1 Nipele che Hana ŵapopesile achitiji,

"Ntima wangu ukusangalala kwa ligongo lya Ambuje Akunnungu.

Ngwakusya Ambuje Akunnungu ŵaambele machili.

None mbatile machili paujo pa ŵammagongo ŵangu,

ngusangalala pakuŵa Ambuje angulupwisye ni kundenda sangalale!"

2 "Ngapagwa ŵaakukundikwa kupopelelwa mpela Ambuje Akunnungu,

ngapagwa jwine jwalijose jwaali mpela ŵelewo,

ngapagwa jwaali lwala nti Akunnungu ŵetu

3 Nnechanje kuligamba,

ni kuwecheta kwa kulifuna.

Pakuŵa Ambuje Akunnungu ni ŵakwimanyilila.

Ŵelewo ni ŵachalamule ipanganyo yetu yose.

4 Maukunje ga ŵaali ni machili gatemeche,

nambo akwapamachili ŵaalepetele.

5 Ŵandu ŵaŵajikutaga kalakala

sambano akutenda masengo ga kulema kuti apate yakulya.

Nambo ŵaŵaliji ŵasala kalakala,

sambano akwete yakulya yejinji.

Jwankongwe jwangaŵeleka sambano aligopwele ŵanache saba.

Nambo jwankongwe jwaŵeleche ŵanache ŵajinji,

sambano asigele nkulilasika.

6 Ambuje Akunnungu ni ŵakuulaga ni sooni akuuchisya umi,

Ŵelewo ni ŵakwatulusya ŵandu kumalembe ni kwakoposya sooni.

7 Ambuje Akunnungu akwatesya ŵane kuŵa ŵakulaga,

ni ŵane kuŵa ŵakusichila.

Ŵane akwatulusya ni ŵane akwakwesya.

8 Akwanyakula ŵakulaga kutyochela nkulaga,

akwatyosya ŵakusoŵekwa kutyochela mu usauchi,

ni kwatenda atame pamo ni achakulu,

ni kwatenda atame pa chitengu cha luchimbichimbi cha mwenye.

Pakuŵa misingi ja chilambo jili jakwe Ambuje Akunnungu,

Ni pachanya pakwe achiŵisile chilambo.

9 Ŵelewo ni ŵakuugosa matala ga wandu ŵakwe ŵali ŵakukulupilichika,

nambo chiwatende ŵandu ŵachigongomalo ajonasiche mu chipi.

Pakuŵa ngapangwa mundu jwakupata indu kwa machili gakwe syene.

10 Ŵammagongo ŵa Ambuje tatemangulanywe ipande ipande,

tachilindima nti njasi kutyochela kwinani kwaligongo lyao.

Ambuje tachichilamula chilambo chose,

tachimpa machili ni luchimbichimbi mwenye jwa msagwile."

11 Nipele che Elikana ŵajawile kumangwakwe ku Lama, nambo che Samweli mwanagwe ŵasigele ku Shilo kukoko achatumichilaga Ambuje paujo pa che Eli jwambopesi.

12 Ŵanache achalume ŵa che Eli ŵaliji ŵachigongomalo, ni wangamanyilila Ambuje. 13 Nipele galiji masyoŵelelo ga ŵambopesi paujo pa ŵandu kuti kila mala mundu pakupeleka mbopesi akuno nyama jili nkutokota pa mooto, jwakutumichila jwa jwambopesi ŵaikaga ni msomelo uwaliji ni songa sitatu. 14 Jwakutumichila jo ŵatumbuchisyaga msomelo wo mu chiteleko, nyama jilijose jijatyosyekwaga mwelemo ni msomelo wo, jaliji jakwe jwambopesi. Yeleyi ŵambopesi ni iŵatendelelaga Ŵaisilaeli wose ŵaŵajaulaga ku Shilo kukupeleka mbopesi syao. 15 Nambo atamuno mauta nganigatiniswe jwakutumichila jwa ŵambopesi jwaiche kwa mundu juwatyosyaga mbopesi jula ni kunsalila kuti, "Mumpe jwambopesi nyama akaŵanichile pakuŵa jwalakwe jo ngaaja kupochela nyama jeteleche kutyochela kukwenu, nambo jangateleka." 16 Iŵaga mundu chansalile "Nlindilile kaje nagatinisye mauta nipele tinjigale nyama jilijose jinkujisaka," pele jwele jwakutumichila jwa jwambopesi ŵajangaga "Ngwamba, mumbe sampano, iŵaga ngankusaka kuumba tinansumule." 17 Au ulemwa uŵatesile achachanda ŵa che Eli waliji wekulungwa nnope paujo pa Ambuje. Pakuŵa nganasichimbichisya mbopesi siŵapelekaga ŵandu kwa Ambuje.

18 Nambo che Samweli ŵajendelechele kwatumichila Ambuje Akunnungu, ali awete chisibao cha bafuta. 19 Kila chaka achikulugwe ŵantotele kanzu jamwana ni kunjauchisya paŵaliji nkwaula ni ŵankwakwe kupeleka mbopesi ja kutinisya chaka ni chaka. 20 Che Eli ŵaliji nkwapa upile che Elikana ni che Hana ŵankwakwe achitiji, "Ambuje Akunnungu ampe mmwe che Elikana ŵanache ŵane kwa jwankongwe ju kuti ajigale lipesa lya ajula jumummichile pajika kwaligongo lya Ambuje Akunnungu." Nipele che Elikana ni che Hana ŵankwakwe ŵausile kumungwawo.

