1 Aga ni maloŵe gakumalichisya ga che Daudi. Uli utenga wa che Daudi mwanache jwa che Yese, mundu juŵatendekwe kuŵa jwankulu ni Akumanani, mundu juŵajimbaga nyiimbo sya Ŵaisilaeli juŵasagulikwe ni Akunnungu ŵa che Yakobu.

2 Mbumu jwa Ambuje Akunnungu akuŵecheta kwa litala lya une,

ni maloŵe gangugaŵecheta gakukopochela kwa ŵelewo.

3 Akunnungu jwa ku Isilaeli ŵaasasile,

Lwala lwa ku Isilaeli ŵaasalile,

mundu pakwatawala ŵandu kwa litala lyalikukundikwa paujo pangu.

Jwakutawala kwa kwakwachimbichisya Akunnungu,

4 jwelejo ali mpela lilanguka lya kundaŵi,

palikukopoka lyuŵa kundaŵi,

kundaŵi kwangali maunde,

mpela lilanguka pakumala kunya ula jajikusipusya manyasi paasi.

5 Ana ŵamunyuumba jangu nganasagulikwa ni Akunnungu?

Elo ŵelewo atesile lilangano lya moŵa gose pangali mbesi ni uneji,

ngaalileka lilangano lyakwe.

Nombejo tachitenda indu yangu inyendelechele yambone ni chenene mu yanayose ingiuilajila.

6 Nambo ŵandu wose ŵangakwajitichisya Akunnungu ali mpela miiŵa jajikwasikwa,

pakuŵa ngajikomboleka kujigalikwa ni makono,

7 kuti njikamula ikusachilwa ntumie yuma pane mpini wa mpamba.

Nombe tijichomekwe papopo ni moto.

8 Gelega gali meena ga ŵangondo ŵakulimbangana ŵaŵaliji ni che Daudi: Che Yoshebi Bashebeti jwa ku Takimoni juŵaliji chilongola jwa aŵala ŵandu ŵatatu, jweleju ŵaputene ni mpamba wakwe, ni kwaulaga ŵandu mia nane pa lyuŵa limo.

9 Juŵakuiye pa aŵala ŵandu ŵamachili ŵatatu ŵala jwaliji che Eleasali mwanache jwa che Dodo, jwa ntundu wa Mwahohi. Palyuŵa limo, che Eleasali ŵaliji pamo ni che Daudi katema paŵaatukene Ŵafilisiti ŵaŵasongangene kuputana ngondo ku Pasi Damimu, ni Ŵaisilaeli ŵaatisile Ŵafilisiti. 10 Nambo che Eleasali ŵajimi mwakulimbila ni kuputana ni Ŵafilisiti mpaka nkono wakwe pawalepele kupinda, ni ŵasigalile uli ukamulene ni lipanga lyakwe. Palyuŵa lyo Ambuje Akunnungu ŵaatesile apunde kwannope. Pakumala kupunda ko, Ŵaisilaeli ŵaiche kuŵaliji che Eleasali kujigala indu ya Ŵafilisiti ŵaŵaulajikwe.

11 Jwangondo jwakulimbangana jwaatatu ŵaliji che Shama mwanache jwa che Agee, jwa ku Halali. Ŵafilisiti ŵasongangene kwele ku Lehi ko, pamalo papaliji ni ngunda wa dengu, nombe Ŵaisilaeli ŵaautwiche Ŵafilisiti. 12 Nambo che Shama ŵajimi mwakulimbila pasikati ja ngunda wo kuti akasumulwa, nombejo ŵauleje Ŵafilisiti. Ambuje Akunnungu ŵapundisye kwannope.

13 Nipele, ŵangondo ŵakulimbangana ŵatatu pasikati ja ŵangondo ŵakulimbangana salasini ŵatulwiche katema ka magungulo, ŵaiche kwa che Daudi ku mbugu kwele ku Adulamu ko. Pa katema ko ŵangondo ŵa Ŵafilisiti ŵaliji aŵisile chigono ku chiŵata cha ku Lefaimu. 14 Nombe che Daudi pa katema ko ŵaliji ku likome, ni chigono cha ŵangondo Ŵafilisiti pa katema ko chaliji mmusi wa ku Beselehemu. 15 Pa lyuŵa limo che Daudi jaakwete njota, ni ŵatite, "Ikaliji yambone mundu akambele mesi gakung'wa ga chisima chichili kuŵandikana ni nnango wakwinjilila mmusi, ku Beselehemu!" 16 Kwayele Aŵala ŵangondo ŵakulimbangana ŵatatu ŵatyosile, ŵapelete pasikati ja chigono cha ŵangondo ŵa Ŵafilisiti, ŵajawile ni kuteka meesi ku chisima cha ku Beselehemu, chiŵandi ni nnango wakwinjilila mmusi, ŵagaichisye kwa che Daudi. Nambo che Daudi ŵagakanile kung'wa, pamalo pakwe ŵagajitilile paasi mpela mbopesi ja chakung'wa kwa Ambuje Akunnungu, 17 ni ŵatite, "Ngulumbila kwa Ambuje Akunnungu, nganingola chigolochelo chakung'wa aga mesi ga, ana aga mesi ga ngaŵa mpela miasi ja aŵala ŵandu ŵautasile umi wao mu chakogoya kugaichasya?" Kwayele, che Daudi nganang'wa mesi go. Yeleyo ni indu iŵaitesile aŵala ŵangondo ŵakulimbangana ŵatatu ŵala.

