1 Ni yaliji, pakumala yeleyo, che Daudi ŵammusisye Ambuje Akunnungu kuti, "Ana nyaule ngaujigale musi umo mwa misi ja ku Yuda?"

Ambuje Akunnungu ŵajanjile "Njaule!"

Che Daudi ŵausisye "Ana nyaule pa musi chi?"

Ambuje Akunnungu ŵajanjile, "Njaule musi wa ku Hebuloni." 2 Kwayele che Daudi ŵajawile ku Hebuloni, pamo ni achiŵankwakwe ŵaŵili ŵala, che Ahinoamu jwa ku Yesileeli ni che Abigaili jwankongwe jwaŵaŵililwe ni ŵankwakwe che Nabali kutyochela musi wa ku Kalimeli. 3 Sooni che Daudi ŵaajigele ŵandu ŵakwe, kila mundu ali ni ŵapa ulongo wakwe. Ŵatemi mmisinda jijaliji chiŵandi ni ku Hebuloni.

4 Nipele ŵandu ŵa ku Yuda ŵanjaulile che Daudi ku Hebuloni ko, ŵanjitilile mauta aŵe mwenye jwawo.

Che Daudi paŵapilikene kuti ŵandu ŵa ku Yabeshi Gileadi ni ŵaŵansichile che Sauli, 5 ŵaatumile ŵandu ku Yabeshi Gileadi ko kwasalila kuti, "Ambuje Akunnungu ampe upile, pakuŵa mwalosisye kulupilichika ku che Sauli mbuje gwenu pa kunsika mwilembe. 6 Sambano, Ambuje Akunnungu anlosye mwanyamwe chinonyelo chawo changamala ni kulupichika kwawo kukwenu. Ni une tinantendele indu yambone ligongo lya intesile yo. 7 Sambano nlimbeje ntima ni kukola ntima wangajogopa, pakuŵa che Sauli, ambuje ŵenu, awile, ni ŵandu ŵa ku Yuda anyitilile mauta une me mwenye jwawo."

8 Che Abuneli mwana ju che Neli chilongola jwankulu jwa mpingo ŵa ngondo u che Sauli ŵaliji anjigele che Ishibosheti mwana ju che Sauli ni kunjausya ku Mahanaimu. 9 Kweleko, che Abuneli ŵantangesye che Ishibosheti kuŵa mwenye jwa chilambo cha ku Gileadi ni ku Asheli ni ku Yesileeli ni ku Efulaimu ni ku Benjamini ni ku Isilaeli kose.

10 Che Ishibosheti mwanache ju che Sauli ŵaliji ni yaka alobaini paŵatandite kutawala ku Isilaeli, nombejo ŵatawele kwa yaka iŵili. Nambo ŵandu ŵa lukosyo lwa Yuda ŵankuiye che Daudi. 11 Che Daudi ŵaliji mwenye jwa ŵandu ŵa lukosyo lwa Yuda kwele ku Hebuloni ko, kwa yaka saba ni nusu.

12 Che Abuneli, mwana ju che Neli ni ŵangondo ŵa che Ishibosheti mwanache ju che Sauli ŵatyosile ku Mahanaimu ni kwaula ku Gibeoni. 13 Che Yoabu mwana ju che Seluya ni ŵangondo ŵa che Daudi ŵatyosile ni kusimana ni che Abuneli ni ŵandu ŵakwe ku litanda lyalili ku Gibeoni ko. Mpingo umo waliji upaande umo ni mpingo wine waliji upaande wine wa litanda lyo. 14 Che Abuneli ŵansalile che Yoabu, "Achachanda ŵenu ni ŵetu aiche, amenyane tulole." Che Yoabu ŵajanjile kuti, "Yambone, amenyaneje." 15 Pelepo ŵangondo kumi na mbili waŵajimi pamalo pa che Ishibosheti ni lukosyo lwa Benjamini ŵamenyene ni ŵangondo kumi na mbili ŵa che Daudi.