21 Ambuje Akunnungu ŵatendele yambone che Hana, nombewo ŵaŵeleche ŵanache ŵatatu achalume ni ŵanache ŵaŵili achakongwe, kele katema ko jwanjchanda Samweli jwajendelechele kwatumichila Ambuje.

22 Kele katema ko che Eli ŵaliji achekulwipe kwannope. Ŵapilikene indu yose iŵaipanganyaga achiŵanagwe achalume kwa ŵandu ŵose ŵa ku Isilaeli, ni iŵatite kugona ni achakongwe ŵaŵaliji nkupanganya masengo pannango wa lisakasa lya kusimanilana kwaligongo lya Akunnungu, 23 ŵausisye, "Ligongo chichi nkupanganya yele indu yi? Mbilikene kutyochela kwa ŵandu ŵose nkati yangalumbana inkuipanganya. 24 Nkatendaga yeleyo achiŵanangu ligongo yele indu inguipilikana kutyochela kwa ŵandu ŵa Ambuje Akunnungu ili yakusakala. 25 Iŵaga Mundu antendele sambi njakwe, Ambuje Akunnungu akukombola kunchenjela mundu jo. Nambo mundu anneŵelaga Ambuje Akunnungu ŵani ŵaakukombola kwaŵendela kwa Ambuje Akunnungu kuti alecheleswe?" Nambo achiŵanagwe wo nganampilikanila atati jwawo, pakuŵa Ambuje Akunnungu ŵamasile kulamula kwaulaga.

26 Jwanchanda che Samweli ŵapundile kukula ni kukola lisusa, achanonyelesyaga Ambuje Akunnungu pamo ni ŵandu.

27 Pa lyuŵa limo jwakulondola jwa Akunnungu ŵaiche kwa che Eli ni kwasalila, "Ambuje Akunnungu akuti yelei: ‘Naliunukwile kwa ŵapa ulongo wa che Haluni, atati ŵenu paŵaliji ku ukapolo wa Falao chilambo cha ku Misili. 28 Mwa ngosyo syose sya ku Isilaeli naasagwile che Haluni atati ŵenu ni ŵapa ulongo wao kuti aŵe ŵambopesi ŵangu, apeleche mbopesi sya kutinisya pa chilisa changu, atutumisye ubani ni kuwala chisibao ali nkuundumichila. Naapele malo ja mbopesi syangu sya kutinisya siŵambelechelaga Ŵaisilaeli pa mooto. 29 Ligongo lya chichi nkusimilila mata mbopesi syakutinisya ni sadaka sinaasalile ŵandu ambelechele une? Mmwejo mwachimbichisye ŵanache wenu kupunda une kwa kulilisya mwachinsyene pa malo ja kunakana ja sadaka syakuumbelechela ŵandu ŵangu Ŵaisilaeli!’ 30 Kwayele, Ambuje Akunnungu, Akunnungu ŵa ku Isilaeli akuti nnyi, ‘Nalanjile kuti ulongo wenu ni ulongo wa achachekulu ŵenu taachindumichila paujo pangu moŵa gose pangali mbesi,’ nambo sambano Ambuje Akunnungu akunsalila yelei, ‘Chele chindu cho ngaandenda ng'o mpela inatite pakusala.’ Tinaachimbichisye aŵala ŵaakunjimbichisya ni aŵala ŵaakunyelusya tinaanyelusye. 31 Mpilikane, moŵa gakuika patinaaulaje achachanda wose pa ulongo wenu ni pa ntundu wenu, ni ngasapagwa jwannume jwalijose juchatame kwichila mwakuchekulupa. 32 Nomwe tinnaje patimme pa nyuumba jangu, nachiŵamuno Ŵaisilaeli chakole upile, ngapagwa mundu mu ulongo wenu juchatame ni kwichila mwakuchekulupa. 33 Jwajuli jose jwati ngasinantyosya pa chilisa pangu, tasigalile kuti alile ni kupetesya ntima wakwe, ni achalume ŵajinji mu uŵelesi wenu tachiwa akanaŵe kuchekulupa. 34 Ni chindu chichichasimane achachanda ŵenu ŵaŵili, che Hofini ni che Finehasi ni achi: Wose ŵanaŵaŵili tachiwa pa lyuŵa limo. Chele chindu cho ni chichichiŵe chimanyisyo. 35 Nipele tinjilisagulila jwambopesi jwine jwakukulupilichika juchapanganye malinga ni aila yaili mu ntima mwangu ni inguiganichisya. Jwelejo tinjimpa uŵelesi wakulimbanga utachitumichila paujo pa mwenye jutinansagule. 36 Mundu julijose juchasigalile mu ulongo wenu chanjaulile jwambopesi jo ni kunjinamila ni kummenda mbiya pane chipaande cha nkate. Nombe chansalile, ‘Choonde muumbe masengo galigose pa umbopesi kuti ngombole kupata chakulya.’"