18 Che Abiasali mpwakwe che Yoabu, mwanache jwa che Seluya, ŵaliji jwankulu jwa ŵangondo ŵakulimbangana salasini. Jwelejo ŵamenyene kwa mpamba wakwe ni ŵandu mia tatu, ni kwaulaga pa lyuŵa limo, ŵapikaniche mpela aŵala ŵangondo ŵakulimbangana ŵatatu ŵala. 19 Ana aju nganaŵa jwakumanyika kwannope pasikati ja ŵangondo ŵakulimbangana salasini ŵala? Kwayele ŵaliji chilongola jwawo, nambo nganaŵa jumo jwao aŵala ŵangondo ŵatatu ŵala. 20 Che Benaya mwanache jwa che Yehoyada ŵaliji jwangondo jwakulimbangana kutyochela ku Kabiseeli, juŵatesile indu yejinji yekulungwa. Ŵauleje ŵangondo ŵamachili ŵaŵili ŵaŵaliji ŵakulimba mitima kwapunda wosepe ŵa ku Moabu. Sooni pa lyuŵa limo balafu jili jipali, ŵajinjile mwisimbo ni ŵauleje lisimba mwelemo. 21 Nombe ŵammuleje Mmisili jwalewipe jwakandapala. Mmisili jo ŵakwete mpamba, nambo che Benaya ŵanjaulile ali ajigele chidonga pe, ŵansumwile mpamba wo, ni kummulaga Mmisili jo ni mpamba wakwe nsyene. 22 Che Benaya mwanache jwa che Yehoyada ŵatesile indu yi, ni ŵapikaniche pasikati ja aŵala ŵangondo ŵatatu ŵala. 23 Nipele ŵaliji jwachimbichikwe kupikanika pasikati ja aŵala ŵangondo ŵakulimbangana salasini nachiŵamuno nganaŵa mpela aŵala ŵangondo ŵatatu ŵala. Ni che Daudi ŵantesile kuŵa jwankulu jwa ŵakulindilila ŵakwe nsyene. 24 Che Asaeli mpwakwe che Yoabu, ŵaliji jumo mwa ŵangondo ŵakulimbangana salasini. Ŵangondo ŵakulimbangana ŵane ŵa che Daudi ŵaliji che Elihanani mwanache jwa che Dodo jwa ku Beselehemu 25 che Shama jwa ku Halodi ni che Elika jwa ku Halodi 26 ni che Helesi jwa ku Paliti ni che Ila mwanache jwa che Ikeshi jwa kutyochela ku Tekoa 27 ni che Abieseli jwa ku Anatoti ni che Mebunai jwa ku Husha 28 ni che Salimoni jwa ku Ahohi ni che Mahalai jwa ku Netofati, 29 che Helebu mwanache jwa che Baana jwa ku Netofati ni che Itai mwanache jwa che Libai kutyochela ku Gibea ku malo ja lukosyo lwa Benyamini, 30 ni che Benaya jwa ku Pilatoni ni che Hidai kutyochela ku tusulo sya ku Gaashi, 31 che Abi Aliboni jwa ku Alaba ni che Asimaweti jwa ku Bahulimu, 32 ni che Eliaba, jwa ku Shaaliboni ni ŵanache ŵa che Yasheni ni che Yonatani, 33 ni che Shama jwa ku Halali ni che Ahimu mwanache jwa che Shalali jwa ku Halali, 34 ni che Elifeleti mwanache jwa che Ahasibai, jwa ku Maaka ni che Eliamu mwanache jwa che Ahitofeli jwa ku Gilo 35 che Hesilo jwa ku Kalimeli ni che Paalai jwa ku Alabi, 36 ni che Igali mwanache jwa che Natani kutyochela ku Soba, ni che Bani jwa ku Gadi 37 che Seleki Mwaamoni ni che Nahalai jwa ku Beeloti juŵaliji jwakwigala yakumenyanila ya che Yoabu mwanache jwa che Seluya, 38 ni che Ila ni che Gelebu kutyochela Yatili, 39 ni che Ulia jwa lukosyo lwa Hiti. Ŵanawose kwapamo ŵaliji ŵangondo ŵakulimbangana salasini na saba.