1 Ŵafilisiti ŵasongangenye ŵangondo ŵao wose kwele ku Afeki ko, ni Ŵaisilaeli ŵaŵisile chigono chiŵandi ni uliŵa wa mesi wauli ku Yesileeli. 2 Ilongola nsano ŵa Ŵafilisiti paŵaliji nkupita ni mipingo jao ja ngondo ja ŵandu mia moja mia moja ni mipingo ja ŵangondo elufu moja elufu moja, che Daudi nombe ali ni ŵandu ŵakwe pamo ni che Akishi ni ŵangondo ŵakwe ŵaliji nkukuya chapanyuma pa ŵangondo wo. 3 Achakulungwa ŵa mipingo ja ngondo ja Chifilisiti ŵausisye, "Ŵaebulania ŵa akutenda ichichi apano?" Che Akishi ŵajanjile ŵele achakulungwa ŵa mipingo jangondo ja Chifilisiti, "Ajuju ali che Daudi, juŵaliji paasi pa che Sauli mwenye jwa ku Isilaeli, nombe jo aŵele ni une kupunda chaka chimo. Ni kutandilila paŵautuchile kukwangu, nganinansimana ni chileŵo chachilichose."

4 Nambo achakulungwa ŵa mipingo ja ngondo ja Chifilisiti ŵaatumbilile kwannope che Akishi, ni ŵansalile, "Mwausye ajaule kunsinda wakwe umwapele kuti atame. Akajaula pamo ni uwe ku ngondo, akaika kutugalauka, ni kutujimuchila ku ngondo. Ana ngankwiwona kuti mundu ju tachaulaga ŵandu ŵetu ni kwa litala lyo tajilane ni mbujegwe che Sauli? 5 Ana aju nganaŵa che Daudi julajula jwati achakongwe ŵajimbile ngani syakwe paŵaliji nkutyala,

‘Che Sauli auleje ŵandu maelufu,

nambo che Daudi auleje ŵandu makumi elufu.’"

6 Nipele che Akishi ŵammilasile che Daudi ni kunsalila, "Ngulumbila kwa Ambuje Akunnungu ŵajumi, kuti mmele jwakukulupilichika kukwangu. Ikaliji yambone kukwangu tujaule ŵanawose kungondo, pakuŵapo nganinachiwona chakusakala chilichose kukwenu kutandilila lyuŵa lila pamwaiche kukwangu mpaka lelojino. Namose yeleyo, mamwenye ŵane ŵa nganakola chikulupi ni mmwe. 7 Kwayele sambano, mmuje kumusi, nkatame kwa chitendewele, nkatenda chachilichose chakwatumbilisya ilongola ŵa Ŵafilisiti."

8 Che Daudi ŵanjanjile che Akishi, "Nambi ndesile chindu chachi changalumbana? Mpela inkuti kusala kuti, nganimuumona ni chileŵo chilichose kutandilila alila lyuŵa panatandite kuntumichila mpaka lelojino. Kwachichi ninajaule kukuputana ngondo ni ŵammagongo ŵa ambuje jwangu, mwenye?"

9 Che Akishi ŵansalile, che Daudi, "Ngumanyilila kuti nkukulupilichika nti katumetume jwakwinani jwa Akunnungu. Namose yeleyo, achakulungwa ŵa mipingo ja ngondo ja Ŵafilisiti atite kuti, ‘Akajaula ku ngondo pamo ni uweji.’ 10 Sambano mmwe pamo ni ŵandu ŵenu, malaŵi kundaŵindaŵipe njimuche ni kwaula patikuche."

11 Kwayele, Malaŵi jakwe kundaŵi, che Daudi pamo ni ŵandu ŵakwe ŵatyosile ni kuuja ku chilambo cha Ŵafilisiti. Nombe Ŵafilisiti wo ŵajawile ku Yesileeli.