16 Jwajulijose ŵankamwile jwammagongo jwakwe ntwe, ni ŵansomile njakwe jo mumbalati ni lipanga, kwayele wosepe ŵanaŵaŵili ŵagwile pasi, ali awile. Kwayele pamalo po paŵilanjikwe Helikati Hasulimu, malumbo gakwe, "Luŵala lwa mapanga." 17 Nipele ŵandu wose ŵatandite kuputana. Mbaande syose siŵili syalimbene kwannope, nambo ŵangondo ŵa che Daudi ŵaapundile che Abuneli ni ŵangondo ŵa ku Isilaeli. 18 Ŵanache ŵatatu ŵa che Seluya: Che Yoabu ni che Abishai ni che Asaeli ŵaliji kukoko. Che Asaeli ŵaliji ŵakupakombola kuutuka mpela ngolombwe. 19 Che Asaeli ŵantopwesye che Abuneli pangapela, ŵagambile sokota pangalola kunchiji pane kunlyo. 20 Che Abuneli paŵagalawiche panyuma ni kummona che Asaeli, ŵansalile kuti, "Ana mmweji che Asaeli?"

Nombejo ŵajanjile, "Elo, ni uneji."

21 Che Abuneli ŵansalile, "Nneche kuumutusya, ngaulauche kunlyo pane kunchiji, mumbulaje jwangondo jumo, njigale yanayose yakwete." Nambo che Asaeli nganasaka kuti aleche kuntoposya che Abuneli jo. 22 Che Abuneli ŵansalile che Asaeli kaaŵili, "Nneche kuundoposya. Kwachichi nammulaje? Pakuŵa nammulagaga timengane ni achimwene jwenu che Yoabu." 23 Nambo che Asaeli nganasaka kwaleka, kwayele che Abuneli ŵansomile che Asaeli jo mlutumbo ni mpamba wakwe, mpamba wo wakopochele kungongo kwakwe. Che Asaeli ŵagwile pasi, ni kuwa papopo. Ŵandu wose ŵaŵaiche pamalo pele piŵawilile che Asaeli ŵajimaga jii.

24 Nambo che Yoabu ni che Abishai ŵatandite kummutusya che Abuneli. Palyakapilaga lyuŵa, ŵaiche ku chitumbi cha Ama, chachili kungopoko lyuŵa kwa Gia, ku litala lyalikwaula ku chipululu cha Gibeoni. 25 Ŵandu ŵa lukosyo lwa Benjamini ŵasongene pamo kukamulangana ni che Abuneli, kwayele ŵakweile pa chitumbi ali chile kwa ngondo. 26 Nipele che Abuneli ŵammilasile che Yoabu ni kummusya, "Ana tutumenyane moŵa gose? Ana ngankwiwona kuti mbesi jakwe tijiwe jakupwetesya? Uweji tuli achalongo, ana chakachi timwalekasye ŵandu ŵenu kututoposya?"

27 Che Yoabu ŵansalile, "Ngulumbila kwa Akunnungu ŵajumi, kuti ngankaŵechete chele chindu cho, kusyene ŵandu ŵangu ngakaleche kwatoposya achalongo achinjawo mpaka malaŵi kundaŵi." 28 Kwayele, che Yoabu ŵagombile lipenga, ni ŵandu ŵalesile kwatoposya Ŵaisilaeli, ni ngondo jila jamalile pelepo.

29 Che Abuneli ni ŵandu ŵakwe ŵajesile chilo chose ku lichemba lya lusulo lwa Yolodani. Ŵajombweche lusulo lwa Yolodani, ŵajesile muusi wose ni ŵaiche ku Mahanaimu.

30 Che Yoabu paŵausile kwatopola che Abuneli, ŵasongenye ŵandu ŵakwe wose, ni ŵamanyilile kuti ŵangondo kumi na tisa ŵa che Daudi, asoŵile, pamo ni che Asaeli. 31 Nambo ŵangondo ŵa che Daudi ŵaliji auleje ŵandu mia tatu na sitini ŵaŵaliji pamo ni che Abuneli, ŵaŵatyochele mu lukosyo lwa Benjamini. 32 Che Yoabu ni ŵandu ŵakwe ŵachijigele chiilu chi che Asaeli, ŵachisichile ku lilembe lya atatigwe, lyalili kwele ku Beselehemu ko. Nipele ŵajesile chilo chose, ni lyuŵa likanaŵe kopoka ŵaiche ku musi wa Hebuloni.