaga mbopesi ku malo gakutajila mbopesi ku chitumbi ko. 13 Najinjila pe mmusi mo, tinkaasimene akanaŵe kwaula ku malo gakupeleka mbopesi ku chitumbi ko kukulya. Pakuŵa ŵandu ngaalya mpaka jwalakwe jo aiche kaje ni kusipopelela mbopesi syo. Pakumala pelepo ŵandu ŵaŵalaliche wo ni pachalye. Kwayele njanguyanje, timunsimane." 14 Nipele che Sauli ni jwakutumichila jwakwe ŵakwesile kwaula ku musi ula. Paŵajinjilaga mmusi mo ŵammweni che Samweli ali nkukopoka mmusi mo ali nkwika kuŵaliji achijaulaga ku malo gakupeleka mbopesi, ku chitumbi.

15 Nambo mwa liiso lyakwe, che Sauli akanaŵe kwinjila mmusi Ambuje Akunnungu ŵammanyisye che Samweli chele chindu chi yakuti, 16 "Malaŵi ndema mpela asi, tinannyichisye mundu kutyochela ku lukosyo lwa Benjamini, nomwe timunjitilile mauta aŵe mwenye jwa ŵandu ŵangu Ŵaisilaeli. Jwelejo tachakulupusya ŵandu ŵangu mmakono ga Ŵafilisiti, pakuŵa nakuweni kulaga kwa ŵandu ŵenu ni nakupikene kulila kwawo." 17 Che Samweli paŵammweni che Sauli pe, Ambuje Akunnungu ŵansalile, "Jweleju ni junansalile jula. Jweleju ni jutachalongosya ŵandu ŵangu." 18 Pelepo che Sauli ŵanjaulile che Samweli juŵaliji chiŵandika ni nnango wekulungwa wa musi ni ŵansalile, "Choonde munosye nyuumba ja mundu jwakuiwona indu yakuiwona Akunnungu jili kwapi."

19 Che Samweli ŵanjanjile, "Une ndili mundu jo. Nnongolele njaule ku malo gakupeleka mbopesi kuchitumbi pakuŵa lelo tinkalye pamo ni une. Tinjinsalila yose yaili muntima mwenu ni malaŵi kundaŵi tinjikunda kuti njauleje. 20 Yankati asila mbunda syasipotele moŵa gatatu gagapite, nkakola lipamba, sioneche. Ana munduchi jwakunsaka nnope Ŵaisilaeli? Ana nganimma mmwe ni ŵandu wose ŵa paulongo wa atati ŵenu?"

21 Che Sauli ŵajanjile, "Uneji ngutyochela ku lukosyo lwa Benjamini, lukosyo lwaluli lwenandi nnope mu Isilaeli. Ni mu lukosyo lwa Benjamini mo ulongo wangu uli wenandi nnope. Sambano ligongo chichi alakwe jo nkuusalila indu yanti yeleyo?"

22 Nipele che Samweli ŵaajawisye che Sauli ni jwakutumichila jwakwe pansana, ni kwatamika peuto papakuchimbichikwa nnope pasikati ja aŵala ŵandu wose ŵaŵalalichikwe, ŵandu wose ŵaliji salasini. 23 Che Samweli ŵansalile jwakuteleka, "Njisenawo nyama jinampele jila, jinansalile kuti njiŵiche pajika." 24 Jwakuteleka jula ŵajawile ni kuikanawo nyama jose ja lukongolo ni kujiŵika paujo pa che Sauli. Pelepo che Samweli ŵatite, "Nnole chelechi ni chindu chichaŵichikwe pajika kwa ligongo lyenu, nleje pakuwa chaŵichikwe pajika kwaligongo lyenu kwa chindimba chi kuti nlye pamo ni achalendo."

Kwayele che Sauli ŵalile pamo ni che Samweli lyele lyuŵa lyo. 25 Paŵatulukaga kutyoche ku malo ga kutyochesya mbopesi kwaula ku musi, che Samweli wawechete ni che Sauli kutyochela chumba cha malo ga penani pa lisakasa.

Che Sauli akuŵa mwenye jwa kuislaeli

26 Kundaŵindaŵi pe, che Samweli ŵammilasile che Sauli pa lisakasa pala: "Nliwiche chile kuti chinanlechelele kuti njaule kumangwenu." Che Sauli paŵaliwisile chile, nipele wose ŵanaŵaŵili ŵatyosile pasa. 27 Paŵaiche kumbesi kwa musi wo che Samweli ŵansalile che Sauli, "Munsalile jwakutumichila jwenu alongolele kaje." Jwakutumichila jula ŵalongolele, nipo che Samweli ŵajendelechele kunsalila che Sauli "Muninde kanandi ni une tinansalile maloŵe gasasile Ambuje Akunnungu gankati mmwejo."

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?