2 Samuel 18

Che Abusalomu akuulajikwa

1 Che Daudi ŵaasonganyisye ŵangondo ŵaŵaliji pamo nawo, ni ŵaaŵisile mmipingo ja ŵangondo elufu mojamoja ni mipingo ja ŵangondo mia moja mia moja, ali mkulongoswa ni ilongola ŵao. 2 Che Daudi ŵaatumile ŵangondo ŵakwe ku ngondo ali ŵaagaŵenye katatu: Mpingo waandanda ŵalongwesye che Yoabu, waaŵili ŵalongwesye che Abishai mwanache jwa che Seluya, mpwakwe che Yoabu ni mpingo waatatu ŵalongwesye che Itai jwakutyochela ku Giti. Mwenye ŵaasalile ŵandu kuti, "Uneji nansyene tinjijaula ni ŵanyamwe ku ngondo." 3 Nambo ŵangondo ŵansalile, "Mmwejo nganjaula ni uwe, iŵaga uweji tutuutuche, ŵammagongo ngaikosya nkati uweji. Namose mbindikati jetu awaga ŵanyawo ngaikosya, mmwejo nli mundu jwamuimu kwapunda ŵangondo elufu kumi mwa uweji. Kwayele ili yambone nnope kwa mmwejo kutukamuchisya nli mmusi." 4 Mwenye ŵansalile kuti, "Chachilichose chinkuchiwona kuti chikwanonyelesya mwanya, uneji tinjichitenda." Kwayele mwenye ŵajimi mungulugulu nnango, akuno ŵangondo ŵakwe ali nkupita kutyoka paasa ali mmipingo ja ŵandu mia moja mia moja ni mmipingo ja ŵandu elufu mojamoja. 5 Mwenye ŵaalamulile che Yoabu ni che Abishai ni che Itai kuti, "Muntendele chanasa jwanchanda che Abusalomu kwa ligongo lyangu." Ŵandu wose ŵampilikene mwenye paŵaasalilaga achakulu ŵa ngondo ŵakwe yankati che Abusalomu.

6 Kwayele mpingo wa ŵangondo wa che Daudi ŵapite mu ukweti kuputana ngondo ni ŵandu ŵa ku Isilaeli. Ngondo jo jatendeche mu likonde lya ku Efulaimu. 7 Ŵakutumichila ŵa che Daudi ŵaapundile Ŵaisilaeli. Pa lyuŵa lyo ŵauleje ŵandu mpela elufu ishilini. 8 Jele ngondo jo jajenele ku chilambo kose ni ŵandu ŵajinji ŵawilile mwikonde kupunda ni aŵala ŵaŵawile kwa lipanga ku ngondo.

9 Nipele, che Abusalomu ali akwesile pa mbunda falasi jwakwe, wasimine ni ŵakutumichila ŵa che Daudi. Mbunda falasi jila pajapitaga kuusi kwa lujambi lwekulungwa lwa mwaloni, pelepo umbo sya che Abusalomu syapaniile pa mwaloni po. Che Abusalomu wasigalile ali nkulelemba, ni mbunda falasi jakwe jajendelechele mmbujo. 10 Nipele mundu jumo paŵaiweni yeleyo, waasalile che Yoabu kuti, "Nammweni che Abusalomu ali nkulelemba pa chitela cha mwaloni." 11 Che Yoabu ŵansalile mundu jo kuti, "Nkuti mwaweni che Abusalomu, ana ligongo chi nganimwaulaga papopo? Une ngasangalele kwakuti ngampele ipande likumi ya madini ga feza kupwatika nkaanda wa jwangondo jwamachili." 12 Nambo mundu jo ŵajanjile che Yoabu kuti, "Atamuno kuti ngaŵe mbochele mmakono mwangu ipande ya feza yakwana elufu moja ngangatambasukule nkono wangu kuti nankwaye mwanache jwa mwenye jo. Nkumbuchile kuti mwenye ŵanlamulile mmwejo ni che Abishai ni che Itai, uwe tuli nkupikana achitiji, munkolele chanasa jwanchanda che Abusalomu kwaligongo lyangu. 13 Ni sooni nganyosisye maloŵe ga mwenye wo, pakummulaga jwanchanda jo, ni ikamanyiche, pakuti pangali yakusisika pameso pa mwenye sooni mmwejo mwasyene ngankanjenjele." 14 Che Yoabu ŵansalile, "Nkaangaŵisya." Ŵajigele mipamba jenandi jitatu mmakono, ŵajawile ni kunsoma che Abusalomu pantima, che Abusalomu ali chiŵela ŵajumi pa lujambi lwa mwaloni lula. 15 Nipele, achachanda likumi ŵaŵajigalanga yakumenyanilana che Yoabu, ŵaiche kwasyungula che Abusalomu, ŵamputile ni kummulaga.

