1 Che Daudi ŵaasonganyisye sooni ŵangondo elufu salasini ŵa ku Isilaeli ŵakumanyilila kuputana ngondo. 2 Che Daudi ni ŵandu ŵakwe ŵapite ku Baala Yuda, kwaula kukulijigala kweleko Lisanduku lya Lilangano lya Ambuje Akunnungu lyalikuŵilanjikwa kwa liina lyakwe Ambuje Akunnungu ŵamachili, ŵakutama pa chitengu chakwe cha umwenye, pachanya pa yepanganyikwe yaili ni mapapiko. 3 Nipele, ŵalijigele lisanduku lya lilangano lya Ambuje Akunnungu kutyochela mu nyuumba ji che Abinadabu jijaliji ku chitumbi, ŵaliŵisile mmutuka jasambano. Che Usa ni che Ahio ŵanache ŵa che Abinadabu ŵaliji nkujilongosyo jele mutuka jo, 4 jili ni lisanduku lya lilangano lya Ambuje Akunnungu, ni che Ahio ŵaliji nkulongolela chammbujo mwa lisanduku lyo. 5 Che Daudi ni ŵandu wose ŵa ku Isilaeli, ŵaliji nkwimba nyiimbo ni kutyala kwa machili gao gose, paujo pa Ambuje Akunnungu. Ŵagombile ingwenyengwenye ni inanda ni tugoma twamwana ni kayamba ni choombo cha paung'asi chachikuŵilanjikwa matoasi. 6 Paŵaiche ku luŵala lwakuputukulila yakulya lwa ku Nakoni, che Usa ŵaugolwesye nkono wakwe ni kulikamula lisanduku lya lilangano lya Ambuje Akunnungu pakuŵa ng'ombe sila syalikuŵele 7 Pelepo, lutumbilo lwa Ambuje Akunnungu lwannyichilile che Usa. Kwayele Akunnungu ŵammuleje papopo. Che Usa ŵawile papopo chiŵandi ni lisanduku lya lilangano lya Ambuje Akunnungu. 8 Nombe che Daudi yaachimile pakuŵapo Ambuje Akunnungu ŵanjamwiche che Usa kwa chikali. Kwayele, pamalo po paŵilanjikwe Pelesi Usa mpaka lelojino. 9 Palyuŵa lyo che Daudi ŵanjogwepe Ambuje Akunnungu, ni ŵatite, "Sambano uneji tingombole chinauli kulijigala ni kuligosa lisanduku lya lilangano lya Ambuje Akunnungu?" 10 Kwayele, che Daudi ŵajogwepe kulijigala lisanduku lya lilangano lya Ambuje Akunnungu ku musi wakwe musi wa che Daudi, nambo che Daudi ŵalijawisye ku nyuumba ku che Obedi Edomu jwa musi wa ku Giti. 11 Lisanduku lya lilangano lya Ambuje Akunnungu lyo lyatemi ku nyuumba ji che Obedi Edomu kwa miesi jitatu, nombe Ambuje Akunnungu ŵampele upile che Obedi Edomu ni ŵapannango wakwe wose.

12 Mwenye che Daudi paŵapilikene kuti Ambuje Akunnungu ŵapele upile ŵandu ŵapannango u che Obedi Edomu ni indu yose yakwete ligongo lya lisanduku lya lilangano lya Ambuje Akunnungu, ŵajawile kukulijigala lisanduku lya lilangano lya Ambuje Akunnungu mu nyuumba ji che Obedi Edomu ni kulijausya ku musi u che Daudi ali nkusengwa. 13 Ŵandu ŵaŵalijigele lisanduku lya lilangano lya Ambuje Akunnungu ŵala, paŵajesile sajo sita, che Daudi ŵaajimiche, ŵapeleche mbopesi ja ng'ombe jankambako ni mwanache jwa ng'ombe jwakwimbala. 14 Che Daudi ŵatyasile paujo pa Ambuje Akunnungu kwa machili gao gose ali awasile nguo ja chimbopesi. 15 Kwayele, che Daudi ni Ŵaisilaeli wose ŵalijawisye lisanduku lya lilangano lya Ambuje Akunnungu mpaka ku musi wa che Daudi kwa kuchina ni ali nkugomba mapenga. 16 Lisanduku lya lilangano lya Ambuje Akunnungu palyajinjilaga ku musi u che Daudi, che Mikali mwali ju che Sauli ŵalingulile pedilisha ni ŵammweni mwenye che Daudi ali nkugulukaguluka ni kutyala paujo pa Ambuje Akunnungu, nipele, ŵannyelwisye muntima mwakwe. 17 Nipele ŵalijinjisye lisanduku lya lilangano lya Ambuje Akunnungu mu lisakasa lyati che Daudi ŵalijimiche pelepo ni ŵaliŵisile pamalo pakwe. Nombe che Daudi ŵapeleche mbopesi syakutinisya ni mbopesi sya chitendewele paujo pa Ambuje Akunnungu. 18 Che Daudi paŵamasile kupeleka mbopesi sya kutinisya ni mbopesi sya chitendewele, ŵaapele upile ŵandu kwa liina lya Ambuje Akunnungu ŵali ni machili gose. 19 Sooni ŵaagaŵile yakulya ŵandu wosepe, achalume ni achakongwe, jwalijose ŵampele nkate ni chipaande cha nyama jejoche ni nkate wekolosye ni isogosi ya sabibu syejumu. Kanyuma ŵandu wose ŵatyosile, jwalijose jwausile kunyuumba kwakwe. 20 Kanyuma che Daudi ŵausile kunyuumba jakwe kuti akaape upile ŵandu ŵamunyuumba jakwe, che Mikali mwali ju che Sauli ŵajawile kukwachingamila, ni ŵatite, "Mwenye jwa Ŵaisilaeli alijalwisye lelo, kwa kutama matakope paujo pa ŵakutumichila ŵakwe, achalume ni achakongwe mpela jwampungwane yakuti kuwula yakuwala yakwe paujo pa ŵandu pangali soni!"

21 Che Daudi ŵanjanjile che Mikali, "Naliji nkutyala paujo pa Ambuje Akunnungu, juŵasagwile une pamalo pa atati ŵenu, ni ŵandu ŵa paulongo wakwe, kuti me mtawala pa Isilaeli, ni kwa ŵandu ŵakwe Ambuje Akunnungu, kwayele, uneji tindyale pe kwachimbichisya Ambuje Akunnungu. 22 Sooni tinalitulusye nansyene mwakupunda ni sambano. Mmweji timumone nganiŵa chindu, nambo ŵele ŵakutumichila achakongwe umwasasile wo tachinjimbichisya."

23 Nipele che Mikali mwali ju che Sauli nganaŵeleka mpaka chiŵa chakwe.