1 Paŵawile che Sauli, che Daudi ŵausile pakumala kwapunda Ŵaamaleki, ŵatemi ku Sikilagi kwa moŵa gaŵili. 2 Pa lyuŵa lyaatatu ŵaiche mundu kutyochela ku chigono chi che Sauli, ali apapwilepapwile yakuwala yakwe, sooni ali alitasile luundu muntwe mwakwe. Mundu jo paŵaiche ku che Daudi ŵaligwisisye paasi pa makongolo gakwe kuti ŵaape luchimbichimbi. 3 Che Daudi ŵammusisye, "Nkutyochela kwapi?" Nombejo ŵajanjile, "Ndolweche ku chigono cha Ŵaisilaeli." 4 Che Daudi ŵammusisye, "Muusalile indu yaliji uli kweleko?" Mundu jula ŵanjanjile, "Ŵandu ŵetu ajiutwiche ngondo, achajinji mwa uweji aulajikwe. Kupunda ni yeleyo, che Sauli ni che Yonatani mwanagwe nombe aulajikwe." 5 Che Daudi ŵammusisye jwanchanda jula, "Nkumanyilila chinauli kuti che Sauli ni che Yonatani mwanagwe awilenje?"

6 Jwanchanda jula ŵajanjile, "Yagambile kutyochela pe, une naliji pa chitumbi cha Giliboa. Nammweni che Sauli ali ajegemele mpamba wakwe ni ŵakukwela falasi ŵa ŵammagongo ni mutuka syao ŵaliji nkwaŵandichila nnope. 7 Che Sauli paŵagalawiche kunyuma, ŵamweni une, nipele ŵamilasile. Uneji najitiche, ‘Ndili apano mwenye!’ 8 Ŵamusisye kuti ‘Mmwe ŵani?’ Nanjanjile kuti une ndili Mwamaleki. 9 Pelepo ŵaasalile, ‘Mmandichile muumulaje, pakuŵa amulesye kwannope, ni ipwetesi ipundile. Nambo ndili chiwela jwanjumi.’ 10 Kwayele, nanjaulile ni kummulaga, ligongo naimanyilile kusyene kuti agwaga paasi, ngakombola kulama mwakupunda. Nipele chindu mpela singwa cha chimwenye chichaliji muntwe mwakwe ni likembe liŵawasile mmakono mwakwe, yanayose nanjigalile mmwe, ambuje jwangu."

11 Che Daudi ŵaipapwile yakuwala yakwe mu kusupuka. Ni ŵandu ŵaŵaliji pampepe nawo ŵala ŵatesile iyoyopeyo. 12 Ŵalisile ni kulila kwamalumbo, kwaligongo li che Sauli, ni che Yonatani mwanagwe ni Ŵaisilaeli, ŵandu wakwe Ambuje Akunnungu, ni ŵataŵile mpaka ligulo, pakuŵa achajinji mwao ŵaliji aulajikwe ku ngondo. 13 Che Daudi ŵammusisye ajula jwanchanda juŵampelechele utenga, "Nkutyochela kwapi?" Jwelewo ŵajanjile "Uneji ndili Mwamaleki, ngutama mu chilambo chenu nti jwannendo." 14 Che Daudi ŵammusisye, "Yaŵele uli mmwe pangajogopa kummulaga mundu jwasagulikwe ni Ambuje Akunnungu kwa kwajitilila mauta?" 15 Nipele che Daudi ŵammilasile jwanchanda jumo mwa achachanda ŵakwe ni ŵansalile, "Mummulaje mundu ju!" Jwanchanda jula ŵansomile Mwamaleki jula ni kummulaga. 16 Che Daudi ŵansalile, "Nliulajisye mwasyene, ligongo nsasile mwasyene kwa kang'wa jenu kuti, ‘Nammuleje mundu juŵasagulikwe ni Ambuje Akunnungu kwa kwajitilila mauta.’"

17 Che Daudi ŵajimbile lujimbo lwakunlilila mundu jwawile kwaligongo li che Sauli ni che Yonatani mwanagwe. 18 Che Daudi ŵalamwile kuti ŵandu ŵa ku Yuda ajiganyikwe lujimbo lo, nombe lujandichikwe mu chitabu cha Yashali. Che Daudi ŵajimbile yeleyi:

19 "Ŵandu ŵankulilapila ni kwasangalilali mwanya Isilaeli,

aulajikwe pa matumbi genu.

Iŵatite kuwa ŵandu ŵaakukombola kujiputa ngondo!

20 Nkaasalila jele ngani ji ŵandu ŵa musi wa ku Gati

pane mmatala ga musi wa ku Ashikeloni.

Nangaŵa yeleyo, achakongwe ŵa Ŵafilisiti tachisangalila,

achiŵali ŵa ŵandu ŵangakwamanyilila Akunnungu tachijangalalila."

21 "Mwanya matumbi ga ku Giliboa, mangame ni ula jikanya pa ŵanyamwe.

Namose migunda jenu jikasogola indu moŵa gose.

Pakuŵapo kweleko chindu chakulichinga pangondo cha mundu jwakumanyilila kujiputa ngondo chapatwiche paasi,

chindu chakulichinga pangondo chi che Sauli nganichichimbichikwa.

22 Kwaligongo lya miasi ja ŵandu ŵaulajikwe, kwaligongo lya ilu ya ŵandu ŵali ni machili,

che Yonatani ŵaliji ŵakulonda yambone ni upinde wao.

Lipanga li che Sauli lyauleje ŵandu ŵajinji."

23 "Che Sauli ni che Yonatani ŵanonyelwe ni kunonyelecheka.

Nganalekangana ali chijumi atamuno pa chiwa

ŵaliji ŵachitema kujipunda kapungu, ŵaliji ŵamachili kugapunda masimba.

24 Achakongwe ŵa ku Isilaeli, munlilile che Sauli!

ŵammwasisye mwanya yakuwala yechejewu ya ndalama jekulungwa,

ŵatotele yakusalalisya ya sahabu mu yakuwala yenu.

25 Yatiteje kuwa ŵandu ŵakumanyilila kujiputa ngondo!

awilenje ali pa ngondo.

Che Yonatani agonile ali awile pa matumbi.

26 Ngulilasika kwaligongo lyenu, che Yonatani nlongo njangu,

mwaliji ŵa pantima pangu.

Chinonyelo chenu pa uneji chaliji chakusimonjeka nnope,

chaliji chekulu kupunda jwankongwe kunnonyela ŵankwakwe.

27 Yatiteje kuwa ŵandu ŵakumanyilila kujiputa ngondo,

ni yakumenyanila yao yangondo yangali masengo."