16 Pelepo che Yoabu ŵagombile lipenga ni ŵangondo wose ŵalesile kwakuilisya Ŵaisilaeli, ŵausile. 17 Ŵanjigele che Abusalomu ŵanjasile ku lisimbo lyekulungwa mu litinji mula ni kugaunjika maganga liunjili lyekulungwa. Ŵandu wosepe ŵa ku Isilaeli ŵautwiche, kila mundu kumangwakwe. 18 Che Abusalomu paŵaliji ŵajumi, ŵalitaŵile luchanamila mu Chiŵata cha Mwenye, pakuŵapo ŵatite kuti, "Nganingola mwanache jwannume jwampaka aŵilanjilwe ni liina lyangu kuti ŵandu angumbuchileje." Ŵalupele luchanamila lyo liina lyawo. Nipele mpaka lelo jino lukuŵilanjikwa, "Luchanamila lwa che Abusalomu."

Che Daudi akusalilwa nkati chiwa chi che Abusalomu

19 Nipele, che Ahimaasi mwanache jwa che Sadoki, ŵatite, "Mungunde mutuche ngansalile mwenye ngani si yakuti Ambuje Akunnungu ankulupwisye mmakono ga ŵammagongo ŵakwe." 20 Che Yoabu ŵanjanjile kuti, "Lelo ngaŵa mmwe utinjausye ngani syo. Nkukombola kwausya ngani pa lyuŵa line. Nambo lelo ngansachilwa kwausya ngani silisyose pakuŵa mwanache jwa mwenye awile." 21 Pelepo che Yoabu ŵansalile mundu jumpepe jwali Mkushi achitiji, "Mmejo, njaule nkaasalile mwenye aila innyieni." Mkushi ŵajineme uchimbichimbi paujo pa che Yoabu, ni ŵatyosile achiutukaga. 22 Nipele che Ahimaasi mwanache jwa che Sadoki ŵansalile sooni che Yoabu kuti, "Ngaŵa chindu, mungunde ni une jwakwe naakuye Mkushi jula chapanyuma njiutukaga!"

Che Yoabu ŵansalile, "Mwanangu ligongo chichi nkuti mwakuye chapanyuma? Mmwejo ngampata mbote jilijose ligongo lya utenga wu!"

23 Che Ahimaasi ŵajanjile "Ngaŵa chindu, uneji ngusaka kwaula."

Nipele che Yoabu ŵansalile, "Ayaga, njauleje." Pelepo che Ahimaasi ŵautwiche achipitaga litala lya kuchiŵata cha lusulo lwa Yolodani, ni ŵampundile Mkushi jula.

24 Katema che Daudi ali atemi pasikati ja nnango wa musi waukuugula chapasa ni chamunkati jwakulindilila pannango ŵakwesile pa likumba mpaka penani pa nnango ni paŵalolite ŵammweni mundu ali nkuutuka jika. 25 Jwakulindilila jo ŵanyanyisye kunsalila mwenye. Mwenye ŵatite, "Naga ali jikape nikuti ali ni ngani syambone." Mundu jula ŵaiche pakuŵandichila.

26 Jwakulindilila ŵammweni mundu jwine ali nkuutuka, ŵaŵilasile sooni pannango achitiji, "Nnole, mundu jwine akuutuka ali jika!"

Mwenye ŵatite, "Nombe najo akuichisya ngani syambone." 27 Jwakulindilila jula ŵatite, "Nguona kuti ajula jwakuutuka mwakupunda jula ali che Ahimaasi mwanache jwa che Sadoki."

Mwenye ŵatite, "Jwelejo ali mundu jwambone, akutuichisya ngani syambone."

28 Pelepo che Ahimaasi ŵansalile mwenye kwa kunyanyisya kuti, "Indu yosepe ili chenene." Ŵatindiŵele ni kukotama mpaka paasi paujo pa mwenye kwa uchimbichimbi ni kuti, "Achimbichikwe Ambuje Akunnungu, Akunnungu ŵenu, jwankulupwisye kutyochela kwa ŵandu ŵaŵangalawiche alakwe ambuje ŵangu mwenye." 29 Mwenye ŵammusisye, "Uli jwanchanda che Abusalomu ali ichenene?"

Che Ahimaasi ŵajanjile, "Katema che Yoabu paŵandumile une jwakutumichila jwenu, nauweni mpingo wa ŵandu uli jagalijagali nambo ngingumanyilila kuti kwaliji kwana chichi." 30 Mwenye ŵatite, "Njime pambali nlindilileje pelepo." Nipele che Ahimaasi ŵasejele pambali ni kwima jii.

31 Pelepo Mkushi jula ŵaiche, Nombe najo ŵatite kuti, "Naaichisye ngani syambone ambuje ŵangu mwenye. Pakuŵapo lelojino Ambuje Akunnungu ammombwele kutyochela kwa aŵala wosepe ŵaŵangalawiche alakwe." 32 Mwenye ŵausisye, "Uli jwanchanda che Abusalomu ali chenene?" Mkushi jula ŵajanjile, "Ŵammagongo ŵenu, ambuje ŵangu mwenye, pamo ni ŵanawose ŵakungalauka achisakaga kuti linsimane limbulunga, gaasimane mpela igansimene jwele jwanchanda che Abusalomu jo." 33 Pelepo mwenye jaakamwile ndengu. Ŵakwesile ku chuumba chachili penani pa nnango ni kulila. Paŵaliji nkukwela ŵalilaga achitiji, "Mmwe mwanangu che Abusalomu, mwanangu che Abusalomu! Mmbaya ngawile une pamalo penu! Yii, che Abusalomu mwanangu! Mwanangu!"

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?