1 Pakumala yeleyo, che Daudi ŵaagungumuchile sooni ni Ŵafilisiti, ni ŵaapundile. Ŵasumwile musi wa Metege Ama kutyochela kwa Ŵafilisiti. 2 Sooni ŵaapundile ŵangondo ŵa Ŵamoabu. Ni ŵaapanjile pa misitali mateka wo, ni kwagoneka manguku pasi. Ŵalamulaga kuti aŵala ŵaali pa misitali jiŵili aulajikwe ni aŵala ŵaali pa msitali ŵaatatu ŵaaleche ŵajumi. Kwayele, Ŵamoabu ŵaliji nkwatumichila che Daudi ni ŵaliji nkulipa nsongo.

3 Sooni che Daudi ŵampundile che Hadadeseli mwana ju che Lehobu, mwenye jwa ku Soba jwa chilambo cha Ŵaalamu. Che Daudi ŵapundile yeleyi katema che Hadadeseli paŵaliji mwitala kwaula kukugausya malo ga ku lusulo lwa Efulate liŵe pa utawala wakwe. 4 Che Daudi ŵaakamwile mateeka ŵandu ŵakukwela mu falasi elufu moja na mia saba, ni ŵangondo ŵakwenda wapasi elufu ishilini. Nipele che Daudi ŵakatile mitasi ja mmakongolo ga panyuma ja falasi ŵaakukwekwelemya mutuka, nambo ŵasigesye falasi ŵakwanila kukwekwelemya mutuka mia moja.

5 Ŵaalamu ŵakutama ku Damesiki paŵajawile kukunkamuchisya che Hadadeseli, mwenye jwa ku Soba, che Daudi ŵaagungumuchile ni kwaulaga ŵandu elufu ishilini na mbili. 6 Sooni che Daudi ŵaŵisile igono ya ŵangondo wa Ŵaalamu ŵakutama ku Damesiki. Nipele Ŵaalamu ŵaliji ŵakutumichila ŵakwe ni sooni ŵaliji nkulipa nsongo. Ambuje Akunnungu ŵampele che Daudi kupunda kulikose kuŵajaulaga. 7 Che Daudi ŵajigele yakulichinjila pantima ya sahabu iŵaijigalaga ŵangondo ŵa che Hadadeseli ni kuijausya ku Yelusalemu. 8 Sooni mwenye che Daudi ŵajigele shaba jejinji kwannope kutyochela ku misi ja ku Beta ni ku Belotai misi jiŵajitawalaga che Hadadeseli.

9 Che Toi mwenye jwa ku Hamati paŵapilikene kuti che Daudi ŵaapundile ŵangondo wose ŵa che Hadadeseli, 10 ŵantumile che Yolamu mwanagwe kwa mwenye che Daudi kukwatogolela ligongo lyakuti amputile che Hadadeseli ni kumpunda. Ŵatesile yeleyo ligongo mwenye che Hadadeseli ni mwenye che Toi ŵaliji ŵammagongo nombe ŵamenyene ngondo kakajinji. Pakwaula po che Yolamu ŵanjigalile che Daudi ntuuka wa indu yejinji yepanganyikwe ni madini ga feza ni sahabu ni shaba. 11 Yele indu yo che Daudi ŵaiŵisile pajika kwaligongo lya Ambuje Akunnungu pamo ni madini ga feza ni sahabu ni jiŵasumwile kwa ŵandu ŵa ilambo yose ŵele ŵaŵaapundile pa ngondo, 12 yaani kutandilila ku Edomu ni ku Moabu ni ku Amoni ni kwa Ŵafilisiti ni ku Amaleki pamo ni indu iŵaijigele kwa mwenye che Hadadeseli mwanagwe che Lehobu mwenye jwa ku Soba.

13 Nipele che Daudi ŵapundile kumanyika kwannope, paŵaujaga pakumala kwaulaga Ŵaedomu elufu kumi na nane, ku Chiŵata cha Njete. 14 Ŵaŵisile chigono cha ŵangondo ŵakwe pa Edomu jose. Nombe Ŵaedomu wose ŵa kweleko ŵaliji ŵakutumichila ŵakwe. Ambuje Akunnungu ŵampele che Daudi kupunda kulikose kuŵajaulaga.

15 Kwayele, che Daudi ŵatawele chilambo chose cha Ŵaisilaeli, ni ŵalongwesye ŵandu ŵakwe kwagoloka pangali lusagu. 16 Che Yoabu mwanagwe che Seluya, ni juŵaliji jwankulu jwa ŵangondo. Che Yehoshafati mwanagwe che Ahiludi, ni juŵaliji jwakulemba indu yose iyatendekwe. 17 Che Sadoki mwanache ju che Ahitubu ni che Ahimeleki mwanache ju che Abiasali, ŵaliji ŵambopesi. Che Selaya ŵaliji jwakulemba indu yetendekwe pankungulu. 18 Che Benaya mwanache ju che Yehoyada ŵaliji chilongola jwa ngosyo sya Ŵakeleti ni Ŵapelesi ŵaŵaliji ŵakulindilila ŵa che Daudi, nombe ŵanache ŵa che Daudi ŵaalongwesye ŵandu kugakuya malamusi ga pa uchimwene.