1 Che Daudi ŵajawile kwa che Ahimeleki juŵaliji jwambopesi kwele ku Nobu ko. Che Ahimeleki ŵajawile kukunchingamila akuno ali nkutetemela, ni ŵammusisye, "Kwachichi nli jikape? kwa chichi nganinyika ni mundu jwine?" 2 Che Daudi ŵajanjile, "Nyiche jikape pakuŵa mwenye andumile naapanganyichisye chindu. Ŵaasalile kuti nganinansalila mundu jwalijose kwandi ni chindu chandumile kuchipanganya. Nangene ni ŵandu ŵangu kuti tusimane pamalo pampepe. 3 Uli, nkwete chakulya chilichose apano? Ngummenda muumbe mikate nsano pane chilichose chinkwete." 4 Jwambopesi che Ahimeleki ŵansalile, "Pelepa nganingola nkate wakawaida. Ngwete mikate jajiŵichikwe pajika kwa ligongo lya Ambuje Akunnungu jajikulikwa ni ŵambopesi pe. Nkukombola kujigala mikate jo iŵaga ŵandu ŵenu nganagona ni achakongwe pa moŵa gagapite chiŵandi ga." 5 Che Daudi ŵajanjile, "Kusyene une na achachanda ŵangu nganitugona na achiŵakwetu kwamoŵa gatatu ga, nti yatukuti kutenda patukuŵa paulendo watusyowelele. Ilu ya ŵandu ŵangu ikukundikwa kwa kwapopelela Ambuje Akunnungu moŵa gose patukuŵa paulendo, ni pa ulendo wu chindu chi chili chakusachilwa kwa nnope." 6 Kwayele jwambopesi che Ahimeleki ŵampele che Daudi mikate jajiŵichikwe pajika kwaligongo lya Ambuje Akunnungu jajikulikwa ni ŵambopesi pe, pakuŵa nganipapagwa mikate jine ikaŵe jijojo jijatyochekwe paujo pa Ambuje Akunnungu, ni kujiwika jine jijatyochele pachisisa.

7 Pa lyele lyuŵa lyo jwapali jwakutumichila jumo jwa che Sauli juŵaliji pelepo, ligongo ŵasakaga kupopelela ku nyuumba ja Ambuje Akunnungu. Jwakutumichila jo jwaŵilanjikwe che Daegi, jwakutyochela ku Edomu, jwakwimilila jwa ŵakuchinga ilango ŵa che Sauli.

8 Nipele, che Daudi ŵansalile che Ahimeleki, "Uli, nkwete lipanga pane mpamba kuti mumbe? Pakuŵapo masengo ga mwenye gandesile ndyoche kwakwanguya, ni une natyosile pangali lipanga atamuno yakumenyanila ine iliyose."

9 Jwambopesi che Ahimeleki ŵajanjile, "Ngwete lipanga lya che Goliati Mfilisiti jumwammuleje ku lichemba lya Ela jula, lili panyuma pa chisibao cha jwambopesi, lyeŵilijilwe ni kaguo. Iŵaga nkusaka kulijigala lyelelyo, nipele njigale pakuŵa pangali lipanga line pelepa."

Che Daudi ŵansalile, "Pakuŵa pangali line lyakulandana ni lyelelyo, mumbe lilyolyo."

10 Palyuŵa lyo, che Daudi ŵatyosile, ŵammutwiche che Sauli, ŵajawile kwa mwenye che Akishi jwa ku Gati. 11 Ŵakutumichila ŵa mwenye che Akishi ŵammusisye che Akishi jo kuti, "Ana ajuju nganaŵa che Daudi mwenye jwa chilambo ku Isilaeli? jweleju ni juŵangambaga achakongwe jula pa ndaŵi jiŵajimbaga kuti ‘Che Sauli auleje maelufu gakwe ni che Daudi auleje makumi elufu gakwe?’"

12 Maloŵe ga ŵakutumichila wo ganjinjile nnope che Daudi muntima, ni ŵatandite kunjogopa kwannope che Akishi mwenye jwa ku Gati. 13 Kwayele, ŵaligalawisye, ŵalitesile jwampungwane, paŵasachile kunkamula ŵaliji nkulembalemba pa minango ja musiwo ni lulowu luli chuluchulu mpaka kuseleleka pa ndewu syakwe.

14 Che Akishi ŵaasalile ŵakutumichila ŵakwe, "Nnole mundu ju ali jwampungwane. Kwachichi mkunnyichisya kukwangu? 15 Uli, nkuganisya kuti une ngwasaka ŵandu ŵapungwane mpaka kunyichisya mundu ju aitendekanye ayi paujo pangu? Mundu nti jweleju ngangusaka ajinjile mu nyuumba jangu?"